[專欄：香港在日本]
「想做就去做！」講嘅人經常都有，不過做嘅人最後又有幾多？（小編搶先表示慚愧），本來喺廣告界打滾嘅Hadee就做到啦。話說今年（2017年）9月佢就毅然決定裸辭，同男友一齊遠征九州，由鹿兒島行去福岡，用一個月時間嚟返次600公里長征！
Hadee仲喺社交平台為今次行程開咗個專頁，結果專頁粉絲愈嚟愈多，仲成為佢完成今次長征嘅一大動力！ 依家就等LikeJapan同大家睇下佢點解會構思到今次嘅行程，同行程中嘅所見所聞同感受啦！
究竟點解會有今次計劃？
香港好似所有嘢都有公式咁，讀書有公式、搵工有公式、人生有公式、連教仔都有公式，我想逃離一下呢個公式化嘅地方，用最簡單嘅行路旅行放一個真正放鬆嘅假。
為何會選擇遠征九州？
因為衝平機票時淨係撳到鹿兒島同福岡嘅平機票，就係咁樣決定呢兩個地方喇！
究竟事前有做過甚麼準備同用咗幾多時間準備？ 預備咗幾多錢？ 另外又帶咗甚麼物品？
事前要有心理準備會打風落雨，因為9同10月係風季，事實上途中都有幾日出唔到門呀。
另外由於唔使預錢搭車，所以最後兩個人都係用咗HKD$30000左右，我哋平時係食得好豪，特別喺Lawson同Family Mart就食得更豪！
攜帶物品方面我哋只係簡單帶咗幾件替換衣物，係我女仔麻煩要帶護膚品囉。
Facebook page中睇到好多唔同景點同靚相，整個行程你覺得最大特色係咩？
最大嘅特色係「人」，人就係最靚嘅風景！
旅程當中好似有遇過好多感人故事，人很好又熱情，甚至九州整體風土人情都很好，這是九州普遍現象嗎？旅程上有冇遇過壞人？
日本人本身就好友善，係生活喺大城市嘅人普遍比較繁忙同壓力比較大，所以我遇到嘅感人故事都係發生喺小城市甚至路邊。另外日本出名罪案率低，喺九州偏遠地方更加係極低?呀！
頭先畀警察捉咗上警車。
（佢兩個討論咗一陣）
警：你哋冇錢？
我：唔係呀
警：畀人打劫？
我：唔係呀（雖然我連個袋都冇）
警：唔識路？
我：唔係呀
心諗最後一段路，你畀我行埋佢啦……
警：行路危險呀！
我：我由鹿兒島行過嚟㗎….
警：（呆一呆）搭巴士啦！
（下刪15分鐘對話係形容前面山勢有幾險要，幾恐怖，又冇得唞又呢樣又嗰樣。）
我知…佢哋係出自關心吖嘛，但為咗我可以快啲逃出架警車去上路，我懶醒呃佢話：好呀，咁我搭巴士啦！
以我對警察（香港警察）嘅了解，佢一定係是但搵個位放底我就講掰掰。
點知國情唔同，連警察都好唔同，佢兩個竟然係車我哋返差館吹一陣水，再親身行路帶我哋去巴士站，再再幫手睇班次買車飛，再再再同全個車站啲人講呢兩條友要去福岡天神…….
你咁樣，我點走佬呀！最後啲車站職員係護送我哋上巴士咁濟
點解？點解你要咁做？我打算轟轟烈烈行去福岡㗎嘛…
Hadee試過遇到警察因為怕佢迷路索性買埋車飛送埋佢上車去福岡
真係唔難明白點解個個香港人都鍾意去日本。
頭先民宿姐姐叫我專心食飯，佢全家人一齊幫我睇地圖Plan路程….
真係唔使對我咁好㗎????
又試過民宿一家人總動員幫佢諗行程
喺表達自己係香港人時有冇遇到甚麼趣事？
事關我日文太差，通常講完自己係「HongKong煎」就唔知佢哋講咩㗎喇….我最叻咪傻笑囉。
喺專頁都見到你食咗很多美食，可以講你最愛嘅食物/一餐係？
我最驚喜係民宿嘅早餐竟然係食蟹！一隻新鮮喺海邊捉上嚟嘅蟹，而且仲幫我拆好晒，而我最鍾意呢餐主要係因為日本婆婆嗰份細心。
民宿婆婆預備嘅早餐，連蟹都細心地拆好晒
日本仲有咩地方想去？
呢個世界每一個地方我都想去㗎，除非係太危險嘅啫！
你的招牌搖頭相有冇特別意思XD
係有一次我男朋友影到我頭髮好亂嘅相覺得幾特別，於是就一直Keep住影喇！
可以介紹一下你的旅伴嗎？
佢係我男朋友囉^^
如果有其他香港朋友想嘗試類似行程，有冇甚麼要特別注意？
我都係第一次徒步旅行，唔係好叻但可以分享小小經驗畀大家。
一定要帶雨褸同頭燈。
著一對舒服同適合嘅鞋同襪。
儘量輕裝上陣唔好帶無謂嘢。
水同食物唔使太擔心，日本周圍都有好多便利店同自動販賣機。
最重要係做一個好嘅旅客，唔好影響到當地人寧靜嘅生活。
用一個月時間嚟玩一次600公里長征，聽起上嚟好刺激好浪漫，不過實際上要實行除咗體能之外，對意志嘅要求亦都非常之高！ 如果大家自問有咁嘅能力同恆心嘅話，真係不妨「浪漫」一次？
想知多啲Hadee於旅程中遇到啲咩人同事？ 即刻去佢專頁睇下啦！
https://www.facebook.com/walktofukuoka/
About Post Author
