如果有去旅遊展嘅朋友，可能已經發現HK Express最近開咗三條新嘅日本航線，分別係石垣島、高松同鹿兒島。今次我就帶你地潛入沖繩縣入面嘅石垣島，到底有咩玩？
對香港人嚟講，石垣島呢個名可能會比較陌生，不過由香港搭飛機過去其實只需兩個幾鐘左右就可以到達，非常方便。
▼國際線大堂比較細，只係用於基本出入境。如果你想買手信或者用餐就可以到旁邊嘅國內線大堂，徙步過去只需兩分鐘。
▼今日要介紹嘅景點就係傳統手工藝教室嘅みね屋工房。選中佢為第一個介紹嘅景點，除咗因為佢充滿傳統色彩之外，同時亦因為佢仲有一個趣味性好高嘅「草木染體驗」。
▼老師會安排我地進入一間小教室，講解如何製作唔同嘅圖案。而基本款式就係白板上面貼住嘅方格同圓型。
▼工具簡單，一眼睇晒，就係手套同手巾仔。
▼一開始我跟老師指導摺咗呢個方型款式。不過老師話，你可以發揮自己無限嘅創意，去染一條獨一無二嘅手巾。所以最後我都決定自己亂摺一通![【潮玩石垣島】自己落手・染布體驗工作坊]()
▼準備好之後，老師就展出佢嘅「染布三寶」。分別係清水、顏料同石灰水。不過顏料並非我地平時畫畫用嘅顏料，而係由植物提煉出嚟嘅汁液，絕對天然。當日老師就為我地提供咗藍色同黃色嘅染料。
▼先由清水沾濕整塊手巾，搾乾水份後，就可以重覆染布四部曲：上顏料►榨乾水份►上石灰水►榨乾水份，整個過程大約重覆十次。（當然只係浸你想上色嘅部分。）
▼到另一邊藍色染料，步驟亦都係一樣，不過因為藍色會比較上色，所以重覆四至五次就足夠。但其實仲有一種隱藏嘅顏色…就係「黃加藍變綠」啦 ![【潮玩石垣島】自己落手・染布體驗工作坊]()
不過要染得靚都相當考功夫㗎。
▼完成上色後，去旁邊用清水洗乾淨就大功告成。你睇下老師個條染得幾靚。
▼老師示範完就到我地親自落場啦。如果驚整污糟衫，都有圍裙提供番俾大家使用，勁貼心。而大家都非常認真去染，過程充滿歡樂，仲對自己嘅作品充滿期望。
▼登登！成品出嚟啦！好明顯右上同左中都係二次創作啦。而我個條…就係最平平無奇嘅中下啦，有少少後悔無跟老師教嘅款式去染，不過仔細睇嘅話，我個條都有一條條細紋係上面㗎。
▼雖然我嘅手巾未必係最突出，不過可以自己落手落腳參與整個過程真係感到好滿足，最重要係可以帶住呢個成品返香港留念。
▼工作坊完結後可以到佢嘅商品逛一逛，大部分商品都係人手製作。而且織品方面顏色豐富，同團嘅朋友亦都忍唔住手買咗個卡片套。
▼員工就係現場即場製作。
但留意番，平時呢度係唔俾影相㗎。所以大家嚟到就要乖乖收起相機啦。（我地係有許可的![【潮玩石垣島】自己落手・染布體驗工作坊]()
）
今次嘅「草木染體驗」價錢為2000円，但價格會因日子而浮動，所以黎之前記住問清楚。工作坊採取預約制，最少一日前預約，團體嘅話就最少三日。
除咗染布之外，其實佢仲有其他工作坊，好似製作書簽、杯墊、手帶等等，價錢由1000円至2500円不等。
後記：今次嘅石垣島之旅，我地係全程有車接載。如果無車又想黎呢邊嘅話都有公共交通工具可以到達。不過建議黎石垣島嘅話最好就係自駕遊，因為其實景點都比較分散，如果自駕遊嘅話相信會比較輕鬆。建議大家可以預留約兩個小時係呢邊（包括工作坊）。整體而言，不論情侶，或者親子遊，呢度就係一個值得遊玩嘅地方。
黎緊會介紹更多石垣島同週邊小島嘅景點，大家記住繼續收看啦！真心覺得石垣島係一個好山好水好地方，有機會一定會再黎。
【みね屋工房】
地址：沖縄県石垣市新川湧川原1129-2
電話：0980-83-0039
傳真：0980-83-3485
官網：http://mineya.com/index.shtml
特別嗚謝：HK Express 和 Visit Okinawa hk 沖繩觀光會議局
About Post Author
