烏冬專門店「丸龜」分店遍佈日本各地，近年更加進駐埋香港，話唔定大家屋企附近都早已經有一間。不過如果你會去沖繩，都一定要去拜訪一下沖繩嘅分店，因為呢度有「沖繩限定」嘅特色配料！
就係呢件「水雲天婦羅」！水雲盛產於沖繩，沖繩人好鍾意將水雲整成炸物料理，所以水雲天婦羅亦順理成章地成為丸龜沖繩分店嘅地區限定特色配料。
呢個就係水雲嘅真身，最普遍嘅食法係以醋調味，香港某啲食肆都可以食到，但天婦羅就比較少見。
去到丸烏嘅沖繩分店只有一個目標，就係新鮮炸起熱辣辣脆卜卜嘅水雲天婦羅！認住「もずく」三個字，見到即刻夾返件冇走雞！
想食得簡單啲其實一件水雲天婦羅已經好夠。天婦羅除咗可以點天婦羅專用醬汁之外，仲可以成舊放入湯湯烏冬內浸淋佢，品嚐水雲特有嘅滑捋捋口感。
一件天婦羅加一碗湯烏冬都只係¥440，仲要係地區限定嘅美食，下次去沖繩識揀啦！
【追加！沖繩店限定美食！】
沖繩分店其實仲曾經推出過「醬油豬骨」、「苦瓜天婦羅」兩款極受市內外人歡迎嘅配料，不過由於係期間限定嘅關係並唔係成日都食得到，如果丸龜可以將佢地變成店內regular menu咁就好喇～
醬油豬骨烏冬
以醬油、昆布、鰹魚等材料長時間熬煮過嘅豬軟骨非常入味，入口即化，可惜唔係成日都食到。
苦瓜天婦羅
好多唔食苦瓜嘅人都覺得沖繩嘅苦瓜唔苦不特止，仲清甜帶甘，丸龜嘅苦瓜天婦羅都係，甘甜之餘仲好脆口，有機會見到記得要夾返舊！
地點：丸龜製麵 沖繩各店
官網：www.marugame-seimen.com
About Post Author
