同澀谷、新宿一樣，池袋係東京其中一個最繁華嘅地區，無論係購物中心、各種美食定娛樂場所都多不勝數~今次就等住喺池袋嘅小編同大家介紹吓池袋有咩食買玩好去處，率先登場嘅就係位於池袋車站旁，出口可以直到的購物中心東武百貨店啦!
17層大型購物中心東武百貨店 搭電車去池袋站落車，出閘後行幾步就會見到東武百貨店，非常方便!以下精選咗10間東武百貨店必去舖頭，包保大家啱心水~
——————————-
美食篇
#1 B1F 零食店 OYATSU table
OYATSU(おやつ)即係零 食咁解，依到有好多可愛造型嘅糖果、餅乾、蛋糕等等零食，啱晒買嚟做手信! 當店人氣No.1嘅商品係笑哈哈朱古力，睇落似聰明豆加咗個笑哈哈上去 咁~第2位就係自選積木蛋糕，大家可以同店員講想要咩大細嘅蛋糕盒(4件裝係東武店先有!)，然後大家就可以拎住個盒，將自己鍾意嘅蛋糕砌入個盒入面，變到成件積木咁，好有趣啊~
——————————-
#2 B1F 便當店 nicodeli
喺nicodeli一次過可以買到各款精緻便當同餸菜，盒盒賣相都好吸引，啱晒買返酒店做宵夜同早餐!依到最好賣嘅食品第三名係無骨炸雞，第二位係醬汁雞肉，而第一位就係青椒昆布雞絲沙律啦!店長話青椒昆布雞絲沙律一日可以賣到35盒咁多，睇嚟健康小食嘅人氣真係冇得輸~
——————————-
#3 B1F 甜品蛋糕店 Konigs-Krone
食物館入面嘅甜品蛋糕店Konigs-Krone係一間開業於昭和52年嘅老餅店~店內凍櫃擺滿咗一杯杯合時商品，例如水果布甸、水果蛋糕杯等等，啱晒鍾意買甜品返酒店食嘅朋友~如果人多嘅話可以挑戰份量比較大嘅3月商品「甜王」士多啤梨蛋糕批，鬆脆批皮入面有層層蛋糕同水果等等，聽落都覺吸引~ 除咗甜品之外，當店嘅超人氣商品4色罐裝禮盒(2160円)(連稅)入面有多款曲奇同批，下次新年送禮時不妨考慮吓(笑)
——————————-
#4 13F 吉列豬扒とんかつ和幸
東武池袋11F樓至15樓有成46間餐廳咁多，真係成個美食天堂咁啊~當中13樓「和幸」嘅吉列豬扒 就非常出名，小編點咗個吉列3選定食(1500円)(連稅)，入面包咗芝心吉列豬扒、吉列大蝦同吉列蟹忌薕可樂餅，份量十足~芝心吉列豬扒中間層芝士好香濃，仲有少少流心 ~配埋個秘制醬汁，惹味程度100分!
——————————-
#5 13F 西餐X甜品店 不二家餐廳
相信鐘意食甜品的朋友對日本老子號餅店「不二家」都唔會陌生~依間不二家餐廳主打各類甜品，水果芭菲、班戟、蛋糕等等都有信心保證~小編試食咗士多啤梨熱香餅(900円)(連稅)同意大利士多啤梨蛋糕(590円)(連稅)，熱香餅蛋香好重，士多啤梨蛋糕忌薕口感輕柔，入口即溶，係幸福嘅味道啊~其實依到除咗甜品之外仲有意粉等等主食提供，有興趣 嘅話可以直接喺到食完晚餐再叫甜品 ~
——————————-
購物篇
#1 7F 精品店 Sanrio
小編去採訪的時候天氣仲係好凍，不過東武嘅Sanrio門口已經放滿晒櫻花主題精品，一片粉紅色充滿春天氣氛啊~PUMA同Hello Kitty合作嘅紅色波鞋(12960円)(連稅)超級搶手，每個碼數都只有一對，想買就要盡快入手啦~當店其中1樣人 氣商品就係布甸狗、My Melody、Little Twin Stars兔兔公仔(1620円)(連稅)，屁股個位真係有好大舊白雪雪嘅毛毛，好得意啊~如果想送禮物畀返學的小朋友，可以考慮學生禮物Box Set(5724円)(連稅)，入面有多款文具，啱晒學生哥!
——————————-
#2 7F 文具店 伊東屋
創於1904年嘅伊東屋已經有過百年歷史，係一間好出名嘅文具店~東武池袋嘅伊東屋都幾大間， 各種無論係筆、簿、紙、卡…幾乎所有文具都可以喺到搵到!小編特別鍾意依到嘅賀卡，有啲卡收埋咗啲「機關」，一拉條繩就會見到寫住「HAPPY BIRTHDAY」，好得意!記得買來送俾朋友啦!另外依到又有賣近年大熱嘅食物造型筆記簿，當中朱古力餅同方包筆記簿就最搞笑啦~自己都想買返幾本呀!
——————————-
#3 5F 行李箱專門店ＰＲＯＴeＣＡ
ＰＲＯＴeＣＡ專門賣多功能行李箱，有啲有電話充電功能(目前只限andriod電話)，方便長途旅行嘅朋友 ; 有啲就可以鎖死車輪，搭巴士時就可以空出雙手做其他野，都唔洗怕件行李碌走啦~
——————————-
美容篇
#1 2F 護膚品 HABA
HABA係一個日本原創嘅護膚品品牌，佢地嘅王牌產品鯊魚烷精油有高效嘅保濕成份，而且非常襟用，每次用少少一滴，30ml裝可以用足半年!由於HABA係「無添加主義」所有產品都不含任何添加劑，唔易引起皮膚敏感， 所以適用於任何年齡嘅顧客，甚至連嬰兒或者孕婦都可以安心使用~
——————————-
#2 14F 美容剪髮 beauty TUNE SHISEIDO
最近愈來愈多人鍾意去日本剪頭髮，因為日本髮型師剪得特別好睇咁話喎～其實唔洗左搵右搵，東武池袋14樓都有間美容髮型屋beauty TUNE，仲要係護膚品名牌資生堂SHISEIDO旗下嘅店舖 嚟！普通剪髮套餐(6480円)(連稅)已經包咗洗、剪、吹同造型，過程中髮型師會用資生堂嘅護髮產品幫客人護髮，又會好細心幫你諗造型，仲教埋大家點先保持到個髮型靚靚 ~最後因為客人剪完頭髮後，唔多唔少個妝都會花花地，所以髮型師會教大家點樣補妝，好貼心啊～
——————————-
外國人專用5%OFF優惠券
東武池袋2樓嘅免稅櫃台除咗可以辦理一般退稅手續之外，仲有得換優惠券 ～只要去櫃檯到出示你嘅護照同以上依張優惠券對兌券，就可以換領一張95折優惠券啦！留意返必須要買夠單價 1000円(不連稅)以上嘅商品先可以用到依個優惠，每張優惠券喺發行後7日內可以無限使用，真係好抵啊！大家記得行街街之前記得換埋先好出發啦～
*本優惠券對兌券有效期至2019年8月31日
*有關詳情及細則請參考優惠券上的注意事項
——————————-
東武百貨店 池袋店
地址：東京都豊島区西池袋1-1-25
營業時間：10：00～20：00 B2F～3F、6F（3～7區）、9F、10F：10：00～21：00（星期日及公眾假期除外）
About Post Author
