朗報！傑尼斯事務所肖像權放寬對網媒解禁

有留意開日本娛樂新聞嘅朋友對以下嘅情況一定唔陌生：

封面人物變咗做影子？

以上情況，都係因為傑尼斯事務所(J家)嘅「肖像權保護」。一直以嚟事務所對旗下藝人嘅肖像權對相當嚴謹，唔允許佢哋嘅相喺網上流出。所以佢哋喺網絡上就好似個神祕人咁，永遠都唔可以喺網絡上露出佢哋嘅廬山真面目。（當然，官方網頁同部份劇集／電影嘅官方主頁係有佢哋嘅樣㗎！）

連封底Hey! Say! JUMP同Kis-My-Ft2等嘅圖都變咗做一片灰色⋯⋯
（圖：截自カドカワストア https://store.kadokawa.co.jp/shop/g/g321710000120/）

明明主演在場但入唔到鏡？

電影《最後的食譜》試映會嘅報導，主演嘅二宮和也（嵐）雖然在場但無法現身喺相片之中。
（圖：截自映画ナタリー https://natalie.mu/eiga/news/250187）

只能用文字提及嘅藝人？

就算係其他演員嘅post都唔放過，好似室毅呢個post咁，明明松本潤（嵐）同生田斗真都有出席生日會，但只可以充當攝影師或者就咁喺推文上提及話佢都喺度。
（圖：截自室毅Twitter）

甚至成個藝人直接被P走？

截自東寶網頁上電影《愛，不由自主》試映會嘅報導（https://www.toho.co.jp/movie/news/1708/01narratage_ib.html），係咪覺得有村架純隻手好似怪怪哋咁呢⋯⋯

因為原圖係咁架！！

冇錯，其實佢係拖住松本潤（嵐）行落樓梯㗎，不過因為肖像權所以唔可以將有松本嘅圖放上網，所以就比人直接P走埋。但電視上嘅報導冇呢個限制，所以松本先可以以真面目示人。
（圖：截自北海道電視台節目《イチオシ！》）

一直以嚟傑尼斯事務所對旗下藝人嘅肖像權都相當嚴謹，唔允許佢哋嘅相喺網上流出，但隨住近年網絡越來越普及，傑尼斯事務所終於喺1月31日藉住錦戶亮主演嘅電影《羊の木》，喺日本外國特派員協會舉行嘅記者招待會上正式「解禁」，宣佈網絡媒體都可以刊登記者招待會、採訪、宣傳活動等場合嘅相！雖然事務所都有限制話只能刊登最多3張相，但對各位粉絲嚟講都係一個可喜可賀嘅消息。相信各位粉絲知道後都好似解禁後第一位上報嘅錦戶亮（関ジャニ∞）咁笑得咁開心啦～

（圖：截自HUFFPOST http://www.huffingtonpost.jp/2018/01/31/hitsuji-no-ki_a_23348865/）

其實傑尼斯事務所喺近年都逐漸放寬緊旗下藝人嘅肖像權。CD舖嘅網店可以公開佢哋嘅CD嘅封面照，11月嗰陣，ジャニーズWEST主演嘅《炎の転校生 REBORN》由NETFLIX平台向全世界公開，前排岡田准一（V6）又可以喺LINE LIVE現身，近日木村拓哉主演嘅《BG～身辺警護人〜》仲不時將佢嘅自拍喺LINE度同大家開心share，可見事務所喺傳媒以外，都逐漸允許藝人喺唔同媒介上面出現呀。