《Like Japan放送室》繼續同大家探討日本嘅陪酒女郎文化。上回講到派遣陪酒女郎，我哋就好高興搵到現役嘅日本派遣陪酒女郎Risa同我哋做訪問。有三年工作經驗嘅佢仲同我哋share咗唔少嘅行內花生添呀！
Risa開始做陪酒女郎嘅原因都係因為讀大學嘅時候想搵多啲外快，一做就做咗3年，仲希望可以一路做到30歲添！佢話其實依家陪酒女郎喺日本係非常之普及，梗有一個係左近，所以已經好少話會見到有瞞著屋企人去做嘅女仔喎。佢仲話分分鐘每8個女仔入面就有1個係有最少試做過酒吧女郎、夜總會、或者高級俱樂部嘅經驗添喎。
問到Risa陪酒女郎係點樣睇夜總會，佢就話有啲店舖會好大方公平咁同妳分佣、仲唔會抽你啲費用（例如福利厚生或稅金），甚至會免費嘅接送服務。而且店入面嘅員工人品好嘅話，就算時薪低少少佢都唔會介意再去嘅。
Risa仲同我地分享咗好多行內嘅花生。例如，有啲客人可能唔抵得入夜總會要燒好多錢，所以會直接包起個夜總會陪酒女郎，每個月俾200萬yen人哋做專屬情婦架！Risa仲話係好平常，而且夜總會本來就有一半客人都係結咗婚。呢啲男人會係聚會完結後一齊去夜總會玩。
問到Risa有無遇過啲好離譜嘅客人，佢就話曾經試過可能因為講錯嘢激嬲客人，客人當場捉住佢啲頭髮！Risa仲好嬲話當時舖頭無即刻趕過人客走，某程度上即係冇保護Risa，所以佢覺得好唔忿氣。另外，佢都話有朋友試過被客人跟蹤，仲要偷拍埋，果然客人癲係上嚟真係幾係嘢架！
最後我哋問到Risa做派遣同做全職嘅分別，佢就話做派遣基本上一個禮拜返4日工分分鐘都可以好賺過正職添！佢話想做到30歲，跟住就同男朋友結婚生仔～佢嘅夢想係成為一個專業甲師添呀。（其實真係同一般女仔無異）
下集我哋會去位於新宿嘅夜總會同大家報導真正係場入面做嘢嘅陪酒女郎係點嘅。記得留意呀～
特別鳴謝：キャバクラ派遣More 全力協助拍攝
網址：ccccc.biz
About Post Author
