日本&空姐教路！外出保暖法加室內保溫法！
香港最近急遽轉冷，出到街人人都開始着大褸。包住厚厚嘅衣服，大家會唔會覺得週身唔自在呢？想脫離大褸又保暖？日本電視節目《R的法則》就教大家點樣就算唔着到成隻稯咁都可以暖笠笠，仲可以「keep」住自己嘅靚靚冬日配搭添！其實節目仲話着太多衫包到自己實一實唔係太好，因為雖然一時好暖，但會熱到出汗，令汗吸收自己體溫反而無咁暖架。
外出保暖法──「日本流」
第一招：着一件貼身嘅保暖內衣先
(出自：NHK《R的法則》)
首先大家需要嘅係一件貼身嘅保暖內衣，依個係關鍵。繼內衣之後，再着上一件鬆身的上衣，將上衣同內衣之間嘅空氣留住，就可以保持「發熱效果」。之後再穿上一件手袖或領口較緊嘅衣服，防止熱氣逃走。有以上三種效果，就可以係穿最少衣服，密實包住身體周圍嘅熱空氣啦！如果要出街，再加一件外套，就可以起行啦！
第二招：貼上暖貼同戴頸巾
(圖片來源：NHK《R的法則》)
貼上暖貼有幾重要？上圖嘅左(未貼前) 同右(貼上後) 就知道有無咩分別啦！專家就推薦暖貼貼喺肚嘅位置，因為可以溫暖內臟，令血氣運行順暢，帶動身體發熱。記住貼喺內衣上而唔係直接貼啊，否則會燙傷架。仲有，因為香港流行嘅手揸暖包只可以暖手，所以專家比較推薦貼上身嘅暖包，貼係唔同位置效果更好。而頸巾都係重點之一，因為頸嘅週邊有好多比較粗嘅血管，而一般衫比較難覆蓋到佢保暖，所以頸巾都好重要。
外出保暖法──「空姐流」
洋蔥式着法
LikeJAPAN編輯部亦特別問咗facebook專頁「麻甩空姐手記」(傳送門：https://www.facebook.com/travelgramofawanderer) 點樣為自己保暖。佢就話其實唔需要羽絨，以「洋蔥式着法」就可以克服嚴寒。洋蔥式着法係指穿上一層一層嘅衣服，但係室外進入溫暖室內要記得除衫，否則會焗親、外出時仲會失溫。以下就係空姐版主嘅着法：
(圖片來自「麻甩空姐手記」
專頁：https://www.facebook.com/travelgramofawanderer/posts/1663674500516748?__mref=message_bubble)
上身
1. 保暖內衣
2. 有厚度既打底
3. 冷衫 / 羊毛冷衫
4. 人造毛毛褸 / 夾棉褸 / 厚羊毛褸
5. 防水厚風褸
下身
1. 夾絨層褲子
2. 羊毛襪褲 加 褲 / 裙
3. 厚襪 / 羊毛襪
4. 厚底鞋
小物
1. 手套
2. 冷帽
3. 頸巾
4. 口罩
5. 暖水瓶
用依個方法，版主甚至係瑞士雪山或-20度嘅5000米高原都冇問題！佢仲建議如果大家係去日本，可以去到當地先買以上衣物，因為日本保暖衣物較平同選擇多，買夠數仲可以退稅，堅係抵！
室內保溫法
第一招：毛氈蓋被子
(出自：NHK《R的法則》)
首先，喺床單上面鋪一塊毛氈先，令到熱能唔好向下走。之後再於自己身上蓋上一張被、上面再加一塊薄毛氈，就係睡眠嘅最好保溫法啦！因為被上面加咗毛氈，會令被上面嘅體溫被毛氈保存住，就成晚唔怕凍啦！
第二招：訓教唔好着襪或着冷衫
(出自：NHK《R的法則》)
好多人臨瞓前覺得自己隻腳或者身體好凍，於是就着住襪同冷衫瞓覺。其實咁樣反而令你起身覺得更加凍！原因就係瞓覺途中，腳或者頸周圍都會流汗，進一步吸收身體嘅熱能。所以，如果覺得自己腳凍或身體凍，不如用leg warmer去代替襪、neck warmer去代替冷衫，就唔怕頸同腳會流汗散失熱能啦！
以上就係一啲冬日保暖方法，希望可以大家睇完之後，無論外出定留係室內都會暖笠笠啦~
About Post Author
