上一篇blog講到，兔仔島正式嘅名係「大久野島」，其實仲有另一個名….就係毒！氣！島！吓？
毒氣島？唔係呱…毒氣同可愛嘅兔仔大欖都扯唔埋喎！點解會咁嘅？會唔會有危險㗎？
（講故佬語氣）話說呢…二戰期間，大久野島因為地理環境方便軍隊匿藏，而被日軍選擇作為生產化學武器嘅地點，其中生產嘅毒氣分為四類：芥子毒氣、路易斯毒氣、胡椒氣體及催淚氣體。由於涉及軍事機密，當時日陸軍發行嘅日本地圖上隱匿大久野島，將所在位置繪成空白一片，所以又有「從地圖上消失的島」之稱。（資料來源：維基百科，想知多啲大久野島歷史可以睇呢度）
戰爭結束之後，大久野島長時間都係一個無人島，一個居民都冇。至於點解會由冷冰冰嘅毒氣島演變成今日萌爆兔仔島呢？坊間流傳唔同說法，有人話，本來實驗用嘅兔仔係實驗室走咗出嚟….亦有人話係由幾個學生帶咗幾隻兔仔上島放養，由於島上溫暖舒適又冇天敵，慢慢由幾隻兔仔變成今日嘅兔仔大家族喇，係1934年仲被指定為瀨戶內海國立公園添。
今時今日，島上仍然冇任何居民居住，不過就多咗一個小小嘅渡假村，渡假村入面有得浸溫泉、食自助餐同租單車環島遊添，所以除咗外國遊客之外，大久野島仲係唔少日本人嘅渡假勝地添。
靜靜雞話你知，香港自從上年10月開始，就有廉航直飛去廣島，仲時不時做優惠，尋晚嘅$98機票優惠，計埋來回連稅都係$5XX，真係去食個拉麵都抵！
係時候教下點去大久野島，無論由市中心定係機場出發，都要轉車同船去到。聽到要搭船驚暈船浪？唔洗擔心！因為船程好定，加上眨下眼就到，唔會出現暈船浪嘅情況。我當日由「廣島駅」出發，用咗大約兩個幾鐘去到大久野島，由於吳線普通車班次唔多，所以建議出發前check清楚班次（可以google map或者用download《乗換案內》App ，咁就可以慳返等車嘅時間。
《乗換案內》App
心水清嘅你，應該留意到車程來回差唔到用咗4、5個鐘，所以我建議可以係大久野島住一晚，relax下，即日來回實在太辛苦喇！渡假村住宿可以睇呢度，每人都係$660晚左右，有自助餐又有溫泉。
由廣島站去到忠海站大約1小時40分鐘，沿途都有好多觀光景點㗎，不過我哋今日目的地係兔仔島！
依家會講吓由廣島市中心／同廣島機場出發兩條路線。
1. 由廣島市中心出發（約2小時）
山陽線 吳線 徒步 渡輪
《廣島駅》⇒ 《三原駅》 ⇒ 《忠海駅》 ⇒ 《忠海港》 ⇒ 《大久野島港》
2. 由廣島空港出發（約1小時）（前往大久野島的尾班船係19:25）
巴士 吳線 徒步 渡輪
《廣島空港》 ⇒ 《竹原駅》 ⇒ 《忠海駅》 ⇒ 《忠海港》 ⇒ 《大久野島港》
到達忠海駅之後，出咗車站然後向右一路直行。
行大約5分鐘，會見到分岔口，轉左係去超級市場，轉右係去碼頭。
係分岔口轉左直行3分鐘左右就到超級市場，可以買蔬菜俾兔仔食。
超市門口提供免費蔬菜，可以拎少少去島上餵兔仔，但我唔好意思拎太多，所以俾錢買咗成個足球咁大嘅菜，其實都只係98Yen。（提提你：島上冇任何兔糧買，所以最好買多啲入去！佢地認食物唔認人，同埋食極都好似好餓咁）
買完就去碼頭買船飛搭船喇
《忠海港》 ⇔ 《大久野島港》時間表（平均每個鐘有2-3班船，都算幾密）
之後就係售票機買船飛，有哂圖示肯定唔會買錯（來回620Yen)
售票機隔離有兔仔糧賣，細細包比較貴（100Yen／包）
船程12分鐘，轉眼就到
有成班兔仔接船
咁大個囡都未試過見到咁多兔仔
渡假村會有巴士接你去酒店check-in先，就算冇訂住宿嘅朋友一樣可以搭順風車，因為渡假村門口係最多兔仔出沒嘅地方
經過我2日1夜嘅觀察，到底點先可以吸引大量兔仔？原來唔係紅蘿蔔！亦唔係蔬菜！而係大大包兔糧！睇下張相就知，個女仔灑一大堆兔糧落地，所有兔仔都會圍埋嚟！可憐嘅我企係側邊俾兔仔冷落………..
下次會醒目！買大大包入去！哈哈哈…我仲唔做兔神？
你睇佢哋食到圍咗一個圓圈幾得意！
如果你book咗渡假村住宿，可以免費踩兩個鐘頭單車，環島遊（另外有電動單車可以租）
踩單車不忙帶菜餵兔仔，我將啲菜撕碎哂，方便啲餵
可能係冬天嘅關係，島上好少遊客，沿途得自己一個，所以見到荒廢咗嘅實驗室、毒氣室，感覺有啲可怕
但去到邊都有兔仔，可怕嘅感覺好快就消失
佢哋好搞笑，離遠聽到有單車聲，就會迎面跑過嚟，冧死人
風和日麗，加上可愛兔仔，心情好舒暢
自助晚餐，大久野島真係好少遊客，可以話係渡假嘅好地方
食物種類好多
有機蔬菜沙律
食飽飯忍唔住又出去探兔仔！兔仔主要係夜間活動，所以佢哋夜晚會活躍好多㗎！
探完兔仔就去咗浸溫泉，之後就休息喇
一早瞓醒就去食自助早餐，又係好多選擇！飯團係新鮮即製，好好味！
睇完咁豐富嘅行程係咪好想即刻出發去兔仔島呢？不過有幾樣嘢要提提你，去到兔仔島有啲規則要遵守，做個可愛嘅旅客啊！
1.唔好企圖或意圖抱起兔仔、唔好追趕或者嚇佢哋（因為兔仔好細膽）
2.唔好係馬路上同兔仔互動
3.因為兔仔牙齒同爪都好利，所以餵兔仔時要小心，建議將兔糧放在地下餵
4.除咗蔬菜同兔糧之外，唔好俾人嘅食物兔仔食（最好上網查消楚兔仔有咩唔食得）
5.唔好亂丟垃圾
6.唔好帶兔子入島或者出島
7.唔好任何寵物
送禮物時間
今次送疑似「嘰嘰兵」面罩，想要就快啲登入然後按「分享博客文章」拎禮物喇！
1. 讚好LikeJapan Facebook專頁
2. 註冊成為LikeJapan網站會員
3.瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁
＊如有任何爭議，LikeJapan將保留最終決定權。
About Post Author
