日本最大型電子室內遊樂場-JOYPOLIS 好似去左未來世界咁！

細個成日睇叮噹…唔係，應該係多啦A夢！多啦A夢個故事裡面成日形容未來世界有幾先進有幾發達，相信唔少人都對未來世界曾經有過不少幻想。到底未來世界會係點樣樣既呢?係JOYPOLIS呢度，我好似搵到個種感覺同埋填補左我嘅想像。

JOYPOLIS係一個三層式大型電子室內遊樂場，由日本出名既電子遊戲公司SEGA所開發。佢既位置就係台場，交通方面，搭百合海鷗號到台場海濱公園站就會有指示嫁啦!站口一出行過去都只係5分鐘左右~係一個叫DECKS既商場裡面~

話說黎左東京大半個月，帶過黎既錢差唔多洗晒！所以今日去JOYPOLIS之前，我哋要先去撳錢！

因為實際上差不多所有7-Eleven店內的ATM從早到晚都能提取日圓。對一對具有同樣標誌的銀行卡就可以了！

呢張大新YOU Banking 提款卡只要係香港櫃員機或者大新網上e-Banking開通左海外提款，就可以係海外ATM撳錢！咁就唔使拎住太多現金啦！

另外一提，呢張大新卡仲有八達通功能且可自動增值，番香港搭車番屋企唔驚無散子，每次自動增值仲可以賺YOU Points添。去旅行一卡盡享理財消費便利！詳情：http://www.likejapan.com/dsbyou及 http://www.likejapan.com/appcard

國際發行卡提款金額上限為單卡單筆5萬日圓。

就好似平時香港撳錢咁，搞掂！

出發！！！係入去之前，影一影個門口先！

佢票價分為幾種，如果只係入場未計任何遊樂設施成人價係800YEN，而入場連無限玩機動遊戲就係4300YEN，如果5點鐘後先入園就係3300YEN。呢間遊樂場10點先關門，所以即使5點進場亦夠時間玩，當然如果玩足全日就可以唔洗咁急慢慢ENJOY曬成個PARK啦~另外佢亦有設外國人優惠，出示護照的話入場連無限玩機動遊戲係4000YEN。不過我就建議大家係去之前上一上佢地既官網做功課先~因為佢地既網上優惠其實先係最抵！就好似同台場大江戶溫泉物語合作嘅一日通票，去曬兩個場地都只係5200YEN！而扣除大江戶溫泉物語嘅入場費JOYPOLIS嘅收費就只係2600YEN！抵玩程度突破天際!(*大江戶溫泉物語係一間好出名嘅溫泉連鎖式娛樂設施，一個字形容:正！)不定期更新優惠網址如下：

http://tokyo-joypolis.com/ticket/profitable.html

好！講完入場費，終於正式入場玩~

入到尼嘅感覺就完全係一個未來電子世界!雖然佢唔算好大，但係就有好多科技化嘅娛樂設施，透過設計同科技填補返空間不足嘅問題。講真，呢個設計完全令人無法想像係一個已建二十年嘅遊樂場！

職員哥哥全程好細心咁同我地介紹左好多出名同特別嘅遊戲設施。但由於我地嘅設定係唔識日文(因為講得太差唔想獻醜)所以佢好努力咁用少許英文同我地溝通，真係好欣賞日本人永不放棄嘅精神，就算講得唔太清楚都會好努力用身體語言補救。

一開始職員帶左我地去三樓玩一個叫做WILDRIVER嘅機動遊戲。佢係坐係一個大橡皮艇裡面，透過3D片段同埋一啲灑水，急撞等等令玩家好似親歷係森林河流之裡咁。過程大約五至十分鐘左右，但裡面嘅情節都幾精彩，再加上4D嘅真實急撞加速等等，真係令人有種係森林歷險嘅感覺！下面係遊戲設施裡面影嘅相係經過職員授權，大家玩嘅時候千祈唔好影相呀！影響到自己投入去玩之餘又可能會影響到其他玩家~

整體尼講: 驚險度:3/ 5 有趣度:4/ 5 不可不玩度:4.5 /5

接住落尼當職員想介紹我地去另一個遊樂設施嘅時候俾我發現….

OH MY GOD!竟然係我最愛嘅逆轉裁判!!!!!!成步堂的律師事務所！相信如果細個有玩過GBA摸擬器／NDS嘅朋友無可能唔認識呢個咁經典嘅推理遊戲！最近仲動畫化左！筆者都曾經將佢個系列玩過最少3次，什至COS過呢套作品嘅角色嫁…係邊個緊係唔話你知啦~

個一刻真係好想好想大叫一聲異議令職員停低，不顧一切咁衝入去。但基於採訪時間有限，再加上解謎遊戲需要一定時間…所以…成步堂君再見啦:_:

(當日成步堂出門中，得返御劍君)

依依不捨完之後，去到左一個都係係三樓叫做Fortune forest 既遊樂設施，呢個主要係一個大型心理分析遊戲，佢仲好細心咁有中，英，日三個版本，個結果都好詳細下嫁!不過如過同朋友一齊玩就唔好按錯戀愛運啦，因為佢會自動配對左你同一齊玩嘅朋友。筆者當日就係犯左呢個錯誤，不過都證明我同JOY夾得尼，所以一直旅行順利~當然，如過想偷偷配對…當我無講過啦~

不過佢嘅缺點係要輸入大量資料同埋都LOAD得幾慢，亦要答好多問題。所以如果晚間PASS嘅朋友或者對心理測驗無咩興趣嘅朋友就唔建議玩啦~筆者個日都整左半粒鐘有多。

驚險度:0/ 5 有趣度:2/ 5 不可不玩度:2/5

接住向下落一層，就尼到呢個同超音鼠玩競技嘅遊戲。因為佢主要係講一個運動會，所以所以遊戲都會係跑步機上進行。遊戲一共有三回合，分別係100米短跑﹑跳遠同埋跨欄。可惜筆者因為第一回合了解唔到點玩，拎最尾，結果即使後兩個回合第三都追唔返。呢個遊戲嘅攻略法就係:隻腳向後跑，不停向後跑先有反應。相反如果向前就會咩都感應唔到

驚險度:1/ 5 有趣度:3.5/ 5 不可不玩度:3/5

然後去到呢個STORM-G，係一個會不停360度回轉嘅賽車遊戲。遊戲二人一組，係開始之前要睇堆幾複雜嘅操作指引。不過好在如果睇唔明都有英文版~

呢個遊戲真係唔講得笑！左轉右轉不在話下，如果你想加到最快速度就要兩個制一齊按，咁就會360度迴轉!果然想嬴就要付出，結果我地不停按迴轉制360度左好幾次之後終於拎到第一。但其實咁轉法都幾係野嫁，怕暈嘅朋友千祈唔好亂試。玩下賽車咁向左右轉加速咁都夠好玩嫁啦。

驚險度:4.5/ 5 有趣度:4/ 5 不可不玩度:4.5 /5

落到最底層，職員同我地介紹左最新嘅音樂過山車遊戲。職員話呢個係全世界第一個結合左音樂拍子遊戲嘅過山車，係7月先開始開放嫁!筆者望到上面不停轉尼轉去嘅過山車忍唔住心諗…咁點分到心玩音GAME呀?唔試唔清楚。即刻試下先！

佢每個座位都有代表唔同顏色，玩個時記得睇清楚自己咩顏色呀!好似按左人地嘅無分嫁~

因為裡面係過山車所以就唔方便影相啦~但原來裡面係過山車同音GAME部份分開嘅~(好在~)佢中間會有幾個CHECKPOINT進行音GAME。當音GAME進行時過山車會慢駛~唔怕集中唔到精神。過山車都幾好玩。有離心力同埋架車會自轉，不過可能結合左音GAME令少左部份路程，再加上場地限制，所以路程有少少太短，但整體而言絕對值得一玩。

驚險度:4/ 5 有趣度:4/ 5 不可不玩度:4.5 /5

最後一個係站立式嘅海盜船，叫HALF PIPE。當去到中段平路位置時要求玩家腳踏地板得分。係一個音樂式節拍混合嘅海盜船。不過講真，佢除左會左右搖擺，玩家之間仲會自轉，要同時顧及腳踏真係有一定難度。而且玩完之後筆者同JOY都有少少頂唔順覺得好暈同想嘔，鍾意玩轉轉系同好有挑戰性嘅話就啱曬啦。但筆者應該唔會再玩多次…

驚險度:5/ 5 有趣度:3/ 5 不可不玩度:3 /5

本身正打算走嘅時候，職員突然同我地講話佢地下星期將會推出一個新嘅虛擬世界打喪屍遊戲，依家開放俾媒體試玩。好榮幸職員邀請左我地試玩，令我地有機會一試呢個實景打喪屍！呢個遊戲叫做ZERO LATENCY VR。入到去會有好詳細嘅說明，指揮軍會介紹依家生處背景同埋任務，要俾心機聽呀如果唔係玩嘅時侯真係連槍都唔識用就俾喪屍咬死。雖然咬死之後過一定時間可以復活，但最好就唔好浪費時間啦~打喪屍嘅裝備都幾重下，包括一個大背包，槍，耳機同埋眼罩。每次最多可以同時6個人一齊玩，大家可以透過耳機連咪SET通訊，共同合作令行動更有組織。聽落真係好似真嘅世界一樣!!!!可惜同我地一齊玩嘅記者完全唔明我地中文講咩，只好單人作戰。我地仲自己上左2樓等佢自生自滅，諗返都真係唔係幾好意思。玩嘅場地係一個都幾大嘅空間任玩家行走，戴上眼罩眼前即時變左廢棄工廠，真係好神奇過程中不停有喪屍撲埋尼，整到忍唔住不停大叫，經過一番屠殺，講真真係打到手都軟!但又真係超級好玩!佢仲好神奇咁有得上上一層，個感覺真係好似完全投進左另一個世界。絕對絕對要一玩!不過因為呢個遊戲每次都要半小時，所以暫時只接受預約制，有興趣嘅朋友可以上官網預約一試~筆者十分推薦！

驚險度:4/ 5 有趣度:5/ 5 不可不玩度:5/5