今年一月去咗廣島旅行，為咗方便去唔同景點，唔洗趕船又趕車，所以我選擇咗七晚住三個唔同地方，而呢三個都係唔同類型嘅住宿。
第一日夜晚六點幾先落機，出到廣島市區已經八點幾，天都黑哂，加埋落雪，一個女仔拎住大件行李真係好唔方便，好彩我頭兩晚我揀咗位於JR廣島站旁邊嘅「廣島喜來登飯店 (Sheraton Hiroshima Hotel)」，係機場搭45分鐘巴士直到，正正係酒店旁邊落車。
由於行幾步就係JR廣島站，去各個景點都好方便，一程車就到。
房價：約$800港幣一晚（酒店網站預訂）
酒店唔單止交通方便，間房仲出奇地大！打個跟斗都仲得啊！（日本酒店房通常細到連打開喼都有困難㗎嘛）
好乾淨好舒適！
lobby側邊有電腦可以用
第三日出發去大久野島住兩日一夜，我將個喼存放係酒店，揹咗個背囊就出發喇！
大久野島渡假村 – 日本國家公園度假村 (Kyukamura Ohkunoshima National Park Resort Villages of Japan)係大久野島上唯一的休閒、住宿設施
休暇村大久野島官網
房價：約$660港幣一晚（日本酒店網站預訂）
包含：早、晚餐自助餐、溫泉及兩小時單車租借服務
係忠海站搭10幾分鐘船就到大久野島，一到埗除咗有好多兔仔歡迎你之外，仲有渡假村嘅巴士接你去check-in。
大久野島渡假村外觀（此乃官方相片）
今次住嘅係日式房（如果唔鍾意訓塌塌米，可以揀西式房）
一望出去就見到好多兔仔
因為冬天所以啲草唔算太綠
成個房感覺好傳統
訓塌塌米，會有開床服務
廁所雖然細，但好乾淨
房冇沖涼房，所以要落去浴場，之後仲可以浸返個溫泉添！話說冬天真係好少人嚟，我夜晚9點去沖涼同浸溫泉，全程得自己一個，其實有少少驚…哈哈（此乃官方相片）
第三間住嘅係bnb民宿，行落通天商店街唔洗兩分鐘，去市區各個景點都非常方便！重點係價錢平過酒店好多，而且自己一個apartment，私隱度高，仲有埋廚房、洗衣機、微波爐等，直頭好似返咗屋企咁舒服。
當你係網站預訂咗房之後，民宿主人會主動聯絡你，好helpful。
房價：約350港幣一晚（酒店網站預訂）
非常乾淨、企理，張床係正常size，唔會好迫
有梳化、茶几，可以買消夜返去食（不過冇電視）
有哂所有基本家庭電器，有得洗衫真係一流！
有個爐仔，可以煮下嘢食
廁所好乾淨，另外有提供洗頭水、護髮素同沐浴露，但空間真係好細，沖涼轉身會有少少困難
唯一美中不足真係要搬行李行樓梯，拎25kg行兩層真係幾吃力！
分享哂三間唔同住宿，以上嘅房價都係一人價錢，如果你係兩個人一齊去，除開仲平！今次住宿，基本上每一間都好滿意，好啱我心水，但想特別同平時只係住開酒店嘅你哋講，下次考慮下住bnb，因為真係平好多，但質素一啲都唔差（記得睇下之前住過嘅人有咩comment），咁慳返嘅錢，就可以拎去玩拎去食喇！
送禮物時間
係日本見到有個盒星球朱古力好靚，即刻買咗返嚟做禮物，希望你哋鍾意喇！
1. 讚好LikeJapan Facebook專頁
2. 註冊成為LikeJapan網站會員
3.瀏覽此博客文章時，點選左方的「分享博客文章」以獲得分享連結
4. 會員可透過各大社交平台及討論區分享連結網址，LikeJapan會統計每條連結的點擊次數，會員也可於博客頁面左方查閱點擊排行榜。
5. 截止時間內的分享連結點擊次數愈多，獲獎機會愈大。如有會員的分享點擊數目相同，將根據系統紀錄最快達到該點擊次數的參加者得獎。
詳細玩法亦可參考此頁
＊如有任何爭議，LikeJapan將保留最終決定權。
About Post Author
