學習唔一定係得一個方式嘅～最近日本電視台就報導，有班學生每個月都打兩次牌，以輕鬆嘅方式去訓練腦力，估唔到對提升語文能力好有幫助！唔知打牌會唔會成為日本學生之間嘅新潮流呢？
打麻雀 提升閱讀理解能力！
最近news24電視節目中，介紹咗一間專門教授打麻將嘅學校，當中專為學生而設嘅「子供麻雀教室」引起唔少迴響！
呢間麻將學校成日都坐無虛席，十分受學生歡迎。被問到有關學習情況，唔少人都話自己最有信心嘅科目係「國語」，即係日文科！
節目中，中學2年級嘅松原利奈就話，做閱讀理解果陣，會思考主角當時嘅感情係點，而打麻將的時候，都會推測對手接下來有咩反應，所以覺得兩者嘅思考方式好接近。
有專家分析指，「打麻雀時腦部用最活躍嘅部位，同做閱讀理解、理解文章深層意義時，所用到嘅腦部部位一樣」。換言之，打麻雀可以理解為「腦部訓練」，學生定期打麻雀，可以期望日語嘅成續因而有所提升！
「子供麻雀教室」 開業已20年！
我地睇翻果間麻雀教室嘅官方網站，發現佢哋地搞「子供麻雀教室」，即係針對小朋友嘅課程，已經有近20年！
呢間ニューロン麻雀スクール位於東京五反田，除左成年人課程，仲有專為4至17歲學生開設嘅課堂，1997年已經開辦，現時有約900名會員，全國各地都有唔少分校！
佢哋提及打麻將對學習嘅益處，就指麻雀包括解難、概率、心理戰等各種元素，可以當作「情操教育」，訓練學童心理質素、決斷力、分析力、忍耐力、禮儀等。
雖然係咁，學校卻唔會強逼學生經常去打麻將，而係選擇以一個月兩次嘅方式訓練，間中搞下比賽！聽落好似係幾輕鬆嘅上堂方式，唔會為學生帶來太大負擔，幾有益嘅課外活動咁！
其實打麻雀要利用有限情報去觀察對方，留意自己同人地打出去嘅牌，從對方嘅表情、手勢讀取情報，一向都被認為訓練腦力嘅好活動！
唔知由細打牌打到大嘅香港人，又覺得打牌有無提升到自己嘅閱讀理解能力，又或者提升咗語文成續呢？（笑）
圖片來源：ニューロン麻雀スクール、news24
About Post Author
