大家好，今次介紹一下位於灣仔一間新開嘅沾麵店，風雲丸
一入去就俾佢個裝修吸引咗，裝修以漁船作為設計概念，兩幅牆掛住人手畫嘅畫，用色非常日本feel~
呢間店嘅沾麵有3款湯底選擇，有原味濃厚魚介豚骨湯、咖哩濃厚魚介豚骨湯同辛肉爆彈濃厚魚介豚骨湯。
湯底由兩種豚骨湯混合而成，一種為豚骨及雞骨熬成，一種係用100％碎豚骨熬成嘅特濃豚骨湯。而湯底嘅靈魂係現場即磨嘅日本上乘魚介粉，魚介粉係風乾咗4日至一星期，魚味特濃。
麵都有2種選擇，冷麵同溫麵。冷麵彈牙，口感非常好；溫麵有陣陣麥香，非常香口
另外麵有4種份量選擇，並盛、大盛、特盛同一價錢，富士山盛800g就加＄45
原味石燒濃厚魚介味玉沾麵 ＄93
一入口係濃濃嘅豬骨湯，之後會散發出新鮮魚介甜味，湯底真係好濃好味～塊肉好厚但唔硬，香口有肉汁～
辛肉爆彈野菜豚骨魚介沾麵 ＄108
辣味湯啲菜吸哂湯嘅精華，好好味！但係我唔係好食得辣，所以覺得佢好辣，食得辣嘅朋友一定會好鍾意！
呢間沾麵有四種食法～第一種就係普通沾湯食，第二種食法係加檸檬汁～
個湯咁濃，通常食到一半都開始有d 膩，只要加一加檸檬汁，令個湯有少少酸味，即刻清新哂，開哂胃！
食完仲有個湯，第三種食法係加入魚介水，作湯飲用。
最後一個食法係加入肉鬆飯變成雜炊
因為個湯預熱三百度先上枱，食到最尾都仲係熱㗎～！
另外，佢啲小食都好出色～炸雞一上枱就聞到超香，外脆內軟，肉汁多
沙拉唐揚炸雞＄38／5pcs
辛口沙拉羽根餃子 ＄38／5pcs
上面有辣油、蛋黃醬同蔥，辣油都幾辣下，塊皮超脆～
最後食飽食埋個雪糕先～
雪糕全部日本入口，勁在意呢個米味到底係咩味～
佢好似雲呢拿雪糕，但有一粒粒米，有咬口～有少少似西米咁～幾得意
呢個柚子雪芭真係好味～好清新柚子味，食完拉麵食呢個超滿足～
雪糕各款＄28
詳細：
風雲丸
地址：灣仔軒尼詩314-324號W Square地下B舖
電話：3188 1472
營業時間：星期日至四11:00am至11:00pm
星期五、六及公眾假期前夕11:00am至12:30am
About Post Author
