香港搭車就嚴禁飲食，但其實日本電車係允許飲嘢食嘢嘅！不過，到底日本人嘅底線係乜？喺電車係咪真係乜都飲得食得？日本網站マイナビ就調查咗200個女大學生問佢哋到底接受到啲咩喎。睇下結果先：
第1位 飲品、糖果等小份量嘅小食就得 65人（32.5％）
第2位 飲品、飯糰等輕食 54人（27.0％）
第3位 只限樽裝飲品 47人（23.5％）
第4位 只要係飲品就乜都得 14人（ 7.0％）
第5位 食乜都得 7人（ 3.5%）
結果顯示，真係覺得食乜都得嘅只有7個人咋！大部分學生都接受到小食、糖果、小蛋糕同飲品。雖然唔入榜，不過都有少數人係覺得根本唔應該食嘢喎！到底佢哋嘅意見係點？
其實佢哋嘅評審準則好多都係圍繞：只要唔帶麻煩畀人／只要唔會有好大陣味令人困擾就得，果然係標準日本人思想呀！選擇「飲品、糖果等小份量嘅小食就得」嘅大學生就話呢個程度嘅嘢食既不會影響人、食完都唔會話好污糟同好大陣味，所以冇乜問題喎。另外，有啲人就覺得只要係單手食到嘅嘢就ok，所以飯糰同三文治係合格嘅，始終真係好趕時間嘅人都要食嘢架嘛！
不過始終有啲人就接受唔到，話搭電車嘅時候唔想隔離嗰個係食緊嘢、同埋覺得喺電車食嘢好失禮喎！
總括而言，大部分嘅女學生就話只要有基本禮貌同常識，同埋最好唔好喺滿員電車上食嘢就得～大家去旅行嘅時候可以用呢個準則參考下！
資料來源：マイナビ学生の窓口調べ
About Post Author
