京都景靚係人都知，除咗靠對腳，大家又有冇試過踩單車四圍遊呢？以單車代步，可以慳返唔少時間同體力，時間多咗自然可以去更遠，鍾意踩去邊就去邊，喺香港，邊有呢啲機會！
為咗令一眾Like Japan讀者一睇就明今次單車遊係咩玩法，我地就由最重要嘅租車開始講起！
1. Rent a cycle EMUSICA
呢間叫做「EMUSICA」嘅租車店喺巷仔入面，不過交通就好方便，由阪急河原町站或京阪祇園四条站行過去都只係5分鐘倒路程，勁近！唔好睇呢間店好似舖仔細細，店內外加埋有成50架車。
小編當日朝早10點半左右去到，見到除咗店外嗰幾架單車，店入面仲掛住幾十部單車，好誇張！最重要係呢度店主識講英文同勁Nice，全程用英文解釋踩單車嗰陣有咩要注意，好貼心！
間舖好易認，就算唔記得個名，遠遠都會見到啲單車。成條巷都係得呢度有單車，實係呢度啦！
門口有塊黑板，所有價錢都好清晰咁用日文同英文寫哂出嚟，如果係一日遊，租朝早9點到夜晚8點個時段都已經夠哂，玩足成日都只係¥500，兌返港幣$35都唔使，係咪勁抵呢！
一行入間舖眼珠差啲飛出嚟！估唔到間舖細細地原來入面放咗咁多單車！
交咗個Passport畀店主搞租車手續嘅同時，大家不妨參觀吓間舖，會有唔少驚喜，好似喺牆上面就夾咗好多唔同種類嘅旅遊資訊。
店主有玩樂隊，喺counter隔離一整個架都放咗自己嘅作品，勁型。
如果你係拖住件行李嚟都唔使怕，呢度¥300就可以幫你keep一日。
好喇，等咗一陣店主就拎咗份野出嚟叫客人簽名，左邊嗰份係英文版使用守則，簽名之前大家可以望一望。記得記得要keep好張收據，唔見咗就冇得攞返每部車¥2,000嘅按金㗎啦。
搞掂哂所有野就緊係準備出去試車啦！一路試店主會好貼心咁問你會唔會Too High，唔係問你個人，係問你個Seat位。每架單車都好可愛地有各自嘅名，咁就算同朋友撞正同款同色都認得邊架車係自己嘅，小編當日嘅愛車叫「up」，一齊冇問題就可以出發！
如果唔知單車應該泊邊好可以參考以下網站，入面好詳細咁寫哂邊度有單車停車場。
Rent a cycle EMUSICA 四条河原町店
地址：京都府京都市下京区斎藤町140-9
電話：050-1035-5316
營業時間：09:00~22:00
休息：無
2. 八坂神社
由於今次主題係輕鬆漫遊，所以去嘅景點唔會好多，我地首先就去咗八坂神社，單車可以泊喺隔離高台寺停車場。
呢度可以話係河原町一帶地標，第一次嚟的話一定要入去參觀吓。八坂神社已經有超過1,300年歷史，日本三大祭之一嘅「祇園祭」就係由八坂神社舉辦。如果想慢慢行哂成個神社範圍，最好預返個零兩個鐘，又要祈福又要求籤又要買御守同影靚相，樣樣都唔急得㗎嘛～
行入神社都唔夠10秒就已經畀呢檔蟹肉棒吸引咗過去！（店面寫明唔畀影相，真係想影嚟留念的話請同小編一樣，影之前禮貌地再問清楚老闆係咪得先）
舖面有大大個牌寫住呢支蟹肉棒加咗魚肉一齊整，所以食嗰陣已經知道應該會有啲魚蛋feel有少少彈牙。
呢幾支一味粉、七味粉、椒鹽同蛋黃醬都係提味精髓，所以記得一定一定要落！
喺行去本殿途中有唔少檔仔賣小型商品，雖然得幾檔，不過檔檔都各有特色，要認真行30分鐘應該走唔甩！
呢一個小檔都令小編停留咗唔少時間，佢賣嘅係生日Postcard，每一日嘅款式都唔一樣，上面寫住同日嘅代表花名稱、代表花嘅花語、花語嘅意思，仲有代表花個樣，買嚟寄返去送畀朋友超特別！
行哂啲檔仔沿住條路行，就會見到呢個可以求籤同買御守嘅地方。
呢度每張枱都放咗幾個籤筒，可以求一般運程同戀愛運，搖到有支籤跌出嚟為上，不過唔使夾硬抆支籤出嚟，只要準備¥200同記住支籤係幾號，行過去counter話畀工作人員聽就得。
求籤嘅左前方就係「舞殿」。
喺「舞殿」嘅左前方就係「本殿」，感覺都幾宏偉莊嚴，一場嚟到不妨過去許個願。
八坂神社
地址：京都府京都市東山区祇園町北側625番地
電話：075－561－6155
3. 四条通祇園商店街
喺去八坂神社途中，大家應該都會發現有勁多各類型店舖，不過建議大家忍一忍，參觀完八坂神社先慢慢行，一來時間易掌握啲，二來行完呢條街有99％都會一袋二袋，拎住咁多野點祈福！
無論係手信、藥妝、美食定甜品，喺四条通祇園商店街通通都搵得到，冇返三兩個鐘都唔好諗住會行得完，而呢度亦係掃手信好地方，特色擺設精美到樣樣都想帶返香港！
呢間「志滿もと」開業於昭和11年，全店都放滿唔同款式嘅特色菓子同小精品，想一次過買手信返香港送畀人，呢度啱哂！
志満もと
地址：京都府京都市東山区祇園町南側566-2
電話：075-561-2550
營業時間：10:00-20:00
休息：無
呢間「ドロボーや のレン」大部份Product都加入咗和風元素，好可愛！如果大家行到攰，亦可以嚟呢度按吓腳，一試京都式按摩，30分鐘¥3,300左右。
ドロボーや のレン
地址：京都府京都市東山区祇園町南側582
電話：075-551-9388
營業時間：10:00-21:00
休息：無
成條街有勁多美食誘惑，間間都好似好好食，如果決定唔到食邊間好，不妨買幾間外賣拎走，反正我地有單車，可以慢慢搵個有靚景又靜靜地嘅地方慢慢歎！好似喺呢間「いづ重」就可以買到鯖姿壽司，屬於京都名物，所以記得買返條先好行！
いづ重
地址：京都府京都市東山区祇園町北側292-1
電話：075-561-0019
營業時間：10:00-19:00
休息：星期三
4. 河原町河邊
嚟到河原町又點可以唔去河邊行吓！因為四条通比較多人，又要行街又要拎住單車好唔方便，所以建議大家同我地一樣行完街先去攞返架車。過咗四条大橋就可以左轉，一路直踩5分鐘左右，就會見到進入河邊嘅入口，入到去就可以搵個靚位慢慢享受美景同午餐啦！
留意吓圖嘅左邊，入口處有一個奇怪形狀嘅欄杆，急彎設計迫大家一定要落地推車，不過都啱嘅，如果唔係一左轉踩快少少一個唔小人就會衝咗落河。
到啦！係咪好好Feel呢！呢度人唔多，大把位畀你慢慢揀，要親親大自然就緊係唔住櫈坐河邊啦！坐低安頓好就可以拎頭先買嘅外賣壽司出嚟慢慢食，坐喺河邊附近又冇乜人，真係好舒服（怕凍的話記得買杯熱飲帶過去）！
講開又講，如果夏天嚟呢度，食野會多個選擇，就係沿岸餐廳提供嘅河床料理，客人可以坐喺露台邊欣賞河景邊品嚐美食，不過因為冬天太凍太大風，露台座位唔開放。
食完野可以喺岸邊踩吓單車，香港冇咩機會可以喺正河邊踩單車，環境勁舒服！
小編今次仲突登帶埋Casio自拍神器EX-FR100嚟玩，有咩好玩呢度唔多講，有興趣就click入去條link睇吓啦～
5. 先斗町
日本一到冬天就好快天黑，6點幾就已經黑到好似深夜咁，所以為咗安全計，我地踩到5點倒就出發去覓食喇。先斗町係一條聚集咗超多唔同美食嘅巷仔，越夜越精彩，識食就緊係捐入去慢慢搵美食啦！經過九曲十三彎，我地終於搵到無論係日本國內定國外都人氣都居高不下嘅「キチ・キチ」啦！
店入面counter位連order枱位加埋就得16個座位，所以要試呢度嘅蛋包飯一定一定一定要book位，呢度從來冇Walk-in呢回事。
坐counter位正在可以睇住老闆拋獲，好似玩緊雜技咁，兩三下手勢就已經整好個飯！
個飯底加咗雞肉、洋蔥等等好多唔同配料去炒，每一粒飯嘅色澤都好均勻，熱辣辣勁香，個奄列蛋未到差啲就忍唔住想偷偷地舀啖飯食。
極期待嘅神聖一刻嚟啦！個蛋一倒上個飯度嗰陣睇佢震騰騰就知入面一定係勁滑嫩蛋，喺現場睇佢?開嗰吓，真係差啲唔少心口水都流埋出嚟！
最後淋埋特製醬汁上去就大功告成！嘩真係好好味，啖啖都食都豐富材料，唔怪得咁多人爭住嚟食啦！個蛋包飯都幾大份，女仔怕食唔哂的話可以叫Half Size。
ザ・洋食屋 キチキチ
地址：京都府京都市中京区材木町185-4
電話：075-211-1484
營業時間：17:00-21:00
休息：不定休
食完飯可能都只係6點幾7點，但因為出面已經黑哂嘅關係，大家可以先踩返去還車先，還車之後可以出返四条通食個甜品或散吓步，京都氣氛咁舒服，唔慢慢行吓真係好浪費。
最後長氣都要提多一次，京都有啲地方係唔可以踩單車嘅（就算少人都唔得），出發前請再查清楚途經路段嘅單車通行規則，安全玩，安全返～
About Post Author
