[日本在香港] 於香港取景嘅《戀愛香港》已經劇終！自從劇集播出，日本網民對於香港嘅討論增加，唔少人對於廣東話、茶餐廳文化，以及香港獨有嘅夜景都好有興趣，表示睇完好想嚟旅行！雖然只有短短4集，《戀愛香港》對香港都算有正面嘅宣傳效果！
日本網民評價
《戀愛香港》未必完全反映到香港嘅真寶面貌，但至少有嘗試融入香港特色，拍出香港獨有嘅懷舊感。相信大家都會好奇，到底日本人望到劇中嘅香港，會有咩反應？我地喺Twitter搵出有關《戀愛香港》嘅討論，將4集嘅有關comment總結，大致可分為以下兩類：
關於香港：
劇集中出現嘅香港好靚，街道富有特色，有懷舊嘅茶餐廳、小攤販，同時又有時尚嘅高樓大廈，網民都話感受到一般獨特嘅文化。好多人睇完都好奇，到底劇組去咗邊度取景，想下次嚟香港都跟住去！
而劇中嘅角色Daniel（永田薰）係一名香港人，由日本人講嘅廣東話對白，網民都指發音好搞笑！有人就表示，想學下講廣東話，尤其係常去地方嘅地名正確發音。
關於劇情：
對於《戀愛香港》嘅劇情，網民反應就幾兩極化。
有人話劇集進展好慢，每一集以唔同人物視點去講述事件，每集重覆嘅劇情太多，覺得好煩。劇集嘅完結方法亦令人好在意，睇完都唔明《戀愛香港》想講咩。
另一方面，有人就話劇情發展撲朔迷離，雖然進展係慢咗啲，但愈睇愈發現劇集有好多伏線，其實都幾有趣，有種「原來如此」嘅感覺。
主角們對香港的感想！
小池榮子同吉澤亮早前接受電視採訪，提到對於香港嘅印象都不錯！
小池榮子就話，覺得香港人都好精力充沛，感受到城市嘅活力。佢提到自己休息時間，有去尖沙咀做腳底按摩，仲有去酒店附近飲茶，過得好充實！
而吉澤亮就對於香港街道印象好深，覺得建築物好高、招牌燈光好璀璨、整體燈光好華麗，無論用咩角度影，都好似成幅畫咁！佢亦對路人手拎嘅「風扇仔」好有興趣，話日本雖然都有同類product，但香港嘅風力強得多，所以劇組都有買翻去做手信！
取景地方 劇組愛去打卡熱點拍攝！
南山村、石板街、彩虹村等地方，本來已經係香港人嘅打卡熱點，劇集播出後，更紅到日本！相信日後會有更多日本遊客，嚟香港旅行時去影相打卡喇！
石峽尾南山村
劇中，馬場富美加同最上Moga去到石硤尾南山村，坐喺彩虹橋上回憶往事。
中環石板街
露天街市
旺角行人專用區
劇情講述製作組嚟香港拍特輯，所以有去到旺角食街頭小食，仲有試食臭豆腐㖭！
圖片來源：馬場富美加Instagram、戀愛香港Twitter、戀愛香港OP截圖
About Post Author
