日本咖喱真係好味到食極都唔會厭，唔好以為咖喱就只有一種味道，當中唔同嘅食材、調味都會令到咖喱嘅味道變得非常唔一樣！唔信？即管去位於蔵前嘅「咖喱大使館」走返轉，唔單止味蕾大滿足，簡直係大開眼界！
就係呢間自稱係隸屬咖喱王角嘅大使館！與其話佢係大使館，其實呢度係一間集合咗來自日本各地多達100款唔同即食咖喱嘅餐廳。
只要畀¥1,000左右就可以以Buffet形式食到名店嘅咖喱、大使館自家製嘅原創咖喱同埋當日精選嘅地方咖哩，單單係呢3種咖喱就已經夠你慢慢享受！
想試埋一盒盒嘅即食咖喱的話，只需要付費購買咖喱，大使館就會幫你即場將咖喱加熱，勁方便，試完覺得好味可以即刻掃多幾盒做手信！如果自問唔係大胃王，建議大家唔一定要選擇¥1,000嘅Buffet Menu，因為揀好即食咖喱之後只要加¥480，大使館一樣會幫你加熱，仲會奉上熱辣辣嘅白飯！
呢度有一點好貼心，就係考慮到可能有啲人會覺得齋食咖哩會口寡寡，所以容許客人自攜小食上嚟加料！有興趣可以去附近便利店買兩件炸雞同可樂餅，極力推介大家最少最少都要帶隻溫泉蛋上去！
見到有成過百種咖喱係咪有啲唔識點揀呢？如果你識日文，不妨問吓大使有咩好野推介，隨時會試到超市見都未見過嘅罕見款式！
好似以下呢4款，莫講話食，見過都要畀個叻你！
1. 雪室和牛牛筋咖喱 ¥840
使用咗雪室嘅熟成和牛炮製，牛筋已經煮到半溶狀態，一入口和牛嘅肉香直接衝擊味蕾，香濃嘅程度係如果同你講呢碟咖喱由尋日開始熬，熬到而家你都一定信！
溫泉蛋係時候出場！配合咁香濃嘅咖喱，一舀起已經知道一定好食！
2. 野菜香菇咖喱 ¥800
咖喱一上枱已經嘩咗出嚟，幾時見過包裝即食咖喱會有大大隻冬菇喺入面！一放入口，椎茸嘅香味已經佔據所有，加埋勁入味嘅野菜同辣辣地嘅咖喱汁，用嘅撈飯真係超正！
3. 薯仔咖喱 ¥648
對呢個咖喱嘅印象係超多料！除咗有薯仔之外仲有一大堆野菜，咖喱汁比起上面嗰兩個相對地冇咁杰身，住家得嚟又帶有少少田園氣息，好味！
4. 山椒咖喱 ¥648
用咗和歌山縣產嘅胡椒同香料製作，有濃濃嘅胡椒味，有少少似食緊泰式咖喱嘅感覺，好容易一啖接一啖地食到上咗癮！
由於呢個咖喱相對地冇乜配菜，所以自攜嘅小食就大派用場喇！炸雞配呢個咖喱一啲違和感都冇！
唔止呢4款，大使館入面仲有大量非常有特色嘅地方咖喱，就算係買返香港自己獨食定用嚟做手信都非常特別，唔買多幾包一定會後悔！
カレー大使館
地址：東京都台東区浅草橋3-20-11 2階
電話：3-5820-5640
營業時間：11:00～15:00、17:00～20:00
官網：www.facebook.com/curryembassy
About Post Author
