上星期帶大家賞完花，今個星期就同大家嚟一個「海洋生態遊」，睇下紋別市入面有咩玩啦。
係呢度，你可以排足一日嘅行程，總共有四個景點可以參觀，而且點與點之間唔算好遠，如果你腳骨力好嘅話，真係行都可以行到，夠晒方便。
1）流冰科學中心
▼第一站去到嘅就係「流冰科學中心」啦！呢度其實同科學館差唔多，除咗有展覽仲會有遊戲體驗等等。不過主題當然係圍繞番佢地特色嘅「浮冰」同「海洋生物」啦。
▼一入去就見到紋別嘅吉祥物「紋太」迎接你，佢係成個行程入面，真係無處不在㗎![快閃北海道紋別之旅（二）海洋生態遊]()
▼係呢度你可以體驗零下20度嘅滋味。入去之前佢會俾頂帽同件大褸你著，仲有一條濕嘅手巾仔俾你拎入去。
▼入面展出咗好多唔同嘅「冰鎮」花卉同海洋生物，全部都係實物嚟㗎。
▼不過即使係零下負20度，冰塊依然會有輕微嘅融化跡象。好似呢條魚咁，就因為冰塊融化而露出表層。
▼仲有一隻隻嘅「冰鎮蟹」。有一刻係度幻想如果舊冰融咗唔知佢地會唔會即刻逃走呢？![快閃北海道紋別之旅（二）海洋生態遊]()
▼轉到另一個場地，佢問咗我地一個問題：「到底肥皂泡係零下20度會唔會結冰呢？」。之後工作人員就會吹出泡泡，然後數5秒。你睇下！泡泡真係可以定住係你嘅衫上面㗎，我地就好似小朋友咁「嘩嘩」聲。
▼完成呢個嚴寒體驗，梗係要影番張相證明下啦。其實呢塊就係入場前俾我地嘅手巾仔，已經冰到硬咗。從我僵咗嘅笑容就知道入面有幾凍啦 ![快閃北海道紋別之旅（二）海洋生態遊]()
▼出番嚟就可以見到佢嘅展覽廳，呢度展佢地嘅破冰船模型同介紹不同種類嘅「浮冰」。
▼另一邊就有啲唔同嘅小體驗，好似龍捲風同浮冰。
▼現場仲有紀念品販賣。另外仲有個「海洋生物摺紙攤位」可以隨便玩，仲設有教學添。佢地好好俾咗疊紙我返去摺企鵝，可惜我資質太差唔識摺 ![快閃北海道紋別之旅（二）海洋生態遊]()
▼雖然睇完個館，但其實出去右轉之後，仲有一個好正嘅影相位㗎，就係呢個咁大嘅蟹鉗啦！
▼據講三十年前曾經有個展覽，有蟹鉗、三文魚頭同金字塔分別係浮冰上面，但三文魚頭沉左，金字塔太舊拆左，結果就淨番呢個。如果係真嘅話，唔知可以食到幾時呢？
後記：呢個主打「能看能觸摸」嘅流水科學中心比想像中有趣！最特別嘅就係個個零下20度嘅體驗，雖然凍到手都僵埋，但都幾好玩。可惜我地當日去到佢已經差唔多要關門，所以觀賞時間唔夠多。建議你地嚟嘅話可以預留返大約一個鐘時間，臨走一定一定要去旁邊嘅大蟹鉗影相呀。行路過去只需幾分鐘，非常方便。
2）冰海展望塔（Okhotsk Tower）
▼係去展望塔之前，我地去咗旁邊嘅「海洋交流館」先。因為係呢度，我地可以沿住海邊行去展望塔或者坐接駁車過去。
▼入到去會見到我頭先話沉咗嘅「三文魚頭」![快閃北海道紋別之旅（二）海洋生態遊]()
▼之後就會見到呢架第二代嘅「破冰船」啦，其實係紋別除咗冬天有「破冰之旅」之外，夏天都會有「釣魚之旅」㗎！不過話明快閃，今次我就同佢無緣，見個面影個相就向展望台出發。
▼你可以選擇沿海旁行過去或者跟指示乘搭接駁車。
▼今次接我地嘅就係「紋太號」啦。（都話佢無處不在㗎啦）
▼一上去你會先到達紀念品店樓層，往上搭就可以去到展望台。
▼展望台樓層有小Cafe同埋兒童遊戲區域。
▼係呢度你可以眺望知床海岸，冬天可以睇到浮冰，黃昏可以睇到日落。
▼不過如果你以為佢只係一個普通嘅展望台，你就大錯特錯，因為佢最大嘅特色，其實係佢位於海底7．5米深嘅海底觀望台。
▼觀望台入面亦有少量海洋生物展出。職員會不定期出嚟餵飼。你地下佢地幾咁肚餓 ![快閃北海道紋別之旅（二）海洋生態遊]()
▼另一邊仲有可以「Touch Touch」嘅區域，但留意要小心輕碰呀！
▼既然係海底，就梗係唔好浪費欣賞野生海洋生物嘅機會啦，經前面嘅天窗就可以望到海洋活動㗎啦！
▼職員會話俾你聽邊幾個係熱門嘅窗口。係夏天嘅晚上，係最容易見到唔同嘅海中生物㗎。
後記：雖然觀望台面積唔算大，不過可以直接睇到海洋生物嘅感覺真係好奇妙，好懷念係澳洲潛水嘅感覺。如果季節同時間揀啱嘅話，其實係樓上展望台嘅景色真係好靚好靚！所以大家記住Mark低冬天可以睇到浮冰，黃昏時段可以見到大大嘅日落啦![快閃北海道紋別之旅（二）海洋生態遊]()
整個塔嘅行程加埋可以預留約45分鐘。
篇幅所限，未能盡錄。下集會為大家介紹其餘兩個景點，帶大家睇下我點樣騷擾…呀唔係，係親親海豹啦。
【流冰科學中心】
地址：〒094-0023 北海道紋別市元紋別11番6號
電話：(0158)23-5400
時間：9:00－17:00 （最後入園時間為16:30）
收費：一般450円／高中・大學生150円 （國中以下及65歲以上者免費）
官網：http://giza-ryuhyo.com/index.html
【冰海展望塔】
地址：〒094-0031 北海道紋別市海洋公園１番地
電話：(0158)24-8000
時間：10:00－17:00 （最後入園時間為16:30）
收費：中學生以上 800円／小學生400円 （國中以下及65歲以上者免費）
官網：http://www.o-tower.jp/
＊海洋交流館和冰海展望塔為同一地址＊
特別嗚謝：北海道紋別市 及 H.I.S. 香港支店
About Post Author
