好多去過北海道或者準備緊去北海道玩嘅朋友，除咗札幌、函館之外，有無聽過紋別市哩？
今次好開心受邀請嚟到北海道紋別市，雖然只得30小時，但係我都食同玩咗好多唔同嘅野。其中一個就係我從來都未試過嘅「賞花」啦。
當日由東京成田機場出發，搭大約1小時45分鐘機就到達紋別機場。聽佢地講原來近年好多人都會由東京轉機過北海道繼續玩，可能大家都同我一樣，比較貪心，一次過滿足晒幾個願望掛![快閃北海道紋別之旅（一）賞花特輯]()
▼第一次搭國內機，感覺好新鮮。一落機就可以直接去到呢個拎行李嘅大堂，一拎完就走得，非常快速。
話明係賞花特輯，今次就同大家介紹兩個賞花熱點分別係「芝櫻瀧上公園」同「上湧別鬱金香公園」。
由紋別機場開車去「芝櫻瀧上公園」大約要30分鐘，5月中旬至6月上旬係芝櫻嘅季節，而我去嘅時侯係5月30號，差唔多去到尾聲嘅階段。
▼不過唔好以為會無野睇…一去到，我忍唔住「嘩～」咗一聲，因為真係好・靚・呀！
▼恕我大鄉里，作為第一次賞花，比我感覺真係好震撼。重點係見到一大片粉紅色當堂好有少女嘅感覺![快閃北海道紋別之旅（一）賞花特輯]()
▼職員話個度有兩種唔同嘅芝櫻，顏色有深淺，隨著生長情況亦會產生變化，正因為咁，令整體上更加有層次。
▼不過可能將近芝櫻嘅尾聲，所以偶爾都會見到少少缺口！上網見到全盛期嘅照片就好似鋪咗塊「芝櫻地氈」咁一大片粉紅。
▼公園入面嘅小冊子仲有多種語言提供，好似繁簡中文，英文，日文，韓文同泰文。不過其實最特別係小冊子上有一個標語「大地，沉浸在粉紅色的愛戀氛圍」，真係好浪漫呀![快閃北海道紋別之旅（一）賞花特輯]()
![快閃北海道紋別之旅（一）賞花特輯]()
![快閃北海道紋別之旅（一）賞花特輯]()
▼除咗瘋狂留影之外，呢度竟然仲有遊戲玩㗎。正常嘅芝櫻係有5塊花瓣，但係如果你可以搵到4塊，6塊或者7塊花瓣嘅芝櫻就代表你好幸運啦。搵到4塊同7塊嘅仲可以將佢影低，去「案內所」個度就會有禮物送番俾你。（記住唔好摘朵花落嚟呀![快閃北海道紋別之旅（一）賞花特輯]()
）
▼個日我就好好彩搵到一朵4塊花瓣嘅芝櫻，唔知有無人真係會搵到7塊呢？
▼落番案內所出示你嘅相片後，就可以得到呢張小小嘅「芝櫻卡片」啦。佢仲有香味㗎，唔知係咪就係芝櫻嘅味道哩![快閃北海道紋別之旅（一）賞花特輯]()
▼拎完禮物行過旁邊就可以試下呢度嘅特色甜品「芝櫻雪糕」啦。
▼雪糕口感都好滑，不過我就唔係幾識分芝櫻嘅味道![快閃北海道紋別之旅（一）賞花特輯]()
有人話似藥水味，但我覺得味道唔錯，而且炎炎夏日嘆番杯雪糕又的確係正嘅！重點梗係要「影相呃Like」啦![快閃北海道紋別之旅（一）賞花特輯]()
▼坐係度望住一大片芝櫻，感受下微風，慢慢品嘗雪糕，真係好寫意。有一刻覺得如果時間可以停留就好。
▼食完雪糕，都唔好咁快走住，因為旁邊仲有賣手信嘅地方。
▼舖仔細細，但係種類都幾多，有飾品，工藝品，食品等等。
▼其中店員話最熱賣嘅，係呢個甜納豆。好可惜我同納豆做唔到朋友![快閃北海道紋別之旅（一）賞花特輯]()
如果你地喜歡嘅話就不妨試下啦！
▼公園平時免費入場，但如果係「芝櫻祭」時期就要收費（本年芝櫻祭為5月7日−6月5日）。
如果你係攝影愛好者（或者自拍愛好者![快閃北海道紋別之旅（一）賞花特輯]()
），建議你地可以預留一至兩個小時係呢度。如果時間許可，你地都可以係度漫步一下，感受一下粉紅色嘅愛戀氛圍啦![快閃北海道紋別之旅（一）賞花特輯]()
【芝櫻瀧上公園／芝ざくら滝上公園】
地址：北海道紋別郡滝上町元町
電話：0158-29-2730 (滝上町観光協会)
時間：7:00－18:00
收費：大人500円／小朋友250円（中小學生）／小學生以下免費
官網：http://takinoue.com/
第一日賞芝櫻影得未夠喉，第二日我就去咗「上湧別鬱金香公園」啦。當日我由「Mombetsu Central Hotel」出發，車程大約30分鐘左右就可以到達。（酒店報告將會其後公開）
一落車第一個感覺就係，有陣陣牛屎味道，不過味道在可接受範圍，唔算好濃烈，夠晒大自然![快閃北海道紋別之旅（一）賞花特輯]()
▼先去案內所買入場券，分大人同小童。如果係花期嘅話就要購買季節票，價錢會比較貴少少。
▼園內仲有印仔俾你儲，有興趣嘅朋友記住準備好你嘅簿仔啦。
▼門口已經有地圖可以參考
▼一入園，首先見到嘅會係呢隻巨型嘅木鞋，梗係二話不說影張相先啦，而後面嘅日子就係你入園嘅日子啦。
▼園入面充滿荷蘭小鎮嘅味道，首先映入眼簾嘅就係呢個「風車型展望台」。
▼展望台入面仲有荷蘭服裝出租，俾你做個偽・荷蘭。（一小時500円）
▼亦有紀念品同明信片可以購買。
▼展望台上面可以睇到園內嘅全景，仲有好多造型花卉。
▼落返嚟嘅時侯，就見到園內嘅吉祥物「Chupitto」。好多人都爭住同佢影相。
▼意外地係北海道發現楊貴妃![快閃北海道紋別之旅（一）賞花特輯]()
▼不過有點兒可惜嘅係，原來我啱啱好錯過咗花期，工作人員已經開始收割緊啲鬱金香…
▼據網上圖片，全盛時期嘅鬱金香公園應該係咁㗎。
▼雖然有啲失望，不過無緣就係無緣，唯有轉到後面嘅商店區域望下。
▼商品類型有工藝品，飾品，服裝，食品等等。比較特別嘅係園內原來有輪椅租借服務，如果同老友記嚟玩，驚佢地行到攰，都可以幫助下佢地。如果唔係園內其實都有巴士導覽服務，但需要另外收費。（成人300円／兒童100円）
由於啱啱過咗花期，所以我大約逗留咗45分鐘就離開。但正常花開期間，如果你係喜歡拍攝嘅話，我相信可以預留一至兩個小時遊玩（包括商店區域）。
每年5月上旬係呢個公園就會有大約200種鬱金香開始綻放，而花開盛期大約係5月20日左右。官方網站亦會一直更新花開情況，去之前都可以參考下㗎。
【上湧別鬱金香公園】
地址：北海道紋別郡湧別町上湧別屯田市街地318
電話：01586-2-5866
時間：8:00－18:00 （最後入園時間為17:30）
收費：大人500円／兒童250円（中小學生）／小學生以下免費／季節票：成人800円／兒童400円
官網：http://www.town.yubetsu.lg.jp/tulippark/index.html
後記：今次去北海道其實有啲突然，一開始仲有啲擔心！點知去完之後，就覺得好幸運可以嚟到呢個地方。雖然今次我同鬱金香擦身而過，不過作為人生第一次賞花，我都感到非常滿足。希望下次有機會可以早啲嚟，欣賞到滿滿嘅鬱金香啦![快閃北海道紋別之旅（一）賞花特輯]()
如果你熱愛賞花，建議5月中左右嚟就可以一次過欣賞晒兩邊花園嘅盛況啦！
除咗賞花之外，我仲去咗好多唔同嘅景點㗎。如果你地排緊北海道嘅行程，都不妨參考埋紋別呢個地方，其實都幾適合大家嚟個兩日一夜嘅行程。嚟緊4個星期會繼續為大家送上「快閃北海道紋別之旅」，敬請留意，多謝支持![快閃北海道紋別之旅（一）賞花特輯]()
特別嗚謝：北海道紋別市 及 H.I.S. 香港支店
About Post Author
