今日已經年廿九，意味住大家得番2日時間進行大掃除，絕對唔可以再比拖延症病發！而講起收納，相信日本人認第二，都無人敢認第一。例如推出咗好幾本《令人怦然心動的整理魔法》嘅作者近藤麻理惠，「收納王子」小島弘章或是ig當紅收納達人osayosan34等，甚至日本普通嘅家庭主婦，都可以將家務整理發展成一門學問，就知佢地幾有料到。再睇番《逃避可恥但有用》，劇中結衣bb將主婦變成職業，將草食男星野源嘅屋企打理得整齊有序，而慢慢融化佢冰冷嘅心房，就知識得執野，係幾咁重要！
尤其是女仔，屋企啲衫應該多到可以砌到幾座喜馬拉雅山（但依然覺得自己無衫著），成日因為太亂而搵衫搵到焦頭爛額都算，最重要係－－已經無位擺！而想喺新年前還自己一個整齊舒適嘅空間，就要留意以下建議：
★根據所有收納達人嘅總結，查實秘訣只有一個字，就係要狠！所謂有捨先有得，只要夠狠，扔掉自己根本唔會著或者唔啱身嘅衫，就可以即刻空出位置。（唔好諗住之後有機會著呀）想環保啲的話，可以捐咗去或拎去H&M，UNIQLO等參與衣物回收計劃。
★櫃裡面嘅衫盡量打直捲起，搵野會方便過摺疊好多
★啲襪成日唔見一隻而且櫃筒超亂，搵野嘢唔方便？可以利用分格術將襪、underwear或其他配件小物分類放好。
★如果屋企有好多盒，盡量選擇同色系、同風格，甚至同尺寸，感覺會整齊好多。
怕分唔清邊個打邊個的話，可以用透明盒或貼上label，咁就可以一目了然。
★比起衣櫃，其實可以購入開放式層架，令物品更容易分門別類
★對於易皺嘅衫又無位掛的話，可以利用汽水罐蓋掛更多衫！
或者可以咁：
★衣櫃夠高的話，最直接嘅方法就係掛多幾條鏈，大家又多咗位可以掛（買）衫啦！
★伸縮隔板都好有用！
★相信大家鞋櫃都一樣咁爆，如果衣櫃有門的話，可以將輕身嘅平底鞋掛喺門到！
★圓環真係好實用，掛belt都好方便
★首飾的話，為了避免打結，可以好好利用反轉咗嘅雞蛋盒！
★咁擺雖然方便，但要留意有純銀或是貴重首飾的話，會因香港濕氣重而容易生鏽。
★去旅行時先用嘅行李箱當然亦唔好嘥！棉被、毛毯、羽絨等少用得着嘅物品都可以放入去，平時可以直頭當床頭櫃用~
★除咗服飾之外，留意番過期、變色嘅化妝品&護膚品都要扔扔扔！尤其是唔啱自己膚質嘅，根本唔會再用，就唔好放喺到嘥位。
只要照住以上方法做，大家新年買新衫就唔怕無位啦！
About Post Author
