我知你地班友仔實話：車～香港都有チチカカ啦！有咩特別啫！咁諗你地就大錯特錯啦！
位於高円寺嘅チチカカ有成三份一間都係賣家品，包括燈具、門簾、地氈、床上用品、廚房用品等等等等。本身佢地個定價都已經唔貴，加上最近做緊半價優惠，實程抵到爛啦！！！
（*搭JR由新宿站去高円寺站10分鐘嫁咋！）
係門口已經見到有D地氈只係需要1000yen ，質素都唔差嫁！
入面鬼咁多野，睇到人眼花撩亂？唔怕，頭頂有指示：生活雜貨係右邊呀！
一入到去，勁多碗碗碟碟放晒係到，但係依D好似香港店都有，唔係太吸引……
不過睇真D，原來幾百yen就可以帶返屋企，好抵呀！
D碟由鼓油碟到成個籮咁大既巨碟都有……（題外：我覺得左邊綠色個堆碟好似生菜……）
我好鐘意木廚具㗎，依隻咁可愛嘅貓貓木碟都係1000yen，仲未計特價㖭！
隔離個隻青豆碟都好吸引，方便放唔同味嘅漬物同醬汁（不過我係唔食漬物同唔點醬嘅哈哈）
點樣可以將頹飯變成高級既日本料理呢？答案就係依張店員推介嘅500yen餐墊到！
依D貝殼雜貨閃令令咁，好適合優雅嘅女士，姐係我！
唔係掛，連燈都有！個玻璃燈罩好靚呀，可惜我屋企張摺枱襯你唔起，嗚嗚……
依盞藍色吊燈好好好靚！仲有粉紅色㖭嫁！
除左燈之外仲有大量風鈴，你睇中間隻黑貓幾得意！！！！！
門簾窗簾，長短粗幼，任君選擇，好多100蚊樓下已經有交易啦～
成間舗入面我最推介依個一式三件床單套裝，特價左1650yen，計返做港紙一百蚊多D，就有齊床單＋枕頭＋被袋3樣野啦！！！
（*個特價做到31號咋！）
不過話晒床上用品咁貼身，萬一質地唔好咪GG?
好彩，套野質地雖然薄少少，有d似用黎洗面嘅紗巾咁，唔算好「滑劣劣」，不過感覺都好舒服，唔錯嫁！
最正就係咁靚嘅民族風床單真係唔多地方有，所以各位大大要買就趁手啦！
鋪好晒之後真係好靚，為我間房增加左唔少色彩～
（唔好洗思因為間房有太多不堪入目嘅雜物，為左大家嘅眼睛着想我就打個格仔啦。）
被袋4個角都有繩比你綁實張被
條拉鍊好幼，零感特薄，唔怕un親！
唔鐘意太花嘅朋友可以反轉張被袋黎用，一樣咁靚仔！
床單條邊係橡筋黎，連我張床咁厚都塞得入，大家唔洗驚床單唔夠大！
張後送張素顏睡相比大家，係咪好驚喜／嚇呢！
有興趣嘅朋友可以上佢地個網到睇下～～～
About Post Author
