之前有好多媒體都有介紹過成田機場嘅500MB免費SIM卡到底好唔好用？今次Like Japan就為大家去到東京成田機場做個實地測試，有圖有數據有真相！！
認住呢部機，張免費嘅SIM卡就係喺呢度攞㗎啦！不過記得要提早最少4個鐘做登記，如果唔係部機係唔會detect到你個order，至於點登記，文末再簡單地話畀大家知～
成功攞到盒WiFi卡！入面隨咗有張SIM卡之外仲好貼心地送埋支針畀你，冇咗支針嘅話小編真係會拎住張卡喊……
記得拎埋張「設置方法」先好走，有哂中文，說明非常清晰，睇住啲圖同字嚟整想失敗都幾難！
入好卡又搞好哂所有野，係時候測試吓張卡夠唔夠快好唔好用喇！喺機場一開speed test之下首先呆咗一呆，0.55Mbps！？即係1Mb都冇！？咁咪慢過烏龜！？
再睇睇個穩定性，上載同下載都keep住喺0.5左右，都幾穩定，暫時未見有用用吓斷線嘅情況。
我地出到渋谷之後再做多次speed test，情況同喺機場差唔多，都係keep住0.5Mbps左右，亦好穩定，雖然速度慢到唔係好睇到video，但用Google Map同send whatsapp文字訊息就冇乜大問題。
Wamazing仲會好貼心地send email畀你睇住自己用咗幾多data，仲show埋如果想買多啲data嘅費用。為咗測試呢500Mbps可以玩幾耐，我地呢幾日都同平時一樣不停碌FB、send whatsapp同睇地圖，結果好意外地都捱到3至4日。
除咗靠email去check住用咗幾多data，其實喺個app度都可以直接睇到，如果真係想買多啲data就咁㩒「追加儲值」就搞掂，信用卡會即時過數，勁簡單方便！
總括嚟講，如果只係諗住用張卡嚟同屋企報平安，絕對綽綽有餘，但如果係諗住成個trip都靠佢，又要去FB打吓卡又要send相畀朋友，都係正正經經租返隻WiFi蛋或買返張SIM Card啦，要成日check住500Mbps幾時會用完嘅感覺實在太刺激……
登記步驟：
最後教埋大定登記攞呢張免費SIM卡嘅步驟，首先大家要去Download一個叫「WAmazing」嘅App。
按「下一步」
睇清楚4個points之後就可以按「下一步」。
入自己常用嘅email address同設定密碼之後按「登錄」。
畫面會顯示已經送出確認電郵，click email入面條link之後再返去個App度按「下一步」。
再分別輸入「簡介」、「旅行信息」及「信用卡信息」。入咗信用卡信息之後會象徵式地收你1円去confirm你張卡真係用到，但可以放心，如果冇用佢地其他收費項目的話個app係唔會隨便過數嘅～
就係咁簡單，所有登記步驟就完成啦！溫馨提示，以上步驟可以喺香港完成，最好出發前搞掂，咁就唔怕去到日本先發現搵唔到網絡乜都做唔到。然後以下嘅步驟係到達日本攞SIM Card嘅程序，首先要做嘅就係要搵到部SIM Card機！
記得一定要搵到部機先好㩒「開始領取SIM卡」
之後將個QR Code放埋去部機個Scaner度（唔使試圖或企圖Scan我呢個Code，用唔到㗎……），Scan完之後要順手㩒埋「安裝設定檔」，然後再換張新SIM Card入電話，再㩒Activate就真係完成啦！
其實所有步驟都已經好清楚地印喺張「設置方法」（攞SIM Card部機附近實攞到）上面，一步一步跟住做實搞得掂！
祝大家喺東京玩得開心啲！
About Post Author
