來自宮崎縣嘅人氣日本居酒屋－塚田農場 即將正式登陸香港！喺日本全國擁有200多家分店，2012年開始拓展到海外，而嚟緊7月8日將會喺海港城開設第一家香港分店。
落地大玻璃能夠看到維港美麗嘅景色，絕對係香港店獨有！
塚田農場最出名就係食雞料理，佢哋喺宮崎有個雞隻飼養場，提供新鮮走地雞畀店舖。後來分店越開越多，養雞場擴展至鹿兒島、北海道都有。香港店嘅雞肉料理都係精選來自日本養育場嘅走地雞隻㗎！
塚田農場香港店主打：美人鍋（HKD320）
各位觀眾！係手掌咁大嘅骨膠原！呢個美人鍋真係不得了，湯底係用宮崎縣走地雞嘅骨膠原製成，開咗火之後慢慢溶化成為超濃雞味湯底。
不過食落一啲都唔會過份濃厚，香滑之餘仲有少少野菜嘅鮮香味。
個鍋有二人份量（不過3－4個人食都得！），有大量來自本地同日本嘅野菜、雞肉，同埋分別有黑白芝麻／七味粉點綴嘅雞滑，無論Lunch定係晚市都有得食，真心推呀！
從鹿兒島新鮮輸入：炭燒走地雞 鹽味 (HKD180)
炭燒走地雞係日本塚田農場嘅必食名菜！呢種炭燒方法從九州引入，見到以上片段師傅用大火直燒嘅過程中，來自鹿兒島嘅雞肉已經沾上炭嘅香味，加上雞肉口感又嫩又彈牙，唔怪之得喺日本咁受歡迎啦！
午市限定：DIY 壽司御膳 (HKD138)
一般去餐廳食壽司都係壽司師傅整俾你食，不過呢度就可以一嘗自己親手炮製嘅壽司手卷！唔講仲以為全部餸都可以就咁食！
只要配上沾有少少紫蘇嘅白飯就可以整到屬於自己嘅手卷：有炸茄子配雞肉、天婦羅炸蝦、配有明太子醬嘅炸雞、玉子燒、蒲燒鰻魚、忌廉芝士配魚籽、海苔配牛油果，仲有漬物等任君選擇。調味料方面亦有櫻花蝦、唐辛子、南瓜籽、姜味噌、Wasabi、辣蛋黃醬、柚子胡椒等等。而刺身就有三文魚、鮪魚同埋帆立貝。
塚田農場即將於2017年7月8日正式開業。佢哋仲引入咗一個日本店都有嘅驚喜傳統，不過我就唔係度多講啦，大家去幫襯食完之後就會收到張小卡片，到時你就會知架啦！
圖片來源：塚田農場香港店Facebook
比起日本塚田農場，淨係呢個無敵大海景都已經令店舖嘅格調升咗呢。Menu比起一般居酒屋菜單，更偏向食到高質日本菜嘅menu，我會覺得香港嘅塚田農場比起居酒屋更加似一間中上嘅日本料理餐廳！有興趣嘅大家記得來試下啦～
塚田農場 海港城分店
地址：尖沙咀廣東道3-27號 SHOP OTE 202（2樓、往郵輪碼頭方向一路直行到底）
營業時間： 11:00～23:00
開幕預定日： 2017年7月8日
About Post Author
