「引退畀人一種負面嘅感覺，但其實唔係，引退只係一個中途站，有結束先會有開始，之後嘅人生仲有好多開心嘅事等住我，而且喺呢段好長嘅路上，我會有新嘅發現，新嘅興趣，可能亦會喺呢段時間搵到其他想嘗試嘅事，再投入熱情，我認為未來可能會有咁美好嘅人生喺到等緊我呢。」- 安室 in《告白》
日本殿堂級天后安室奈美惠，3月30-31日喺香港舉行咗最後嘅告別演唱會，事緣安室喺上年9月20日（出道25週年兼40歲生日當天）宣布將會喺今年9月16日（出道紀念日）引退。其實安室自92年14歲開始出道，中途經歷過結婚、生仔、離婚、休業、復出後事業嘅轉變，再到回歸同稱霸多個日本音樂史嘅紀錄之外，佢亦係唯一一位喺10代至40代中都擁有百萬銷量紀錄嘅歌手，佢所獲得嘅成就被稱為日本流行音樂史上其中一位最有影響力嘅人物都不為過。呢位閃閃發亮，充滿住魅力嘅歌手，一路以嚟嘅成功都得來不易，依家佢辛苦多年，選擇喺呢個時候急流勇退，去迎接光輝將來，雖然唔捨得，但係亦都祝福佢。而小編亦希望趁呢個時候，同大家詳細啲咁講吓呢位平成女主角嘅一啲經過。
宣布引退後出席NHK節目「告白」畫面
童年時期
出生沖繩，三兄妹中最細嘅安室，由媽媽一手養大。喺小學五年級嗰陣，陪朋友去沖繩藝人學校「沖縄アクターズスクール」參觀嘅時候，畀當時嘅校長Makino正幸發掘，不過當時安室屋企嘅經濟狀況唔係咁理想，以一個月嘅學費都未必負擔到為由而拒絕，但係Makino再三邀請，開創異例畀安室以特待生入學。
根據安室媽媽 惠美子嘅著作《約定》所講，安室嗰陣每星期要返3日藝人學校，當時由屋企去學校，淨係單程行路已經要個半鐘，或者好多人認為，呢個距離搭車就可以解決，但係安室非常慳家，無同媽媽惠美子講過半點怨言，每次一放學返到屋企就會沿住巴士路向學校出發，放學夜媽媽又沿住巴士路一個人返屋企，風雨不改，一直堅持住來回行三個鐘嘅路去藝人學校做喜歡嘅事。可能正正就係呢份堅持，兌現咗佢離開沖繩時對媽媽嘅承諾，「我一定會成功」。
《約定．給我的女兒安室奈美惠》平良惠美子 著。呢本書真心好睇，可以知道好多佢同媽媽之間嘅事，強烈建議新加入嘅安室Fans揾嚟睇。
「素顔の夏 グラフィティ’96｣ 演唱SWEET 19 BLUES時嘅畫面
92年組成SUPER MONKEY’S 出道
安室初時以組合SUPER MONKEY’S出道，推出第一張單曲「Mr. U.S.A.」，之後一直喺演藝圈浮沈咗段時間，雖然中間曾經推出名作「Try Me～私を信じて～」，但真係令安室嘅名聲紅遍日本衝出國外嘅，要數佢人生中第二位伯樂 小室哲哉。喺1995年，佢哋合作咗第一張作品「Body Feels EXIT」，雖然啱啱推出嘅時候無登上ORICON公信榜週冠軍，不過後勁就非常厲害，佢嘅總銷量成為安室第一張百萬銷量單曲。
左：「恋のキュート・ビート/ミスターU.S.A.」出道單曲 1992年發售
右：「TRY ME 〜私を信じて〜」以「安室 奈美恵 with SUPER MONKEY’S」推出嘅單曲 1995年發售
1992年於節目「KATO&KEN テレビバスターズ」演唱Mr. U.S.A.
1993年「マスカットガム」LOTTE CM ，曲： 愛してマスカット
超早期 MAX成員上節目「うたばん」時嘅畫面
人氣爆發 帶領潮流
安室曾經喺節目表示，初初聽到會同小室合作其真都幾大壓力，因為當時唱過小室作品嘅人都變得好紅同多人認識，如果自己做唔到個水平咁點算好呢，而事實証明安室真係諗多咗，因為佢哋之後推出嘅歌「Chase the Chance」、「Don’t wanna Cry」、「CAN YOU CELEBRATE?」等等，都成為百萬銷量單曲，空前成功同人氣爆發，令呢位天后除咗帶領住整個樂壇之外，仲係當時潮流嘅新指標，嗰陣唔少女仔會將自己曬到一身小麥色，染髮，着迷你短裙加長靴，就連條眉都要跟足安室嚟修，而呢個潮流當時被稱為「AMURA」安室社會現象。
左上：「Body Feels EXIT」與小室哲哉合作的首張單曲 1995年發售
右上：「Chase the Chance」1995年發售
左下：「Don’t wanna cry」1996年發售
右下：「CAN YOU CELEBRATE?」1997年發售
*四張單曲均取得百萬銷量紀錄
曾掀起熱潮的AMURA現象，截圖取自「素顔の夏 グラフィティ’96｣
安室人生中的第二位伯樂 小室哲哉，截圖取自NHK節目「告白」
2017年再度合作，製作歌曲「How do you feel now?」時嘅相片
人生及事業低潮 重新思考再出發
雖然去到今日，可能唔少人都以為安室遇到佢人生嘅伯樂之後，從此一凡風順直到引退，但係其實佢都唔係一直都咁順利。就喺佢推出咗「CAN YOU CELEBRATE?」無耐，就因為結婚生仔而休息一年，等到佢復出之後竟然接到媽媽惠美子被殺害嘅噩耗，跟住踏入千禧年，安室又無再同小室合作，而且後浪推前浪，歌曲銷量亦大不如前，喺低潮期間，安室講過呢段時間佢不停思考「歌手 安室奈美惠」到底係一個點嘅存在，要點定位自己好，每一日都好沮喪喺到諗到底邊個位做得唔好，最後佢決定放低自己個名，以Suite Chic嘅名義去製作音樂，獲得相當好嘅評價，亦係呢個時候重新啟發返佢最鍾意做嘅事，佢話當下呢道通往未來嘅門係突然喺腦到出現，唔使鎖匙，一開就通咗落下個階段，反而之前想嘗試打開嘅門就無成功過，自此之後，安室喺製作音樂上，都係跟住自己個心而出發。
「WHEN POP HITS THE FAN」以SUITE CHIC名義推出專輯 2003年發售
「Space of Hip-Pop – namie amuro tour 2005｣
去到07年，安室嘅人氣終於全面回歸，佢張專輯「PLAY」闊別7年再登上ORICON公信榜首位，同連續兩週冠軍位置，自此，大家再度將目光聚焦返落佢到，期待佢重新展開熱潮，帶領音樂潮流。
「PLAY」第8張專輯 2007年發售
「namie amuro PLAY tour 2007」
重心轉移＋不擅長MC環節
安室亦喺嗰時開始，少咗出現喺電視上，將佢演藝活動嘅重心都慢慢轉移咗去巡演上。當中關於安室嘅巡演其實有件趣事，就係大家基本上係唔會睇到佢嘅MC環節（當然今次Final Tour除外喇），事源於安室自身一個好可愛同為人認真嘅原因，佢表示過佢真係好唔擅長MC，如果只係得一場公演嘅，佢都諗到可以講咩，但係如果喺廿場嘅，佢就要諗嗰廿場MC講咩，而且要講得有趣唔重複，負擔變得好重，就決定取消MC環節，不如畀大家好好享受呢兩小時嘅表演喇（笑）
翻譯：一直也沒有MC，對不起呢「Namie amuro 5 Major Domes Tour 2012 ~20th Anniversary Best~」
安室一路以嚟嘅人生從來都唔係一帆風順，無論係私生活定事業都經歷過低潮期，但係每一次都畀佢捱過，成功回歸，依家佢選擇呢個巔峰時候引退，其實真係好型好瀟灑，絕對係一個完美嘅落幕。
About Post Author
