日本有好多餐廳都有「飲み放題」，即係任飲，除左果汁、汽水、茶，連酒都可以任飲！不過如果唔了解有咩酒咁又點叫？剩係飲識果一兩種，咪無左任飲可以試多啲野嘅意義？嗱，睇住下面個menu逐一解釋！
ハイ vs サワー
以上兩種都係雞尾酒中常用嘅烈酒，ハイ會濃啲，サワー係酸酸地嘅。「水割り」同「炭酸割り」其實就係溝水定溝汽水嘅分別。小編覺得加汽水會易入口啲，但同時易飽肚亦易醉啲。
焼酎=燒酒
燒酒係蒸餾而成嘅烈酒，就咁飲都幾濃，所以括號入面就有得揀：加冰、溝水、溝熱水。有時見到「泡盛」其實都係燒酒，但只有沖繩出產嘅先會咁叫。而燒酎前嘅字就係除左米之外，仲加左咩去造酒，「芋」即係番薯(唔好搞錯做芋頭)，「麦」就係大麥，「紫蘇」睇字面都明啦，依個味好少有。每個分類下面果啲就係酒嘅牌子名啦。唔好以為烈酒就男仔飲多，其實燒酒係日本好受OL 歡迎。
ビール=啤酒
罐裝同枝裝就要揀牌子啦，但依個menu就得杯上嘅生啤。
ハイボール=Highball
一開始介紹過嘅ハイ，就係佢嘅簡稱。依個menu仲有得揀溝薑味汽水（ジンジャー）定溝可樂（コーラ）。
カクテル=雞尾酒
日本嘅雞尾酒都係大家飲開果啲啦。全部都係英文譯名，可以試下同店員用英文慢少少講，應該會落到單。但係日本梗係試日本先有嘅野啦！
ワイン=紅白酒
咁「赤」就係紅酒，「白」就係白酒囉。
果実酒=水果酒
女仔最鍾意，甜甜地，易入口，不過濃度高，要小心飲飲下飲大左。可以揀加冰、溝水或者係溝汽水，溝淡左無咁易飲醉啦。除左好多人識嘅梅酒，基本上日本人可以用任何生果黎釀酒。
日本酒=清酒=米酒
就咁睇標題你都明啦，三樣野就係同一樣野。任飲唔會有好多選擇，都係一種起兩種止。括號入面即係凍飲定熱飲，多數會用「冷」(凍)、「燗」(熱)去表示。而「二合」係盛器嘅大細，一睇下面張圖就會明。
ウィスキー=威士忌
威士忌係烈酒，都要揀加冰、溝水、溝熱水。不過都有人會叫straight，即係就咁飲。
知道左咩打咩之後，下次去日本食放題就可以手指指咁試多幾種酒啦！但就咁介紹個menu當然係唔夠。之後小編會慢慢同大家介紹以上各種酒，大家飲住等！
About Post Author
