近幾日睇新聞，總係離唔開Google DeepMind人工智能AlphaGo大戰南韓棋王李世石，呢單新聞點解咁觸目？事關圍棋係被認為係世界上最複雜嘅棋類之一，要一個電腦程式識玩圍棋同擊敗世界上最頂級高手，對程式嘅演算要求係非常之高，所以呢單除咗關IT事，亦都係圍棋界嘅一件大事。
截至今日(3月14日)，AlphaGo已經連贏李世石三場贏出五盤三勝嘅比賽，不過因為規矩點都要捉夠五盤，所以雙方都要捉埋落去，李世石亦都成功喺第四盤反勝一局。
講起呢單新聞同圍棋，相信唔少人都會諗起《棋魂》呢套經典漫畫，只不過當年《棋魂》喺北斗杯完結(有人覺得係爛尾)，網上就流傳過係因為漫畫入面其中一個角色「高永夏」影射韓國真實選手，引起韓國不滿，所以進藤光喺北斗杯輸咗比賽就草草完結(當然我唔buy呢個係《棋魂》完結嘅原因)，而當中高永夏影射嘅，正正就係依家同AlphaGo大戰嘅李世石。
李世石真人同高永夏一樣係年少成名嘅天才棋手，而且同樣咁高傲，當年段位只有三段嘅李世石由於覺得段位賽好無聊，所以公開揚言只有三段就夠，自此唔參加段位賽，由於當時佢已經贏得唔少比賽，經常力壓高段位棋手，搞到韓國棋院為咗佢而改規矩，國內比賽亞軍升一段、冠軍升兩段，世界冠軍升三段，結果佢三個月內就由三段升咗做最高嘅九段。
另外佢都出名串，成日串人唔夠班，雖然有時串完人係會輸咗，但佢都真係成為過好多次世界冠軍。但係今次同AlphaGo比賽，賽前佢都話自己唔駛準備，應該會以5:0或者4:1勝出，當然結果係點，大家有眼睇。
另一方面，有人話AlphaGo係「現代版」藤原佐為，但相信有更多人會諗，假如係藤原佐為決鬥AlphaGo，結果又會係點？
啱啱贏返場嘅李世石就話AlphaGo有兩個缺點：
1.害怕執黑子
2.當敵人出現意外一著，AlphaGo對應會出現問題
係漫畫入面，佐為自己講過，佢執黑子（即係先下棋）係從未輸過。而根據李世石嘅講法，AlphaGo同佐為啱啱相反，執黑子反而會較弱。另外AlphaGo係透過唔同棋譜自我對局嚟學習，所以當對手下咗一步「資料庫」未必有嘅棋，AlphaGo就可能有bug，對應會出現問題，好似第四局第78著之後咁。
當然如果藤原佐為鬥AlphaGo，可能AlphaGo已經有晒本因坊秀策（即係佐為上一個化身）嘅棋譜，所以佐為可能比較輸蝕，佐為要贏就要出奇不意咁落棋令AlphaGo又有bug，不過如果長鬥落去，當AlphaGo儲返咁上下Data，相信佐為都頂唔緊。
當然以上只係我FF，唔知大家又點睇呢？最後都希望李世石聽日贏返局，為人類爭返口氣！
About Post Author
