天空樹下吃喝玩樂－晴空塔商場Solamachi 商店推介

 

今日就等我同Vivi輕輕推介5間我地覺得遊客難得嚟到應該一戰嘅餐廳＋店舖啦！

 

1）Pokemon Store （5F 東區）

今年Pokemon Go hit到爆燈，重燃起唔少人對寵物小精靈嘅熱愛。東京除咗池袋之外其實Solamachi都有Pokemon Center嘅分店！除咗公仔、文具、小食，依家仲做緊Pokemon X Mario嘅crossover主題商品，同埋有Skytree Pokemon Store限定嘅商品添架！

 

2）nanaco plus+ (4F 10區)

遠睇可能以為係一間好普通嘅首飾舖，但其實呢間舖頭係將日本傳統糖果加工再變成非常可愛嘅吊飾、髮飾、耳環、手鍊、電話繩或鑰匙扣。因為每款糖果都好日系，而且真係有好多款式，所以尤其適合女仔嚟買野！男仔行都唔緊要，可以買下禮物俾身邊嘅女性朋友嘛XD

 

真係想食糖嘅都可以一罐罐買，水果味幾好食架！我同Vivi都忍唔住係度買咗嘢呢（笑）。

 

3) Rilakkuma Store (3F 3區)

鬆弛熊喺香港應該都有唔少粉絲。近期鬆弛熊家族就出咗隻新嘅熊仔叫小熊Koguma，係真係一隻熊既熊仔嚟㗎（我都係最近先知原來鬆弛熊嚴格來講唔係一隻熊…）！ 喺香港未係好見到呢隻可愛小熊嘅商品，但呢度專門店就見到大把喇。加上有好多日式打扮嘅鬆弛熊公仔，買嚟做手信定自己擺係屋企欣賞都好啫！

 

4）京都祇園辻利抹茶店 (6F 12區)

呢間祇園辻利抹茶店來自京都，就連負責人都係京都人。呢度對茶葉講究，除咗出名賣茶葉同品茶之外，呢度嘅抹茶系甜品都非常有驚喜！我同Vivi為咗拎隻特別版Skytree羹就買咗呢個抹茶、焙茶同玄米茶嘅三味雪糕～想講玄米茶味真係非常新鮮，係我從來未食過嘅味道！建議大家一場嚟到唔好慳個一、兩百yen，買三色雪糕試晒三隻味佢！（720Yen total）

 

5）Clover Leaf (4F 10區)

齋睇Clover Leaf門口個menu會以為係食普通港式雞蛋仔衍生出嚟嘅日系甜品，但其實重點係呢個以著名浮世繪師葛飾北齋嘅名作 「浪」’為藍本整出嚟嘅窩夫，得Solamachi店先有得食㗎！賣相非常特別同精美，非常適合呃like用！共有三隻味，我地試咗朱古力牛奶cream味，大概就係好似心太軟入面嘅鬆軟朱古力（同埋有碎）。其實真係幾甜同好夠朱古力味，不過一個人食絕對多咗啲（尤其女仔），同埋略嫌易凍咗少少～

 

當然，晴空塔仲有非常多其他值得行嘅商店：如果你想買動漫嘢呢度有JUMP Store、Studio Ghibli官店；想買衫買袋呢度有LOWRYS FARM、UNITED ARROWS、punyus、BEAMS等，想買嘢食手信更加唔駛講呢度有Disney、藥妝店、東京Banana、同一個超級市場～上完Skytree睇完風景落嚟食個飯再行下街消化，非常好！

 

如果大家想睇仲有咩其他店舖，可以睇番官方網站。

 

 

地址：東京都墨田区押上1-1-2 東京スカイツリータウン・ソラマチ

開放時間：

全館 10:00-21:00

(6F、7F / 30F、31F餐廳樓層為11:00-23:00)

※部分店家營業時間不同

前往方法：東武晴空塔線直達「東京晴空塔站」，東武晴空塔線、半藏門線、京成線、都營淺草線直達「押上站」

 

＊本文及影片全部拍攝都獲得店家批准

＊特別鳴謝Solamachi及Skytree協助拍攝