紅葉季節去京都，最啱就係著和服扮日本妹子打卡啦～
今次mika為大家整理咗一個清水寺＋袛園嘅超輕鬆和服打卡散步地圖！
是日京都呃LIKE路線：
清水寺→清水坂→產寧坂→大黑山金剛寺→八坂神社→衹園花見小路
清水寺
由京都站出發，坐巴士去到五条坂站落車，好快就會去到清水寺～
建於公元778年嘅清水寺係京都最出名嘅景點之一，相信好多人都有聽過！清水寺成個範圍其實幾大，如果你要去佢個「清水之舞台」就要比入場費300yen，雖然而家清水寺大規模修葺緊本堂屋頂，舞台個展望台會喺修葺期間關閉，但大家仍然可以上舞台到睇紅葉同打卡，由11月11日至12 月3日，更加有秋天夜間特別拝観㖭！（入場費400yen）
除咗本堂之外，仁王門、赤門等地方都一樣睇到紅葉，寺內嘅石梯、寺院、小橋等等都 係打卡靚位嚟㗎！
清水坂
離開清水寺出返嚟清水坂，大家會見到好多充滿住京都特色嘅手信鋪同食店，形成一個好熱鬧嘅街景畫面。喺依到隨便企定定已經可以影到好有京都舊街feel嘅靚相，不過就人多少少咁囉www
產寧坂
清水坂一路行就會見到有樓梯落去產寧坂，沿路一樣有唔少食店。落到去平路再一直向前行，就會見到依條綠色隧道，完全係影靚相嘅天堂啊！mika去嗰陣係35度超級熱嘅夏天，秋天時依到唔知會唔會變到橙橙黃黃咁呢？
大黑山金剛寺 八坂庚申堂
坦白講，依到有少少唔係太順路，不過既然二年坂同三年坂咁鬼似，不如行多幾分鐘嚟依間大黑山金剛寺打卡啦！依個大黑山金剛寺超級colorful，因為大家將平時木色嘅繪馬換晒做七彩繽紛嘅布猴，大家會喺個布猴到寫上自己嘅願望～依到又有得許願又有得影靚相，發達啦！
八坂神社
其實行返出八坂神社係有少少遠同少少攰（著木屐真係會行到腳都跛），如果買咗巴士一日劵其實可以搭返車出去八坂神社到落車～最大路當然就係係神社主殿、繪馬前面影相啦，不過如果唔拍低炒其實可以挑戰吓同個鐘自拍㗎w
衹園花見小路
最後去到花見小路主要都係影佢兩邊嘅舊建築同街景，一邊可以買吓手信（依到有幾間和信手信店），沿路影吓郵筒等等（日本郵筒真係好靚），是日呃like之旅就完成啦～～
最後最後，如果大家見到我面容扭曲希望你地唔好記怪w因為真係好好好好好熱，跟住仲落湯雞㖭TT
希望大家去影相嗰日有好天氣啦^^
About Post Author
