細細個玩街霸嘅時侯，個陣時嘅畫面仲係咁…
轉下眼，街霸都已經出到5，角色仲越黎越多！不過由始至終都係最喜愛春麗，話晒都係第一個女角色呀！
一知道沙嗲王搞左個街霸主題嘅Menu，即刻要去試下同介紹俾大家！其實近年沙嗲王集團都keep住同動漫野crossover，有睇過我之前介紹youme cafe嘅blog都會知道！不禁想讚佢真係好聰明，起碼吸引左我地呢批遊戲動漫客先啦！
入到去已經可以見到一d街霸主題嘅裝飾！特別係個Menu，雖然唔係春麗，但係阿龍都好型呀！
一打開個Menu就仲興奮，我最愛嘅春麗就大大個係最上面，梗係要order啦！另外就再order左個反碗面。
由於太肚餓啦！竟然食左先發現自己唔記得影相！呢個就係春麗嘅《雞腿藍蝶花飯》，你可以選配3種唔同嘅咖哩，分別係將軍嘅《紅菜頭白咖哩》、Ken嘅《蕃茄咖哩》同埋Cammy嘅《菠菜咖哩》。因為之前用開Cammy試玩有感情，我就揀番Cammy啦！
一上碟，覺得好搞笑呀！擺到明就係出緊旋風腿嘅春麗！碟邊仲要有d腿風係度，勁搞野！雖然個飯係藍色，但其實只係加左色素無調味㗎！而個咖哩就無加任何色素 （呢個係侍應姐姐自己走過嚟同我強調hard sell㗎
）
）
味道方面我覺得都相當唔錯，可能我本身都鍾意佢地嘅白咖哩豬扒飯，呢個菠菜咖哩其實味道差唔多！個雞脾都脆脆地，幾好味！只係春麗條“脾”粗左少少，一啖咬唔甩，哈哈！ （題外話：點解要畫到春麗條脾粗得咁緊要
）
）另外一個就係《反碗麵配印刷蝦餅》，點呢個嘅原因完完全全只係因為佢塊蝦餅！點解？因為佢會隨機俾唔同角色嘅蝦餅你，夠晒驚喜！當然我好想中番春麗啦！不過好可惜係BIRDIE…我麻麻地！
因為佢係冷麵嚟，你可以倒落個碗度撈勻佢，麻醬肉碎冷麵，味道都相當唔錯！
野飲方面我就叫左阿龍嘅《白朱古力碎乳酪沙冰》，乳酪味好足，但係白朱古力就欠奉啦！但酸酸地我幾鍾意！
另一杯就係印度佬嘅《印度拉茶》，個骷髏骨頭造型就夠晒殺食啦，但飲落就…超！甜！為左測試係咪我嘅問題，我俾同事飲左一啖，佢都係話超甜…所以試飲完之後，基本上都無再掂過佢！如果你話叫嚟影相係ok嘅，不過唔抵囉…
野飲旁邊就係附送嘅杯墊啦！另外跟野食仲有兩個！隨機送，一套八款，要儲齊唔知要食幾多次！
我好好彩，最後一個上枱嘅杯墊係春麗！我開心到“Yes”咗出嚟！
每食滿100蚊（連加一）就可以加錢換精品！加＄15換A4 File、加＄59換八達通套、同埋＄99換Cushion！
其實我有諗過換個File㗎，不過覺得無咩用，又無春麗所以就放棄左呢個念頭。
整體嚟講我都滿意嘅，係價錢有少少偏貴，好似食個咖哩飯要70蚊，如果唔係為左春麗我就真係未必食啦！呢d野都係食佢個噱頭㗎者 
提提你地，佢唔單只係期間限定，遲d仲會指定分店㗎！記住留意唔好去錯啦！
沙嗲王街霸期間限定
Round 1
日期：3月11日至5月11日
地點：沙嗲王全線分店
荃灣店：荃灣眾安街2-8號周合成大廈2-3樓
觀塘店：觀塘裕民坊34-36號1樓
銅鑼灣店： 銅鑼灣軒尼詩道489號銅鑼灣廣場一期9樓
旺角店：旺角山東街48號1樓
尖沙咀店： 尖沙咀加拿分道20號加拿芬廣場5樓
油麻地店：九龍油麻地彌敦道530-538號現時點2樓
Round 2
日期：5月12日至6月30日
地點：沙嗲王油麻地分店
About Post Author
