過埋個新年，話咁快又到情人節。喺日本情人節由女仔送朱古力俾男仔就係人都知，但無講過朱古力係要送俾「人」。動漫界就有個好出名嘅活動，就係《網球王子》嘅朱古力送禮！
呢個活動由2001年已經開始，歷史都相當悠久。玩法係由FANS喺情人節前一星期至當日呢段時間送抵JUMP SQ編輯部，記得寫埋係送俾邊個角色，最後由編輯統計點數，睇下邊個角色收到最多朱古力。因為呢個活動，近呢幾年都吸引到朱古力生產商同《新網球王子》趁情人節搞CROSSOVER CAMPAIGN。
有人會將朱古力整得靚靚再寄，但亦有人買現成嘅一箱箱咁寄。
至於點解無啦啦拎出黎講呢，係因為舊年情人節呢個活動竟然取消咗！根據記錄，由2001收到305份至2013年收到約4萬份，每年編輯部收到嘅朱古力都有增長，但喺2013年至2014年期間，朱古力數量突然有飛躍性突破。
2014總共收到18萬份！係食一世都未必食得晒嘅18萬份！淨係統計都計咗5個月。
2014年就有人一次過寄咗8000份俾不二周助。
2014年嘅第1，2名結果，留意左下角，有人一次過寄2萬份。
就係因為18萬份太多，對食物管理同物流都有太大負擔，2015年宣佈中止呢項另類人氣投票，改由用明信片應募券投票。
但相隔一年，今年呢個活動載譽歸來！《網球王子》嘅漫畫家都係TWITTER同大家宣佈呢件喜事，仲叫大家量力而為。
當然情人節仲未到，今年嘅盛況未可以同大家報導到。但FANS餓咗兩年，總數超越2014年都唔係難事。相信今年龍頭寶座都係由跡部景吾穩坐，而小編今年會留名等睇跡部王國民交税(朱古力)嘅盛況。
如果大家都有興趣寄，就快手寄去以下地址：
〒101-8050
東京都千代田区一ツ橋2丁目5番10号
集英社 ジャンプSQ編集部気付 許斐剛先生方 ○○（角色名）様
About Post Author
