川越近尼愈尼愈受遊客歡迎，除左同東京路程相對其他近郊地方較近，佢舊區獨有嘅古樸城鎮風格建築亦好難係東京市區搵到。因為咁佢仲有小江戶之稱~
交通方面主要有三種:第一種係東武東上線搭到去川越站﹑第三種係JR川越線搭到去川越站﹑而最後一種就係西武新宿線搭到本川越站。因為無論川越定本川越站行過去小江戶都需要最少十五分鐘，而且三條線價錢唔係相差好遠，由池袋/新宿過去主要大約500YEN單程，所以搭邊條線就睇下大家酒店位置決定啦~提提大家，川越都幾曬嫁，大家記得搽定防曬。小江戶區除左曬之外，仲收得好早，唔係一般嘅早﹐下午4點左右你就會開始見到一啲資料館關門，然後5點幾之前就會關得7788(唔係嚇大家，筆者第一次去嘅時候正正係4點到，結果好多野收得7788，不過依家好似有收妟左少少，但真係只係少少)，另外佢地星期一係休息嫁~唔好白行一趟呀~當你係到一排舊式建築，就證明到左小江戶街啦！
川越嘅名物有兩樣，就係漬物同蕃薯啦~係個人私心最鍾意食嘅蕃薯~呢度有賣好多唔同種類嘅蕃薯制品例如蕃薯批啦蕃薯條蕃薯片啦…總之鍾意食蕃薯的話一定唔可以錯過!到埗第一件事緊係食返杯蕃薯雪糕先啦~
呢間叫石門藏町茶屋嘅就話連CNBLUE同少女時代拍<<我們結婚了>>都係係度食雪糕嫁!
不過食落覺得奶味就重左少少，如果可以再濃D蕃薯味就好啦~
前行少少見到有一間拉麵舖頭有賣蕃薯餃子，雖然好似幾得意咁不過因為好驚坐底食D舗會關門所以就SKIP左了:_:
頭先講到，小江戶除左賣蕃薯，賣漬物都好出名嫁~雖然平時我其實只係鍾意食菜類漬物。入到去一間叫河村屋既漬物店，發現好多人都係度試食漬洋蔥。漬洋蔥有三種味:分別係黑椒﹑紅酒同埋醬油。因為我畬真係好入味，黑椒味好濃(好似黑椒洋蔥豬扒嘅味！)所以筆者都忍唔住買左包，626YEN有三個細嘅，不過價錢係根據重量而定嘅~
今次好可惜時之鐘維修緊，所以無機會去參觀，不過我地就行左去離小江戶較遠少少嘅冰川神社。冰川神社求姻緣好出名，再加上7月開始會有風鈴祭，吸引左唔人去參拜。聽每日神社開門嘅時侯都會免費派發20粒守過祝福嘅結緣石俾信眾，所以每早都吸引左唔少誠心嘅少女等侯~神社一開門就經無曬嫁啦~所以參拜都要排左大約十五分鐘左右。但成個神社都係風鈴再加上浴衣少女場面真係好治癒~
冰川神社嘅求籤方法好得意，就係釣金魚嘅形式啦~三個魚池裡面分別係英文籤﹑一年好運籤同戀愛籤。每條魚裡面都會有籤文，求籤者需要用魚竿釣一條合眼緣嘅魚仔返屋企~每籤300YEN。
除左求魚仔籤，冰川神社仲有一個幾特別嘅地方係俾人洗清罪過。當俾左100YEN買紙人仔之後誠心對住人仔反省，再摸人仔嘅頭三下，就可以放佢落特返側邊嘅迷你流川，當人仔漂過流川上嘅鳥居，就代表左罪被寬恕。不過筆者由於睇太多恐怖漫畫心裡覺得有點可怕就沒有試了。神社當然少不了的是御守~除左結緣御守，風鈴祭嘅時候仲會有限量版風鈴形狀御守。另外聽講7夕嘅時侯亦會有特別版御守嫁~風鈴祭的時侯神社會開到晚上9點。神社到左晚上景色都好特別嫁~千祈唔可以好似筆者一枝箭咁走左就後悔莫及了:_:
全力支持：大新銀行、香港航空、中國平安保險
About Post Author
