【去大阪買咩手信好？】最後衝刺「3大必到手信店」！

去親旅行最頭痕就係要買手信畀一堆親朋戚友同事老細，買大路野又怕畀佢地話冇誠意，但又真係冇咁多時間為各位精心挑選（大佬我係嚟玩唔係嚟買手信），所以最後通常都會手信集中地一次過掃貨，而講到大阪，一定走唔甩有超多手信買嘅「道頓堀」！

雖然來來去去都係嗰幾間，但佢地周不時都會入新貨，今次就等小編帶大家一齊走入店入面睇吓最近有咩得意野掃啦！

1. Little OSAKA OMIYAGE MARKET

嚟大阪又點可能唔買固力果Product做手信！道頓堀店雖然店仔細細，但入面密密麻麻放咗過百款同唔手信，入去行就好似尋寶咁，想搵得意野，就要落足眼力，隨時買到之前未見過嘅手信！唔好以為固力果就一定係買百力滋咁悶，搞鬼造型嘅面模入面都有唔少，係咪手信必買先！

PPAP喺日本仲係好hit，所以呢度都特登將相關Product放喺門口當生招牌，成功吸引到唔少遊客拎上手研究睇吓係乜東東。

【ピコ太郎PPAP Cookie ¥720】呢盒PPAP曲奇一盒有10塊，入面有3個唔同Pattern，最得意係隨餅會附送一支朱古力筆，食之前可以親手幫ピコ太郎美圖秀秀～

【ピコ太郎Face Pack ¥450】呢個面模好棧鬼，成塊面模係ピコ太郎個樣，一敷即刻可以變成ピコ太郎，個表情抵死到睇見都想打佢兩捶！

【Pringles章魚燒味 ¥600】Pringles大家一定有食過，但呢個2016年12月全新推出嘅關西限定章魚燒味你嘅朋友們一定未食過！呢個仲係3罐裝，拆返開可以送畀3個人，好抵！（笑）

【大阪どないやねん！激辛曲奇 ¥580】呢盒曲奇勁啱買返公司做手信齊齊開嚟食，一盒有12塊，其中只有2塊係唔辣，其餘10塊就辣到你飛起，買返去即拆一人一塊睇吓邊個會中招，好好玩。

【柚子酒 ¥440】當日有好多人圍住呢個角，小編當然唔執輸過去睇吓有咩好野買啦！原來就係呢個造型相當可愛嘅柚子酒，圓碌碌成個波咁，就算唔係飲用嚟擺都夠哂靚。（溫馨提示，液體最好寄倉！）

【蛋黃哥面模 ¥400】成塊面模印咗蛋黃哥個樣，一敷即變成蛋黃哥，蛋黃哥粉絲朋友仔收到應該唔捨得用！

リトル大阪（ぐりこ・や　道頓堀店）

地址：大阪市中央区道頓堀1-7-21　中座くいだおれビル1階

電話：06-6484-0240

營業時間：10:00-22:00

休息日：無

官網：www.glico.com/jp/enjoy/shop/glicoya/dotonbori/

2. いちびり庵

要搵呢間「ICHIBIRIAN」好容易，認住門口個四眼哥哥「くいだおれ太郎」實冇錯，因為呢度係全日本唯一一間くいだおれ太郎嘅Official Shop，所以喺門口已經見到くいだおれ太郎嘅Product。店內除咗有好多四眼哥哥嘅相關產品，仲有勁多唔同款式同大小嘅禮盒裝手信，加加埋埋有成4000幾個Items，要掃零食送畀人，呢度必到！

【くいだおれ太郎布甸 ¥1,350】呢個四眼哥哥布甸一罐有3個，每個都用佢頂招牌間條帽裝住，好得意。唔好以為罐布甸有姿勢冇實際，味道都唔錯㗎，食嘅時候將附送嘅焦糖醬同焦糖碎倒上去個布甸度，焦糖苦中帶甜，雞蛋味嘅布甸又夠滑，好食過香港超市買到嗰啲好多！

【大阪朱古力香蕉 ¥390】東京有Tokyo Banana，嚟到大阪又點可以唔買返盒Osaka Choco Banana。呢盒Osaka Banana一盒有5包，外層啡色嘅其實係朱古力蛋糕，中間包住米黃色香蕉味餡料，一打開個包裝就聞到勁香嘅蕉味，送畀朋友係人都知你去完大阪返嚟！

【盒裝金平糖 ¥540】如果你有朋友鍾意收藏鐵盒或飾物盒的話一定要買嚟送畀佢！小編一見到呢一系列嘅金平糖已經有少少失控，全set 8款都好靚，分別有抹茶、草莓朱古力、鹽、紅酒、焙茶等多種味道，個盒咁靚，當然要掃多幾盒。

【なにわちょろけん芝士及餅乾套裝 ¥540】第一眼睇到仲以為係布甸，原來係芝士嚟，一罐入面除咗有一大舊來自百年老店梅花堂嘅芝士之外，仲有三塊前田製菓嘅克力架餅乾，係呢間舖2016年12月先推出嘅新產品。食嘅時候可以將芝士搽喺餅乾上面食，芝士味道酸酸地，如果有杯熱茶喺手，就係一個完美嘅下午茶！

なにわ名物いちびり庵　道頓堀店

地址：大阪市中央区道頓堀1-7-21　中座くいだおれビル1階

電話：06-6212-5104

營業時間：10:00-22:00

休息日：無

官網：www.ichibirian.net

3. 若葉園本舖