冬日限定冰上樂園 「ICE LAND阿寒」
冬天去北海道，一定要玩返幾種冰上活動先不枉此行！位於北海道釧路市嘅阿寒湖一帶氣溫非常之凍，每年冬天湖面都會結成一片厚厚嘅冰原，而「ICE LAND阿寒」就係每年阿寒湖面結冰時先有嘅冬日限定冰上樂園啦！
———————————————–
6款冰上活動 大人細路都啱玩
ICE LAND阿寒依到有6大款冰上活動可以參加，唔需要畀入場費，淨係買自己想玩嗰樣活動嘅飛就可以㗎啦～6款冰上活動包括冰上電單車、冰上四輪電單車、冰上香蕉船、平地滑雪、溜冰同天然冰洞釣魚。依到所有活動都開放埋畀小學生參加，啱晒一家大晒嚟玩！
———————————————–
3種必玩冰上活動推介
1.冰上香蕉船 瘋狂甩尾好過癮（大人500円 小童300円）
冰上香蕉船架船其實同海上面嗰啲香蕉船係一樣嘅，但係玩落感覺就好唔同！第一次試玩冰上香蕉船，師傅係咁整到㗎船香蕉船向左轉彎300度再向右轉彎300度，成個人好似喺冰上飄移咁，好刺激！提提怕凍嘅朋友記得要帶返條頸巾先好玩啊～
———————————————–
2.冰上電單車 飄雪下挑戰極速（2000米 1500円）
小編個人覺得最好玩嘅就係冰上電單車！依款冰上電單車嘅操作方法非常簡單，唔怪之小朋友都可以玩啦（笑）開始之前，師傅會教你點樣操控油門，點樣加速、減速（其實嚟嚟去去都係同一個掣），跟住你就可以開盡油門盡情地喺雪地之中飛車，真係好好好刺激啊！一般嘅2000米course大約可以玩5分鐘左右，唔夠皮嘅仲有好多唔同嘅course可以揀㗎！
———————————————–
3.天然冰洞釣魚 雪國限定體驗（租借釣具一set連天婦羅券 1500円）
睇電視成日見都到啲人喺冰上面鑽個窿釣魚，今次終於有機會親自試吓！借好魚竿之後，自己揀個鍾意嘅帳蓬入去釣就得㗎啦～依種「西太公魚」好鍾意成群結隊咁游，如果好運嘅話，仲可以一次過釣到5條咁多㗎！最後無論你釣到定釣唔到都好，大家都可以拎張天婦羅券去換西太公魚天婦羅大擦一餐，有得玩又有得食，係咪冇介紹錯呢～
あいすランド阿寒
http://www.koudai-akan.net/
北海道釧路市阿寒町阿寒湖溫泉2丁目
———————————————–
阿寒湖温泉旅館推介 「あかん遊久の里 鶴雅」
最後想同大家介紹當日我入住嘅阿寒湖温泉旅館「あかん遊久の里 鶴雅」～房間又大又靚不在話下，而且早餐同晚餐都係超豪華嘅自助餐，有齊日、中、西餐超多選擇，連帆立貝同牡丹蝦刺身都有得任食，好味到停唔到口！最重要係，依到個溫泉大到好似水上樂園嘅溫泉版咁，有洞窟溫泉、氣泡溫泉、按摩溫泉、露天庭園溫泉等等，非常好玩！由依間温泉旅館行去ICE LAND阿寒5分鐘都唔洗，想去ICE LAND阿寒玩嘅朋友不妨考慮一下～
あかん遊久の里 鶴雅
http://www.tsuruga.com/
〒085-0467 北海道釧路市阿寒町阿寒湖温泉4丁目6番10号
交通方法：札幌、帶廣、網走・北見、釧路都有接送旅遊巴
———————————————–
交通小貼士
從釧路站前乘搭路線巴士到阿寒湖畔
———————————————–
更多關於北海道的觀光資訊，可以留意以下網站：
北海道観光振興機構（繁体字）臉書
https://www.facebook.com/visithokkaido.tw/
北海道釧路（繁体字）臉書
https://www.facebook.com/kushirofan/
釧路・阿寒湖観光公式網站（繁体字）
http://tw.kushiro-lakeakan.com/
About Post Author
