應該有唔少人同小編一樣已經去過關西N次（冇計，廉航太平……），但有啲地方係就算去幾多次都會想再去，例如嵐山！去嵐山有好幾種方法，唔同方法睇到嘅景都好唔一樣，最慘就係唔同季節會有唔同活動，即使目標唔係竹林，都有大把野影大把野行！
不過為咗仲有好多未去過嵐山嘅朋友仔，今之就同大家簡單介紹吓前往嘅交通方法、有咩季節性重點要睇，同有咩特色店舖一定要行啦！
推薦前往方法：
1. 嵯峨野トロッコ列車
去嵐山有好多種方法，如果係第一次就當然要坐吓嵐山觀光小火車「嵯峨野トロッコ列車」（¥620／人）！要坐呢個小火車，大家首先要坐JR山陰本線去到馬崛站，然後跟住路牌指示行10分鐘倒去「トロッコ亀岡駅」就搭到小火車㗎啦！站內嘅指示都幾清晰，所以唔需要太擔心搵唔到小火車個站。
沿路都會見到前往「トロッコ亀岡駅」嘅指示，跟住指示慢慢行一定去到。
成條路都好大自然feel，小編去嗰日仲撞正有人喺度騎緊馬添！
由於出發前做過大量research，好多人都推薦坐第5卡半露天車卡，話睇景最正，咁我地當然亦同售票員講我地想坐第5卡啦。景係好靚，但因為係12月，半露天車箱大風兼凍到冇朋友，仲不斷聽到經過車卡嘅日本人話我地好似好可憐，所以冬天的話都係乖乖地坐返有暖氣嘅車卡好啦！
站內有時間表寫明小火車幾時會到，差唔多時間就可以出月台等㗎啦！至於落車嘅車站，由於竹林喺正「トロッコ嵯峨駅」同「「トロッコ嵐山駅」兩個站中間，所以隨意二選一就得。
嵯峨野トロッコ列車
2. 嵐電
如果已經坐過小火車，咁再去嵐山的話可以揀搭嵐電，比起小火車呢種方法雖然係冇咁多景睇，但勝在超級方便，一出嵐山站就會發現自己已經企正喺勁熱鬧嘅商店街中央，慳到嘅時間就可以用埋嚟行多幾間小店啦！
搭嵐電可以喺地下鐵東西線嘅「太秦天神川」轉車，行去「嵐電天神川」站只係5分鐘左右路程，跟住指示行瞇埋眼都行到，超易行。
留意返去嵐山方向嘅嵐電係落車先畀錢，大人¥210一位，車程大概15分鐘左右。
一出車站基本上已經可以啟動食野同買野嘅戰鬥Mode！
季節性必睇重點：
1. 嵐山花燈路
好多人都鍾意12月嚟嵐山，唔係貪呢度夠凍，而係12月限定嘅花燈路真係靚到痴線，由渡月橋沿路去到竹林深處都有無數花燈點綴，度度都係影相位，所以有好多日本人天都未黑就已經開始出發去嵐山。
個人覺得最靚嘅影相位係同商店街相隔一條渡月橋嘅另一邊，每年都會有唔同嘅花燈主題，記得幾年前去嗰陣，大家可以將寫咗願望嘅memo紙貼喺花燈上面，超浪漫！
未入黑已經有大量來自五湖四海嘅人經渡月橋進入嵐山範圍，雖然真係好多人，不過好彩個個都好守秩序，唔會喪推。
如果唔趕住去行街，臨入黑可以坐喺河邊靜靜欣賞渡月橋日與夜嘅轉變，不過記得做好保溫措施，係好凍，但一定唔會後悔。
除咗幾個大型花燈，地上亦展示咗大量手繪花燈，加埋兩位和服美女，成件事實在太日本啦！
可能真係嚟過嵐山太多次，個人認為呢個竹林嘅點燈反而最冇睇頭（唔好打我），不過如果未嚟過就緊係要嚟啦，呢度日頭同夜晚都好大分別㗎～
日間嘅竹林，係咪同夜晚嘅感覺好唔同呢！
2. 嵐山燈籠流
每年8月中旬左右，喺渡月橋附近都會舉行放水燈儀式，日本人相信咁做可以將先人送去極樂世界。如果想目睹水燈燈火靜靜地沿桂川流走，記得夜晚7點左右就要返到去渡月橋附近，如果想舒舒服服坐喺度睇就更加要早啲去霸位，數十個甚至上百個水燈喺水中漂流畫面超靚！
成個景同氣氛都極之優美！
想簡單醫肚食乜好？
1. 渡月橋屋台
想食野但又唔想浪費時間坐低慢慢食，咁就一定要去渡月橋隔離嘅屋台掃街！呢度檔仔唔多，大概只有4至5檔，大部份以小食為主，但企喺街邊食勁有風味，如果每檔都諗住試少少，咁你一定唔使怕唔飽啦！天都未黑哂，啲檔仔已經陸續開舖，有烤魚、烤魷魚、串燒、章魚燒等唔同美食，鍾意食咩就盡情點啦！
間間舖都密密燒冇停手，現場真係勁香，搞到樣樣都好想試，所以最好有多幾位密友一齊同行，你一啖我一啖就可以試哂所有野食啦！
睇日劇成日都會見到呢種燒魚，呢度都有得食，唔係唔試啊嘛！留意返，條魚都幾多骨，小心慢慢食唔好哽親。
燒魷魚嘅香味真係遠遠都聞到，一串串拮好哂，就算行住食都唔會太唔方便！唔好睇佢好似黑忟忟一定又乾又硬，錯！呢幾條魷魚鬚不知幾Juicy，個甜甜地嘅醬汁又做得好好，三兩啖就成支吞哂落肚嚕。
去日本又點可以少咗章魚燒！呢個章魚燒唔係特別好味，不過入面有大大粒章魚交足貨，喺天寒地凍之下已經係一道絕品料理啦。
生咗大食積嘅小編因為怕半夜三更會肚餓所以點埋個炸薯條打定底，喺屋台可以買到炸薯條真係覺得有少少神奇，更神奇嘅係佢真係即叫即炸，熱辣辣脆卜卜，唔係炸好咗hea喺度等人買。
必逛特色手信店舖
1. 井筒八ツ橋本舗
買手信係去旅行嘅指定動作，要慳時間緊係喺同一間舖一次過掃貨啦！「井筒八ツ橋」喺京都有唔少分店，不過呢間嵐山店就有喺呢度先買到嘅嵐山限定款式，對親朋戚友交足貨之餘又唔會顯得過份敷衍，手信店首選！
呢個咁可愛又充滿日本氣息嘅貓仔銀包都只係¥390，買嚟做手信或者自己用都好抵玩啊！
京都必買嘅八ツ橋！呢一個一盒有齊肉桂、抹茶同士多啤梨味三種味道，唔使食死一隻味咁悶。
就算平時唔用香水，都一定會覺得呢個一共有4隻味嘅花香香水膏超級香，淡淡嘅幽香係當地舞妓嘅愛用品。
2. 京雑貨 洛楽
入到洛樂真係好似尋寶一樣，店內嘅所有精品都係由店員同店主精心挑選，無論你係男定女，老定少，入到嚟一定會忍唔住呢件睇吓嗰件又摸吓，覺得件件都好靚好得意好不可思議！精品手信呢度大把，係驚你買完唔捨得送畀人咋！
呢個號稱世界最強嘅辣椒粉一定要買返去送班唔識日文嘅死黨，佢地見到又「京都」又「嵐山」同咁靚嘅包裝，又點會估到呢包就係傳說中會辣到舌尖麻痺，全身毛孔張開，噴煙都不特止仲會噴汗嘅「超激辛唐辛子」！食過一次包佢一世都記得你呢個好朋友！
呢個魔法鹽有咩咁神奇？原來係撈咗乾蒜、洋蔥、黑椒、唐辛子，用嚟灑喺炸雞或薯條等等炸物上面會令到料理美味度即時提升，就算係喺自己喺屋企整炸雞，一用咗呢樽鹽，味道都唔會差得過出面餐廳！
呢個有黑白黃三種顏色嘅美甲套裝實在太靚啦！
要點先可以 贏錢？當然要先買副運財啤牌先啦！你睇呢副牌幾架勢堂，係張一萬円不特止，仲要金到發光，拎住佢想唔贏錢都難！
日本大熱嘅杯緣子當然係必買手信之一啦，呢個杯緣子仲要拎住把寫住京都嘅扇，幾有特色！
店內仲有好多其他得意野，就留返畀大家慢慢發掘啦～
除咗小編以上介紹嘅幾個點，嵐山其實仲有好多好多野行，如果想慢慢睇景慢慢行街，預留一整日一定走唔甩，而假如你想再悠閒啲，不妨喺嵐山住一晚，附近都有幾間靚嘅溫泉旅館，咁夜晚就可以浸吓溫泉，第二日再繼續血拼！
About Post Author
