北海道地大物博，每個地區都有好多好嘢玩㗎！今次小編就精選咗6個位於札幌、旭川同網走嘅必去景點，無論係室內定室外、水上定陸上都有齊，總有一處啱晒你心水～
屋頂上的摩天輪 晀望札幌美景
位於札幌嘅百貨公司NORBESA嘅頂樓並唔係一個普普通通嘅屋頂，而係起咗個摩天輪NORIA畀大家欣賞札幌嘅美麗景色！位於札幌市中心嘅摩天輪直徑45.5米，距離地面78米，每架車入面可以坐4個人～摩天輪轉一圈大約10分鐘左右，大家可以喺摩天輪入面晀望到札幌美麗嘅街景，咁啱落雪的話仲可以喺飄雪之下欣賞夜景，好浪漫啊！
———————————
觀覧車ノリア
地址：北海道札幌市中央区南3条西5丁目1-1
價錢：一周600円
兩周800円
營業時間：平日及星期日：11：00～23：00
星期五、六及公眾假期前夕：11：00～翌日3：00
———————————
旭川旭山動物園 必睇冬日限定企鵝散步
每年11月中至4月頭左右，每日朝早11點同下晝2點半，去旭山動物園都有得睇帝皇企鵝喺雪地散步！企鵝仔每次散步大約會喺園內行500米，大約行30分鐘左右～當一開閘啲企鵝仔扭住patpat行出嚟時，大家就可以陪佢地一齊散步～咁近距離見到咁多帝皇企鵝真係好正啊！
旭山動物園園內除咗帝皇企鵝之外，其實仲有好幾種唔同嘅企鵝，例如本身棲息於南美嘅漢波德企鵝就因為太怕凍嘅關係冇辦法同大家一齊散步，所以想探佢地的話就一定要入去企鵝館到參觀先得啦～～
剩係睇企鵝唔夠喉，想睇埋其他動物喺雪上玩？冇問題！勁可愛嘅小熊貓、好有型嘅東北虎同遠東豹，甚至連北極熊都可以喺動物園入面搵到！提提大家，因為園區都算幾大，如果仲想花時間去手信店買吓嘢的話，冇2、3個鐘實行唔晒，建議大家留多啲時間入嚟慢慢玩啦～
———————————
旭川市 旭山動物園
地址：北海道旭川市東旭川町倉沼
冬季營業時間（至2018年4月8日）：10：30～15：30
入場費：820円
———————————
網走市1月尾至4月頭限定 坐破冰船睇浮冰
每年1月尾至4月頭左右，從北方漂嚟嘅浮冰就會漂到去網走比較近岸嘅位置～依個時候海面上會出現塊塊白雪雪嘅浮冰非常壯觀，坐破冰船「極光號」出海就啱晒啦！從網走港上船出發，喺船上嘅30～40分鐘入面，大家可以去甲板到無遮無擋地睇浮冰，真係好膨拜、好壯觀，好彩的話仲可以見到狐狸、海豹同虎頭海雕㖭～不過由於甲板個位真係非常當風，大家記得著多幾件衫，做足禦寒嘅準備～如果真係覺得太凍嘅話都唔唔洗擔心，因為客室入面開住暖氣，太凍時大家可以入去休息休息～
———————————
網走流冰觀光破冰船極光號おーろら
地址：北海道網走市南3条東4丁目5の1道の駅（流氷街道）
運航日：1月20日～4月3日
成人：3300円
小童：1650円
———————————
網走市流冰館 零下15度真浮冰體驗
難得去到網走市想睇浮冰，但又撞唔啱季節，冇得出海坐破冰船，點算好？唔洗驚，嚟鄂霍次克流冰館就一年四季都有得睇真流冰啦～鄂霍次克流冰館地下嘅流冰體感室放滿晒一塊塊喺海到運過嚟嘅真浮冰，大家可以喺依個零下15度嘅世界入面享受欣賞浮冰嘅樂趣，仲可以企喺浮冰入面影相留念㖭！除咗流冰體感室夠晒特別之外，依到仲有個小型水族館，大家可以喺到睇到流冰下嘅海洋生物，啲魚仔真係好得意㗎～臨走前記得要試埋個當館限定嘅超人氣流冰軟雪糕先好走！焦糖口味嘅軟雪糕上面灑滿咗用天然海藻染色嘅鹽花，咬落脆脆咁，中和咗焦糖嘅甜味，唔夠仲可以添㗎～～
———————————
天都山展望台・鄂霍次克流冰館
地址：北海道網走市 天都山245-1
營業時間：9：00～16：30
入場費：750円
———————————
北方民族博物館 玩齊樂器 服裝 手作體驗
成立於1991年嘅北方民族博物館主要介紹北方民族嘅文化，從東邊嘅愛斯基摩人到西方嘅納維亞薩米人嘅展品都有齊㗎！當中小編印象最深刻嘅就係北方民族用魚腸同魚皮所整嘅衫啦～點解佢地咁犀利會諗到用依啲物料嚟整衫㗎！！！除咗一般展品之外，館內又有個立體投影小劇場講解北方民族嘅四季生活，大家可以坐住慢慢睇，幾有趣㗎～睇完展覽出嚟有個體驗corner，大家可以親手摸吓北方民族用嚟整衫嘅毛皮，甚至拎起件樂器演奏一曲～另外鍾情民族風嘅朋友唔好錯過試著民族服裝嘅環節啊～只要問一問工作人員，大家就可以揀自己喜歡嘅民族服裝試著，小編都忍唔住影咗好多靚相！最後喜歡做手作仔嘅朋友要留意啦，館內有個工作坊corner，大家可以親手試整北方民族嘅玩具同鎖匙扣，係咪估唔到博物館都有咁多好嘢玩呢（笑）～
———————————
北海道北方民族博物館
地址：北海道網走市字潮見309-1
營業時間：9：30～16：30
休館日：星期一
入場費：550円
———————————
網走湖莊 天然露天溫泉
冬天嚟網走咁凍，嘆返個溫泉就最舒服啦～無論你入唔入住都好，嚟網走湖莊都可以浸溫泉浸過夠本！網走湖莊嘅大浴場入面有4個浴池，分別係凍水池、溫水池、熱水池同露天風呂～朝頭早去浸露天風呂「天女之湯」時，可以見到四圍都鋪滿晒白色嘅雪，如果好彩落雪的話，更加可以享受到漂雪下嘅雪見溫泉㖭！露天風呂嘅池水溫度係40度唔算太熱，浸唔慣熱泉嘅朋友就啱啱好～諗返起都覺得好舒服，身心都放鬆晒，好正啊～～～
———————————
ホテル網走湖莊
地址：北海道網走市呼人78
溫泉收費（非住客）：成人：500円
小童：200円
———————————
更多關於北海道的觀光資訊，可以留意以下網站：
北海道觀光振興機構facebook（繁体字）
https://www.facebook.com/visithokkaido.tw/
網走市觀光協會
http://www.abakanko.jp/
———————————
《北海道導遊》EP.1 ICE LAND阿寒湖 香蕉船 冰上活動任你玩
https://www.likejapan.com/hokkaido01bt
《北海道導遊》EP.2 魚生 燒肉 甜品 札幌美食之旅
https://www.likejapan.com/hokkaido02bt
About Post Author
