為左證明我唔係淨係識得整黑暗料理嘅，今日就帶大家到銅鑼灣展示一下“廚藝”，去玩自家製章魚燒。
銅鑼灣地鐵站C出口行過黎好快，就係鵝頸橋附近。
如果你係想整章魚燒嘅話，最好預先book枱，因為佢都幾full！我個日book左7點半，早左幾個字去到，但已經開始有人排隊。
有好大隻章魚係門口迎接你
舖頭細細，一眼就睇得晒！
如果大家時間許可，佢仲有下午茶時段可以整小丸子，仲平d添！夜晚呢就6點開始供應…
其實呢度算係一間日韓料理餐廳，我睇Menu都係韓國野多過日本野！不過其實我都係俾佢個章魚燒吸引過黎嘅。
章魚燒嘅材料有洋蔥，蘿蔔，泡菜，章魚粒仲有灑係面嘅木魚。
不過佢價錢都幾貴，18粒章魚小丸子賣＄128，即係差唔多成＄7一粒！
咁當然如果你當係黎玩嘅費用，成件事就會合理好多！
唔駛驚自己唔識整或者搞唔掂，因為店員一開始就會教你點整，同埋牆上面都痴住左張教學。不過如果你真係有困難，店員見到都會即刻過黎幫你架！
自家製嘅好處就係勁足料！我粒粒都塞爆晒咁滯！
你睇我玩得幾開心，雖然我整到好亂！記住手要快，如果唔係就燶㗎啦！
製成品，但係唔記得左放木魚，哈哈 
因為兩個人，淨係小丸子唔夠食。我就再order左個冷麵同埋一個香辣燒魷魚，兩個味道都唔錯，份量都適中！價錢大約68－78左右。
總括黎講，呢間餐廳嘅食物質素都唔錯！不過價錢對我呢d窮L黎講就有少少貴！小丸子就更加唔駛講啦，如果你要同出面街買嘅比，佢一定貴好多！但係你當係黎玩嘅話，咁就good啦！如果你唔想玩小丸子淨係黎食野都OK,我見全場大約都只係3分1人玩小丸子。同埋佢有90分鐘時間限制，想坐耐d慢慢食吹下水就未必好適合！我走個陣出面都仲有人等緊位，所以如果真係有興趣黎既話就記住早d book枱啦
大阪李朝園
地址：銅鑼灣駱克道447-449號中威商業大廈地舖
訂座電話：2336 2770
營業時間：星期一至日: 12:00-01:00
About Post Author
