喺《人中之龍6》中，桐生一馬為搵返已失蹤數年嘅阿遙，不惜由東京遠道嚟到廣島尾道市嘅仁涯町。雖然仁涯町本身係虛構，但遊戲內所登場嘅店舖及景色卻有部分係真實存在，無論作為《人中之龍6》嘅聖地巡遊，定係想體會日本小漁港風情，都係一個相當值得去嘅地方。今次就藉著官方提供嘅《人中之龍6》嘅場景，介紹一下尾道市各處嘅特色場地吧！
１
千光寺山展望台
千光寺山頂嘅瞭望台，可望見整個尾道市嘅風光。附近更有「戀人聖地碑」、「文學小道」等名勝。作品中桐生與清美充滿印象嘅一幕，就係喺纜車山頂站附近，背景嘅遠處正就係展望台。
2
千光寺
位於千光寺山腰歷史悠久嘅寺廟。喺神社廟宇眾多嘅尾道市中可算係鶴立雞群。於遊戲中亦能確認塗上朱紅色嘅本堂。要拍攝尾道全景嘅話，喺驚音樓附近就最為適合。
3
千光寺山纜車站
乘坐纜車只需3分鐘就能由尾道市直上千光寺山頂。照片為千光寺山頂嘅纜車站，由早上9時～下午5時15分提供服務，每隔15分鐘一班，係到尾道觀光不可或缺嘅景點。
4
細坂道
尾道由於依山而建，因此市內有著形形色色嘅「坂道」（斜路），在細長嘅坂道上，可觀賞到充滿懷舊味道嘅風景，因此亦係眾多劇集嘅取境聖地。《人中之龍6》嘅仁涯町亦係這些坂道所組成，在遊戲中登山時可多多留意啊！
5
登山橋及電車路軌
可謂係尾道主要幹道嘅國道2號及山陽本線，係尾道主要對外連繫嘅設施。道路把尾道南北分割，近海一方為熱鬧商店街，近山則係千光寺嘅觀光點，可靠街道中央嘅登山橋橫渡兩方。
6
「點心與山貓」小食店
位處JR尾道站附近嘅人氣小食店。遊戲中可買到嘅「尾道布丁」亦能於現實吃到（1樽300日圓＋稅），仲可以買到其他特色小食啊！（地址：尾道市東御所町3-1）
7
渡輪碼頭
在島嶼眾多嘅尾道一帶中，渡輪係主要嘅移動手段。這個連接尾道及向島嘅碼頭便係其中之一，遊戲中嘅「仁涯渡船場」亦係參照這個碼頭而設計。當然還有連接其他島嶼嘅碼頭，有興趣有空閒嘅話可以走一趟。
8
尾道本通商店街
可謂係尾道嘅中心地帶。各式餐廳商店均進駐於此，非常熱鬧。遊戲中以「仁涯中央街」、「仁涯大通」嘅形式登場，可見街中嘅一事一物都被仔細收錄於遊戲場景內。
9
中央街招牌
尾道商店街色彩繽紛嘅入口，如實於遊戲內重現。入口附近亦有地點可遠望到千光山寺及海岸通道，進入商店街前不妨停步看看。
10
歡樂街嘅三叉路
於尾道有個久保嘅地區，當中嘅新開地帶就係昭和風歡樂街嘅所在。於遊戲中仁涯町嘅「花乃窪」就係參照這一帶而塑造。這邊嘅街道在日間較為沉靜，但一到夜晚便異常熱鬧，連綿嘅小食店、居酒店招牌嘅燈光照亮了整條街道！
11
小食店清美附近嘅道路
小食店清美為遊戲中虛構，但附近嘅街景卻實際存在，可於久保新開嘅一帶尋找得到，去到附近嘅玩家不妨找找吧！
12
米德居酒屋
遊戲中登場嘅「米德居酒屋」實際上係存在，內部格局也跟遊戲內差不多相同。去到米德當然也可一嘗份量十足肉鍋吧（售價1500日圓＋稅），還可加入調味料炮製人風格嘅味道啊！
13
其他地點
除了遊戲參照嘅背景，尾道還有其他遊戲未能盡錄嘅景點及各種設施。參觀了所有要去嘅景點後有空餘嘅話，不妨試試在市內到處走，或許會有意想不到嘅驚喜啊！
如何前往尾道？
前往尾道最簡便嘅方法，係由大阪乘坐新幹線。由關西機場出發可乘坐JR機場快速（約75分鐘）或特急HARUKA號（約50分鐘）到新大版，轉乘新幹線至福山（約1小時）再轉乘JR山陽本線到尾道（約20分鐘）。亦可坐新幹線到新尾道（約80分鐘）轉乘巴士（約15分鐘）前往。
由福岡機場出發嘅朋友則可乘市內地鐵到博多（約5分鐘），再轉乘新幹到福山（約90分鐘），再轉乘山陽本線到尾道（約20分鐘）。
資料來源：
http://ryu-ga-gotoku.com/six/map/
About Post Author
