橫濱市係神奈川縣最大嘅市區，人口數係全日本僅次東京都！佢有個好特別嘅地方就係地區糅合左唔同國家嘅文化，除左最常見嘅日式建築同神社，佢仲有唔少異人館同埋中華街等等中西文化。什至有經常遊日嘅朋友都話：無去過橫濱點算去過日本呀﹖所以今日筆者就決定一探下呢個市區有咩特別既吸引之處！
去橫濱比較抵嘅交通方法係由澀谷買一日東急橫濱pass，只需要860yen就可以包曬橫濱區內鐵路任搭同埋由澀谷到橫濱嘅一次來回。如果大家有信心想行萬里路的話都可以唔買pass，直接買來回程。不過橫濱其實都幾大下嫁，好似好出名嘅紅磚倉庫同中華街都有成2公里遠，如果唔係好好腳力就建議大家唔好同自己過唔去啦～
要講橫濱近年最受歡迎嘅景點就一定要數到杯麵博物館啦。雖然大阪一早都有一間﹐但東京區係2011年先開幕既〜由細食出前一丁食到大嘅筆者決定點都要去朝聖下！橫濱嘅杯麵博物館同大阪唔同，係需要收入場費。不過都係500yen啫，以咩都鍾意收入場費嘅日本尼講算係好經濟。
一去到裡面當然唔少得山咁多嘅杯麵陳列品啦﹐入口側邊就係一間放左日清咁多年唔同產品嘅房間，但由細到大只係知道合味道同埋出前一丁係日清嘅，完全諗都無諗過原來中學小食部皇牌營多都係佢嘅!佢國際化嘅程度令筆者不禁即刻萌生敬意…係一堆陳列品嘅最右手邊就有一個小劇場，係講安藤百福先生發明即食麵嘅經過。可能因為去呢間博物館好多都係小朋友，所以影片都係用動畫形式，一啲都唔會悶，仲畫得好得意~所以強烈推薦大家去博物館嘅時候一定要睇下～
劇場完左就會去到資料區，就係講返發展經過同埋變遷史等等，不過有好多資料係動畫裡面經提過，所以睇完會更易了解﹐因為資料性內容好多，所以呢度筆者就唔仔細講啦，等大家去到嘅時候慢慢參透下。
上多一層就係最多人亦係呢個博物館最出名嘅環節，就係自製杯麵啦！每人只限整一個杯麵，而且因為參加人數好多，所以係買入場票嘅時候經要講定要整杯麵，咁就會有一張整理券，需要係整理券上面指定嘅時間先可以進場嫁！每整一個只係需要300yen，其實都幾抵，同平時買個都差唔多~雖然話係自製，不過大家唔好想像到個麵係自己一手一腳整，其實基本上所有步驟都會有人幫你整，大家最主要嘅制作部份只係畫靚杯麵個杯。但杯係個麵嘅靈魂，係十分重要嫁！當買完杯，畫靚靚之後就可以排隊加材料，之後所有過程都會有人負責，自己只係負責諗要咩湯同咩材料就可以了～不過大家可以透過睇住員工點樣製作自己嘅杯麵更加了解個過程，而且食落又真係幾好食嫁！可能材料特別新鮮(杯麵料都可以新鮮係真嫁！)
上到頂樓就係餐廳同埋兒童遊樂場，出面仲有個露台可以睇曬成個橫濱港，真係好靚～講真，呢度嘅景色同埋氣氛仲好過俾錢係塔睇…
佢個兒童遊樂場亦都好特別嫁，配合返主題，小朋友就好似去左製麵廠咁樣遊歷，特別好欣賞佢呢條扮係輸送帶嘅滑梯(小朋友個patpat可能其實因為咁滑到好痛…)
側邊餐廳有賣多種唔同國家風味嘅麵食，仲有一款會啱你好味！而且每碗都只係300yen！雖然個份量係細啲，但就算叫兩碗都只係600yen，都仲係好抵嫁～仲有元祖日清雞口味湯麵，只係賣150yen，不過joy就話一啖食得曬，咁諗按返比例可能真係要叫夠4碗…
另外俾發現到有杯麵味嘅雪糕！有好奇心嘅筆者緊係會試下啦！本身諗住試得就試個重口味嘅咖哩，但諗諗下好似傳統原味先試得出杯麵味，所以就揀左原味啦！
300yen其實都算幾大杯，大家無眼花，佢上面都係平食杯麵嘅配料。其實佢個雪糕好似係普通牛奶味，但夾埋啲鹹鹹脆脆嘅配料又出奇地夾，都幾好食！整到筆者下次都想拎配料試下撈雪糕食。
離開左杯麵博物館跟住堆指示牌大約行十分鐘左右就會去到好出名嘅紅磚倉庫。紅磚倉庫都幾大下，有分1同2號館。裡面有好多唔同嘅特式小舖，都可以行到好耐下嫁～另外仲有定期展覽，筆者去個日就係舉行緊miffy展，但因為對miffy興趣不大而且800yen入場都幾貴所以就無去到啦。
係2號館出面嘅平台仲有一個叫戀人鐘嘅地方，話只要兩者同時敲響個鐘就會幸福。想要幸福嘅筆者於是好霸氣咁自己一個左右手敲響兩個鐘…結果所有人(包括樓下)都同時望上尼發現左呢個霸氣嘅舉動…
離開左紅磚倉庫之後可以沿海慢慢散步到最近嘅車站搭去中華街，中華街都真係幾大，仲有分好幾個區域，唔留神係會完全迷失左係裡面。
中華街其實大部份舖頭都係主要分成兩個類型：賣食物同埋占卜。係朝陽門門口見到有一間賣爆汁生煎包就忍唔住試下啦，500yen4個，佢啲湯汁真係多到唔講得笑！唔小心都係熱親嘅程度尼。個皮仲煎得好香脆，如果行李仲有位筆者應該就會買左包返去自己煎！推薦推薦。
行落大家就會發現所有中華料理近8成店都係做緊放題，平日嘅價錢更只係1680-1980yen(未連稅)大約百三蚊左右就食到餐放題，仲寫到有成百幾樣菜，筆者都決定試一試!但基於所有舖價錢，圖片，樓面都差唔多一模一樣所以就隨便搵左間入去。大家留意，要過要埋野飲放題係要另外俾錢，不過其實都只係350yen，就算唔要都可以自己飲水或者點湯。
每碟都幾大下嫁，大家唔好太興奮一次過叫成打。總括而言味道其實比想像中好，不過點心就當然比唔上香港啦～大約係香港嘅7/8成功力啦，都唔錯嫁啦，仲要可以任食。如果安全建叫海鮮類特別係蝦仁帶子個啲就一定好食，始終用料新鮮，帶子都甜。
見到成條中華街特別係餐廳嘅都係中國人，講得一口流利普通話，於是就諗：唔通睇相嘅都係識講普通話！﹖而且睇相平過廟街好多，睇掌只係1000yen，算命3000yen，100蚊唔洗值得一試！於是就去左問，點知一問原來佢地所有睇相嘅都係同一批人，都係日本人。正諗住放棄嘅時侯一個傳單大叔介紹左去一間話唔識日文都可以，於是筆者就去左試啦～
去到都係日本人，但佢就話聽得明英文，雖然佢全程只係望左個掌幾眼，但就講左好多好多好資料性嘅野，講明幾多歲會點幾多歲會點，整到筆者都有啲緊張，佢仲講埋幾種問題，其實筆者最後都聽明8/9成，但係佢就話見係外國人，佢自己又講解得唔清楚俾我地知，當交個朋友唔收錢。希望真係準啦，大家如果有興趣都可以試下，1000yen真係好平，而且佢地講得都幾仔細，不過準唔準就暫時未答到大家住啦～
全力支持：大新銀行、香港航空、中國平安保險
About Post Author
