[不敗日記] 新宿元祖章魚燒！
博客 東京 生活

[不敗日記] 新宿元祖章魚燒！

By 新東方不敗 / 2016-03-08

今次既[不敗日記]會同大家介紹我每次黎東京都必去既地方！
就係，新宿既章魚燒店《元祖どないや》
 
[不敗日記] 新宿元祖章魚燒！
 
記得第一次黎，係日本既契媽帶我黎食架～
呢間鋪既位置同K4 Studio好近，方便睇Live之前去填飽個肚。
有追開Live既朋友應該都知道，睇場Live係需要大量體力去做Furi，去跳舞，去Fing頭～～
 
[不敗日記] 新宿元祖章魚燒！
 
呢張相係第一次黎食時影架～當時同契媽同兩個姨姨黎食～
唔經唔覺～已經兩年lu～～～
相比起香港一盒6粒，呢到係有8粒架！而且size係比香港既大粒少少～
所以，最初我只係食左6粒，淨返2粒係到，唔係幾好意思～～
 
 
係2014年冬天，我又同契媽黎食～
喇！有圖有真相～我真係成日黎食架～
絕對唔係睇閃閃書介紹俾大家～真心同大家分享架～
 
[不敗日記] 新宿元祖章魚燒！
 
我同契媽最中意食就係呢款，叫做《てりたま》既味道～
上面黃色既係蛋黎架～配上特製醬汁，好香口，真係超好食！！！
最初我係諗住食普通味，但契媽叫我試下呢個～
點解呢？係因為Visual Band《怪盜少年》既結他手蓮さん經常係Twitter推介呢隻味！
 
[不敗日記] 新宿元祖章魚燒！
 
契媽好中意蓮さん，所以叫我一定要試！
點知，真係一試便愛上……《てりたま》
我當蓮さん係哥哥黎咋～～～
 
[不敗日記] 新宿元祖章魚燒！
 
俾大家睇下Menu先～其實仲有好多味架，但我真係覺得《てりたま》係最好味！
因為有d味都幾伏下……
我今次去食就中左伏喇……
 
[不敗日記] 新宿元祖章魚燒！
 
呢隻係《だし》，無醬汁，無蛋，要夾起放落隔離碗湯浸一浸黎食。
我就真係諗極都諗唔明，章魚燒明明外層都脆脆地，咁先好食架嘛…
但係浸完之後，變左軟林林，無左個層次感……
 
[不敗日記] 新宿元祖章魚燒！
 
呢個叫《チリマヨ》，初頭聽店員講話係辣辣地，咁諗住應該幾好食……
個樣望落係好似好好食，但係呢，食落去根本就係M記泰式辣醬溝水！！！
 
 
 
契媽當時拍到我個樣係咁…你睇我樣就知…中伏！！！
大家真係咪鬼食呢隻《チリマヨ》，俾d泰式辣醬溝水浸到軟哂，一夾就爛！
辣又唔係真係辣…放落口好似一pe蛋醬咁…唔知自己食緊咩……
我以後都唔會再叫呢個！打死都唔會！！！！！
 
真係最好食就係《てりたま》！食左咁多次都食唔嫌！！！
其實呢間店，仲有其他野食架～俾大家睇睇啦～
 
[不敗日記] 新宿元祖章魚燒！
 
我除左章魚燒之外，其他野係未食過，所以俾唔到咩意見感想大家。
或者，大家下次食完返黎話我知好無食都得架～
 
[不敗日記] 新宿元祖章魚燒！
 
都有啤酒個d飲，可以同朋友坐低吹下水，食下章魚燒，啤啤佢！
 
[不敗日記] 新宿元祖章魚燒！
 
佢有呢個餐俾你嗌，1－8號既章魚燒配一杯野飲，係1000yen～
但我計落都唔係平好多…所以無嗌餐，就咁散叫，飲水就得。
 
大家去日本既，不妨試下丫！
唔一定去新宿先食到，係好多地方都有分店架。
 
官網︰http://www.donaiya.jp/
 
＝＝＝＝＝我是低B分隔線＝＝＝＝＝
 
《東京大神宮》真係好靈！情箭真係好西利！
我既戀愛運真係增強左好多！識左好多架仔！仲要好靚仔！
有一個仲要有d似周國賢！不過，佢話自己唔似喎～～
當知道我整親手時，佢放低手頭上既工作，走黎幫我貼膠布～
 
 
不經意的溫柔，暖入心頭。
呢張相，我唔敢post係Twitter，怕俾佢見到～
細心溫柔體貼既男仔，果然係典型既雙魚男～～
可能因為我係巨蟹座，所以覺得同佢特別夾～～～
 
佢知我寫開膽量挑機，就同我講左好多有關日本既鬼故。
同佢真係傾唔停架～突然間…
就俾另一個男仔嗌我，話送我返屋企……
 
唔…感覺…好怪……有無人明？
 
[不敗日記]除左介紹吃喝玩樂外，都會同大家分享下我係日本發生既感情事～
希望同大家好似朋友咁，傾下心事～
中意得日本，唔多唔少都會想同架仔拍拖架嘛＝3＝
有咩感想既話，都可以留言俾我，或者inbox俾我架～

景點位置

About Post Author

[不敗日記] 新宿元祖章魚燒！

新東方不敗

See author's posts

Tags: , , , ,