![[不敗日記]追星追到同Bandman做訪問](https://www.likejapan.com/wp-content/uploads/2016/05/thumbnail/1139_20160519171204.jpg){kind=small}
唔知大家有無睇上次篇[不敗日記]帶你去歌舞伎町搵靚仔牛郎呢？
未睇嘅就快d去睇咗先！http://www.likejapan.com/fuhai13
相信有唔少人都同我一樣係追星族，都好想拉近同偶像之間嘅關係，縮短大家之間嘅距離。
但係，談何容易呢？追香港明星都已經難時，何況係追日本明星呢？
我好幸運地成為Like Japan嘅Vlogger，可以成日嚟日本，放假時可以去追Live。
不過，更幸運地係我有機會同自己偶像做訪問！
「想跟偶像談戀愛﹐要為萬人迷喝采」
![[不敗日記]追星追到同Bandman做訪問](/2016/05/editors/296/20160519160453_cAe4NuoE.png)
好多人都會有疑問，真係十萬個為甚麼呀！！！
今集嘅[不敗日記]就會坐定定～同牛郎同Bandman做訪問～
問吓佢地究竟點解會做牛郎？做牛郎有咩咁開心？有D咩辛酸史？
好！事不宜遲！
我地一齊嚟睇今集嘅「追星追到同Bandman做訪問」
GO！GO！GO！
＝＝＝＝＝我是低B分隔線＝＝＝＝＝
我︰請大家自我介紹
![[不敗日記]追星追到同Bandman做訪問](/2016/06/editors/296/20160614174700_dLFRRhAh.png)
DOG.︰我喺LAGLESS嘅主音，DOG.！今年20歲！
![[不敗日記]追星追到同Bandman做訪問](/2016/06/editors/296/20160614174700_hsUjL1RB.png)
翼︰我喺LAGLESS嘅結他手，翼！年齡係秘密！
（講呢d喎係到…真係吖…仲要問返我轉頭＝ ＝」）
![[不敗日記]追星追到同Bandman做訪問](/2016/06/editors/296/20160614174700_gHF9Ymst.png)
Ko-ki︰我喺REALIVE嘅Producer，Ko-ki！今年26歲！
我︰係因為d咩嘢有呢間牛郎店㗎？
![[不敗日記]追星追到同Bandman做訪問](/2016/06/editors/296/20160614174700_RRv1DbJQ.jpg)
Ko-ki︰以前一直喺ViViD呢隊Band，夾Band個時，一直都有咁嘅想法，一邊夾band，一邊搵錢。為咗下次組Band，我地盡力倏好。為咗做一個咁樣嘅環境，所以開咗呢間鋪頭。
（我超痛恨自己唔係男仔，如果我係男仔，就應該唔係做訪問，係嚟見工同實習XD）
我︰同其他嘅牛郎店有咩唔同呢？
![[不敗日記]追星追到同Bandman做訪問](/2016/05/editors/296/20160519160828_oGZAfutr.png)
Ko-ki︰如果講唔同嘅地方，呢度有舞台，係個度有Show Time，有Live，主要係樂器表演。喺到做嘢嘅大家都係追緊夢想，夾緊Band，做緊Model。雖然有唔同嘅夢想，但呢到係擁有夢想嘅地方，同音樂有關嘅夢想。
我︰好偉大呀～
Ko-ki︰好偉大咩？夢想，其實都無㗎。哈哈，佢地就擁有夢想。
（大家笑～～）
我︰同其他牛郎有咩分別呀？
Ko-ki︰多數大家都識玩樂器，而且都係追尋夢想！
我︰究竟唔係好識日文可唔可以入嚟呢？外國人可以嚟嗎？
Ko-ki︰Of cause！當然可以啦！好多外國人都嚟㗎！
我︰咩類型嘅客人比較多呀？
Ko-ki︰20代嘅女性客人比較多，當然都有唔少類型嘅客人，唔，鍾意視覺系、鍾意有型靚仔嘅客人都好多。
我︰請講講音ホス（音樂牛郎）嘅魅力。
DOG.︰喺武道館或東京Dome開完Live後，一齊嚟呢到，一邊食飯，一邊飲酒，嘻嘻哈哈咁好開心度過。
翼︰客人支持我地，我地可以夾band，拍PV，實現夢想。
我︰咁做音ホス（音樂牛郎）有咩咁好？
DOG.︰做音ホス（音樂牛郎）有咩好呀？唔…第一係提升說話能力，識講嘢就自然搵得多d錢。而且，Band嘅質素都真係上升。始終，如果普通咁夾Band嘅話，有好多嘢都做唔到。因為有好多嘅資金，想做嘅做全部都可以做得到，所以覺得呢樣係最好嘅事。
![[不敗日記]追星追到同Bandman做訪問](/2016/06/editors/296/20160614174700_nDfPhxFA.png)
翼︰我做音ホス（音樂牛郎）最好嘅事就係，同DOG.相遇！無佢嘅話，我唔會做牛郎。
![[不敗日記]追星追到同Bandman做訪問](/2016/06/editors/296/20160614175226_NiAleWwo.png)
（DOG.就狂笑，我就好努力控制自己唔好暴走，因為對腐女嘅我嚟講，好鬼BL，滿滿嘅愛包圍我地＝w＝）
我︰咁有無咩辛酸事呀？
DOG.︰辛苦事呀？一定係朝早起身，去Studio夾Band，夾Band唱歌三個鐘之後就返工，成晚飲酒。訓覺時間真係好少，真係好攰㗎，好想放假呀！
翼︰我就無咩喎～
我︰真係無辛苦事咩？
翼︰唔係，都有嘅～
我︰話我知～
Ko-ki︰有辛苦事㗎！
翼︰我呢～有少少～鍾意咗客人～
我︰戀愛？
翼︰係呀！每日都戀愛呀！
做做吓訪問，DOG伸個頭埋嚟我到，細細聲叫我教佢講「各位靚女，我愛你」！
而Ko-ki就因為幾年前嚟過香港台灣表演，所以就唔洗教。不過就調轉咗普通話同廣東話（笑）
翼就超Chok咁對住鏡頭講，好在唔係對住我講！我怕我噴鼻血！
嘛…由於佢地本身係Bandman，即使做牛郎，都同其他牛郎唔同，無特別服務提供㗎！
但係！如果你好似我咁好彩嘅話，就可以俾佢地拖手仔帶入店，搭住膊頭一齊坐梳化傾計，離開時嚟個深情擁抱～
咁當然啦，都係睇吓對方（牛郎）肯唔肯營業你！如果佢肯嘅，應該咩浪漫大膽嘢都有可能發生喺你身上！（笑）
＝＝＝＝＝我是低B分隔線＝＝＝＝＝
![[不敗日記]追星追到同Bandman做訪問](/2016/06/editors/296/20160614175643_l5GJY7Z5.jpg)
嘛…係之前篇[不敗日記]都有講過，我以前係追ViViD！
訪問當日，我好努力控制自己情緒咁坐係Ko-ki隔離。
原諒我太緊張，日文講得窒窒地，明明平時好鬼流利＝ ＝」
![[不敗日記]追星追到同Bandman做訪問](/2016/06/editors/296/20160614175440_EQRLCuzQ.jpg)
為咗追星，我可以去到幾盡？
我試過剪短髮而女扮男裝夾Band，又試過錄音整CD送俾ViViD，又又試過去機場接機，又又又試過同佢地助手傾計，又又又又試過同佢地經理人傾計，又又又又又試過同佢地社長傾計！
哈哈哈，真係數之不盡呀！但係，點都估唔到我竟然有同鼓手Ko-ki做訪問嘅一日！！！
大家明唔明我嘅心情係幾咁激動呀！？
![[不敗日記]追星追到同Bandman做訪問](/2016/06/editors/296/20160614174700_1uU8n5os.jpg)
想當年追星時，想要同佢影一張合照，一係買一本寫真集去攬攬會先有得影合照同俾佢從後攬攬！
一係就幫襯佢買佢設計嘅Goods滿10000yen先可以影一張合照！！！
所以，我係超級超級超級激動！！！完全覺得自己係發緊夢！！！！！
我係唔會話你知，曾經喺攬攬會，Ko-ki從後攬實我，之後喺我耳邊不停講「我愛你」㗎！（喂！你明明就講緊XDDD）
![[不敗日記]追星追到同Bandman做訪問](/2016/06/editors/296/20160614175643_P6k6Vdp5.jpg)
喺年半前，經介紹下而識咗當時仲係叫和希嘅DOG.～
當時，仲未組Band，只係隔唔中喺Session Live到唱吓歌，但已經感覺到佢對唱歌嘅熱誠。
到而家，佢終於組Band，做主音，拍PV，出CD，真係好感動！
我就梗係200％支持佢啦！！！
![[不敗日記]追星追到同Bandman做訪問](/2016/06/editors/296/20160614175440_5HiXCbqr.jpg)
翼佢真人真係幾靚仔，我係唔敢直視佢囉～
我無諗過佢喺鏡頭面前向DOG.公開示愛！其實平時睇Twitter，佢d留言都係充滿著愛！睇得出佢好愛DOG.！
但係，DOG.係屬於我㗎！（誤）
翼，你都係專心夾Band啦！！！
喇！各位巴打、絲打！如果想睇多d日本夜生活，新奇刺激有趣嘢嘅話，就記得Like同Share呢篇文呀！
仲有仲有仲有！Follow我Facebook專頁！成日放去日本玩嘅相，有咩日本荀嘢都會同大家些牙㗎！
所以，請繼續支持我～快d Like～
最後，送上LAGLESS嘅Ending story MV！
About Post Author
![[不敗日記]追星追到同Bandman做訪問](https://www.likejapan.com/wp-content/uploads/2018/09/1-1471327241-150x150.jpg){kind=avatar}