![[不敗日記]帶你去吉祥寺嘅幽靈居酒屋](https://www.likejapan.com/wp-content/uploads/2016/06/thumbnail/1470_20160623115856.jpg){kind=small}
又係我新東方不敗，今次帶大家嚟到吉祥寺！做咩呢？
相信平時大家都有睇開我寫嘅膽量挑機，有一篇係寫我去吉祥寺嘅井之頭公園靈探！
咁去靈探之前，都要醫吓個肚嘅！
所以，今集不敗日記就帶大家去吉祥寺超出名嘅幽靈居酒屋！！！
何？なに？（＠0＠」）
你無聽錯無睇錯！我真係帶大家去對住d鬼食飯！！！
好！我地一齊GO！GO！GO！
都未行到去間鋪，就已經聽到d詭異音樂喇～
一抬頭就見到間鋪門口掛咗個超大白色燈籠m(＝w＝)m
![[不敗日記]帶你去吉祥寺嘅幽靈居酒屋](/2016/06/editors/296/20160624180440_ESG4zrog.jpg)
一入去，就見到好多骷髗骨嘅嘢放咗係地下，仲有條女屍掛係樓梯位！
條樓梯係超黑！真係超黑！我行落去個時，都好驚會差錯腳碌落去！
仲要行行吓，無啦啦噴風著燈，當堂嚇到個心離一離！
之後開門入去啦，雖然有返d燈光，但都係又暗又紅！
抬頭一望，嘩！唔係呀fa！！！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_fenpefWZ.jpg)
勁多「人手」係到囉，幾可亂真！
之後望望隔離個廁所位！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_JbBKI8JM.jpg)
感覺好似入咗去，出唔返嚟咁……
之後視察吓環境…
![[不敗日記]帶你去吉祥寺嘅幽靈居酒屋](/2016/06/editors/296/20160624180410_fLJIEIYe.jpg)
硬係覺得佢會突然講嘢咁（汗）
女鬼店員就隊咗個「全球獨一無二Like Japan神主牌」俾我＝0＝
![[不敗日記]帶你去吉祥寺嘅幽靈居酒屋](/2016/06/editors/296/20160624180410_OXCQkepB.jpg)
好在唔係寫我名上去啫…（汗）
我就周圍行，參觀吓，俾放喺正中間嘅棺材吸引著！！！
女鬼店員就同我講話係真‧棺材嚟！話可以俾客人訓入去體驗吓喎！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_uuUOHlu1.jpg)
我好驚女鬼店員捉我入去，我就勁快返埋位坐！
點知呢，張枱放咗好多道具！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_aUhIhGG2.jpg)
有個好似法海大師成日拎住果個砵，仲有埋支木棍俾你敲！
女鬼店員話，只要一敲，就可以召喚佢過嚟。
當見到佢時，就舉起隻假手，咁就可以引到佢埋嚟你身邊！
咁好玩，我就梗係要試吓啦！
果然，一敲就召喚到女鬼店員過嚟！
由於好肚餓，就叫女鬼店員發板起菜！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_iBLiQvga.jpg)
第一道地獄小食︰芝士眼球
不得不佩服日本人嘅細心，竟然連血管都整埋出嚟！！！
其實初時，一見到，我係以為酒心棉花糖，咬落去會有流心！
點知呢，無喎！成粒都係芝士！！！
身為芝士控嘅我就梗係超鍾意食啦！不過，對芝士一般般嘅人嚟講，可能就……
![[不敗日記]帶你去吉祥寺嘅幽靈居酒屋](/2016/06/editors/296/20160624180410_aCZkPFKw.jpg)
第二道地獄小食︰稻草人炸薯餅
我以為係就咁成塊炸薯餅啦，點知又唔係喎！
頭同手腳都係唔同嘅嘢食，都幾得意。
而且，放咗係枱一陣先食，但係都仲熱！讚！
![[不敗日記]帶你去吉祥寺嘅幽靈居酒屋](/2016/06/editors/296/20160624180410_b12UYwTE.jpg)
第三道地獄小食︰單腳傘炸魚餅
一見到，就諗起鬼太郎入面個單腳傘！
本身魚餅無咩味，用煙肉做條脷，帶少少咸味，唔錯！
就係我食食吓時，無啦啦……
![[不敗日記]帶你去吉祥寺嘅幽靈居酒屋](/2016/06/editors/296/20160624180410_lgBMUSw6.jpg)
第四道地獄小食︰鐵板燒肉
店員叔叔倒咗d酒落去，之後點火，突然超大火係我面前！
![[不敗日記]帶你去吉祥寺嘅幽靈居酒屋](/2016/06/editors/296/20160624182538_662ejGD3.png)
我除咗識係咁「嘩！嘩！嘩」之外，隔咗陣先load到係「地獄之火」！
真係無諗過！超Surprise囉！
由於有倒d酒落去再用火燒過，令d肉更香！
最後一道地獄小食︰天堂人間地獄炸薯波
女鬼店員無啦啦放低個香爐，叫我地每人揀一支。
咁我揀先，就揀中間，之後叫我地一齊食。
![[不敗日記]帶你去吉祥寺嘅幽靈居酒屋](/2016/06/editors/296/20160624182741_PjRd5xy5.png)
其實個陣，都唔知發生緊咩事。
到我咬落去，嘩！Wasabi！呀！！！！！（暴走mode）
點解會有Wasabi㗎？我最憎就係Wasabi！呀！！！
係無夾埋！我同Poli同車神都唔知發生咩事！！！
我再重申！真係無夾埋！真係無夾埋！真係無夾埋！
點解？點解我又中伏？我係咪咁黑仔？黑仔成咁？？？
女鬼店員送個「遊麗」紙牌俾我，仲幫我綁喺個頭到！
之後又隊個木框俾我影「遺照」 （＝～＝」）
![[不敗日記]帶你去吉祥寺嘅幽靈居酒屋](/2016/06/editors/296/20160624180410_sfdqdu3V.jpg)
影完相，女鬼店員仲幫我著白装束（しろしょうぞく），即係壽衣！
![[不敗日記]帶你去吉祥寺嘅幽靈居酒屋](/2016/06/editors/296/20160624181652_NHycdNjw.jpg)
然後呢，女鬼店員就帶我去棺材度。
好啦！為咗呢份工，我可以去到幾盡？
就係…訓！棺！材！
![[不敗日記]帶你去吉祥寺嘅幽靈居酒屋](/2016/06/editors/296/20160624182029_v6rQeOc4.jpg)
大吉利是！百無禁忌！
不過我覺得我扮得隔離個公仔都幾似㗎！哈哈哈！
總結︰呢間幽靈居酒屋環境氣氛超正，食物味道亦都唔錯！
充滿驚喜！真係超好玩囉！十分推介大家成班朋友去玩！！！
記得繼續支持我呀！等我繼續帶大家周圍去玩！
記得記得Like同Share！否則，我就……
![[不敗日記]帶你去吉祥寺嘅幽靈居酒屋](/2016/06/editors/296/20160624181652_6Ql4b5YF.jpg)
嚇死你未？問你怕未？哈哈哈
「遊麗」 居酒屋
地址︰東京都武藏野市吉祥寺南町1～8～11地中1階
電話︰0422（41）0194
營業︰下午5時至終電前（年中無休）
註︰如有不定期活動，星期六日及公眾假期於下午3時開始營業
About Post Author
![[不敗日記]帶你去吉祥寺嘅幽靈居酒屋](https://www.likejapan.com/wp-content/uploads/2018/09/1-1471327241-150x150.jpg){kind=avatar}