![[不敗日記]帶你去原宿占卜戀愛運](https://www.likejapan.com/wp-content/uploads/2016/06/thumbnail/1359_20160610144256.jpg){kind=small}
喂！又係我新東方不敗！
今集嘅[不敗日記]帶你去原宿占卜戀愛運～（心）
有睇開[不敗日記]嘅巴打絲打都知我成日去神社求戀愛！亦都知我同㗎仔曖昧中！
究竟幾時先有拖拍呀？幾時先結到婚呀？成日叫我等等等！究竟要等到幾時！？（怒）
相信有唔少絲打同我一樣，去親日本都會去神社求簽，求到「大吉」，但係等咗好耐都無拖拍！！！
所以，我唔等喇！我決定要去占卜！！！
![[不敗日記]帶你去原宿占卜戀愛運](/2016/06/editors/296/20160610173308_HsrvKhYR.png)
話說我成日出沒原宿，原來喺竹下通嘅內巷有個占卜嘅地方－－塔里木！
唔講唔知，間占卜館都幾出名㗎！好多明星都有搵入面嘅占卜師問戀愛運同工作運㗎！
就連我大愛嘅ViViD，以前都有搵過占卜師占卜過前程！！！
好！我決定要搵過同我一樣咁Rock嘅占卜師幫我占卜戀愛運！！！
![[不敗日記]帶你去原宿占卜戀愛運](/2016/06/editors/296/20160610173308_SRLTQctq.png)
館內，有好多占卜嘅工具同水晶擺買，有興趣嘅巴打絲打，下次去時，可以買返副塔羅牌返去玩！
我就唔買lu～ 因為我本身就有三副塔羅牌～ 仲有水晶陣～（笑）
咁喺占卜之前，係要先填張form，寫低個人資料，例如姓名、生日、血型、電話、地址等等～
仲有，就係選擇你想問咩類型嘅問題，戀愛？工作？財運？家庭？
![[不敗日記]帶你去原宿占卜戀愛運](/2016/06/editors/296/20160610173308_Zti6xbiB.png)
由於1000yen，得10分鐘時間占卜，所以要事先諗清楚自己想問d咩～
我係占卜之前，就好清楚咁同占卜師講…我好想知…
我幾時有拖拍？幾時結到婚？對方係點樣嘅人？
![[不敗日記]帶你去原宿占卜戀愛運](/2016/06/editors/296/20160610174519_3m2tPth0.png)
唔係講笑，占卜個時，我真係堅‧緊張！！！
抖大啖d氣都唔敢！你明唔明？你明唔明？我嘅幸福！我嘅幸福！！！
一開始，占卜師喺個袋仔到抽咗三粒印有英文字母嘅石仔～
佢睇咗一睇，就皺埋眉頭，放d石仔埋一邊…
大師！你唔好嚇我呀！我嘅幸福就喺你手上＝0＝
![[不敗日記]帶你去原宿占卜戀愛運](/2016/06/editors/296/20160610174519_sHqTDhZm.png)
大師就開始洗塔羅牌，然後就同平時玩塔羅牌一樣，叫我將三疊牌搭成一疊！
之後就有d唔同喇，平時係占卜師攤開哂d牌，整到成把扇咁俾你抽牌㗎嘛～
但係，今次呢，就大師每逢第七張牌就抽出嚟～
![[不敗日記]帶你去原宿占卜戀愛運](/2016/06/editors/296/20160610173308_xe679MiE.png)
結婚對象係點樣嘅人？
一開波，大師個樣超苦惱～諗咗好耐～突然之間…
大師爆咗句「結婚對象唔會係第一次見就有感覺嘅人！只係話第一次見面！但係實質都應該接近你理想嘅人」
究竟係邊個？我個腦不停諗，究竟邊個係我第一次見時無感覺呢？
已經有人選喇…㗎仔周國賢！第一次見佢時，覺得佢唔係我杯茶，只係特別夾，好多話題傾！
![[不敗日記]帶你去原宿占卜戀愛運](/2016/06/editors/296/20160610183127_Xp0u13dA.png)
![[不敗日記]帶你去原宿占卜戀愛運](/emoji/emoji_261d.png){kind=small}
喇！有圖為證！係之前嘅[不敗日記]我有講過㗎！![[不敗日記]帶你去原宿占卜戀愛運](/2016/06/editors/296/20160610173308_LQa5vIhn.png)
幾時先有拖拍？
大師話我本身今年係有機會拍拖，但係我諗太多。
仲話我唔夠坦白講出自己感受話俾對方聽！要我直接d！！！呢一句真係超中！！！
因為我之前明明想同㗎仔周國賢示愛講「好きだ（我鍾意你）」，但因為我太怕醜，結果我講咗「大嫌い（我好討厭你）」
![[不敗日記]帶你去原宿占卜戀愛運](/2016/06/editors/296/20160610175632_Usg6Fp49.png)
為咗進一步確認我嘅真命天子係咪㗎仔周國賢，我就問大師，我嘅真命天子係咪日本人！
大師好意外我喺鏡頭前講而家鍾意嘅人係日本人，咩姐？唔得咩XDDD
有睇開我Facebook專頁，就知我周旋於㗎仔周國賢同㗎仔Y君之間～
咁大師就話幫我占卜吓，如果同佢地發展會係點～
![[不敗日記]帶你去原宿占卜戀愛運](/2016/06/editors/296/20160610173308_MmZ61DXE.png)
等我講吓先～A君＝㗎仔Y君，B君＝㗎仔周國賢
大師話B君同我興趣相投，好適合我，但就唔知算唔算係戀愛嘅感覺。
又話如果俾我揀，我會揀A君，之後仲話如果今年我同A君真係拍拖嘅話，好大機會結埋婚！！！
吓！？唔係呀嘛！？我聽完之後，係呆哂！
因為呢，我係n年前就同自己講，如果邊個嚟香港搵我嘅話，我就嫁邊個。
而㗎仔Y君就話下個月會嚟香港搵我lo！！！
呀！！！唔係呀嘛！！！雖然有拖拍，嫁得出係好開心，但係我想係㗎仔周國賢！！！！！
好啦，仲有半年時間，2016年先byebye！
咁就睇吓我有無拖拍，同邊個拍拖，結唔結得成婚啦～
有咩最新發展，我都會喺Facebook專頁向大家報告！
如果，我今年真係結得成婚，我一定請大家飲！！！
![[不敗日記]帶你去原宿占卜戀愛運](/2016/06/editors/296/20160610180307_krNZB5SO.jpg)
原宿占い館 塔里木（TARIM）
營業時間︰11：00～21：00（最後約見時間20：00）
電話︰03－3497－5825
地址︰東京都渋谷区神宮前1-8-21 ラレンヌ原宿1F・B1F
喇！如果大家有興趣玩占卜嘅話呢～下次去竹下通搵大師啦～
1000yen，10分鐘，玩塔羅牌又得，睇掌相都得～
不過，超時要加錢㗎～
講真，兌返港紙都係70蚊，玩吓無妨吖！反正都平過你喺廟街睇相！係咪先？
好啦～下次見～ByeBye你條尾～
About Post Author
![[不敗日記]帶你去原宿占卜戀愛運](https://www.likejapan.com/wp-content/uploads/2018/09/1-1471327241-150x150.jpg){kind=avatar}