講起上野樹里，相信最多人會首先諗起污糟邋遢但可愛嘅鋼琴天才－野田妹，繼而有《Last Friends》入面嘅瑠可、電影《向陽處的她》嘅真緒、或者係佢嘅電影處女作《喇叭書院》。
2000年，上野樹里參加小學生模特兒選拔被經紀公司相中，開始參與廣告試鏡及演出。2001年擔任P&G廣告代言人進入演藝界。2003年上野出演NHK晨間劇《開朗家族》開始受到矚目，同劇終於今時今日已經係女神級別嘅石原聰美。
2004年，佢被提拔主演電影《喇叭書院》，飾演女主角鈴木友子，更因此獲得第28回日本電影金像獎新演員獎等數個電影新人獎項。
2006年，佢同玉木宏雙主演經典日劇《交響情人夢》，飾演污糟邋遢但可愛嘅鋼琴天才野田惠。呢個角色唔單止令佢奪得多個最佳女主角獎項，呢套劇更瘋魔亞洲，佢同玉木宏大熱、成為話題！當時真係相信無人會唔識「野田妹」同「千秋王子」呀！
2008年，上野樹里出演富士電視台劇集《Last Friends》，同劇卡司強勁，包括有瑛太、長澤雅美、錦戶亮、水川麻美等。佢亦憑飾演同性戀角色岸本瑠可以獲得助演女優賞等獎項，喺大眾心中已經係實力派女演員。
2011年，佢主演NHK大河劇《江 戰國三公主》，首次出演時代劇已經擔任女主角，成為話題。
2013年，上野同松本潤首度共演愛情電影《向陽處的她》，極度唯美畫面加上窩心戀愛劇情，令電影於日本當地票房紀錄破了17.9億日圓。
2014年，上野主演TBS日劇《愛麗絲之棘》飾演復仇女醫生，與一向形象同風格相異，帶來不一樣嘅精彩演出。
2015年，上野樹里出演日劇《無間雙龍》，同生田斗真、小栗旬等實力派男演員共演。
2016年5月，上野樹里宣布已經成為人妻，同搖滾樂團TRICERATOPS主唱及結他手和田唱結婚！
雖然上野樹里從來都唔算係多產量女演員，不過都keep住有精彩作品帶畀各位觀眾。期待成為人妻後嘅上野樹里飾演媽媽級角色，相信都會好好睇！
5月25日，上野樹里生日快樂！
About Post Author
