北海道高級旅館｜不要以為北海道淨係得美食多，其實連高級旅館都有唔少！不過要同時有好野食、有靚景、又要住得舒服的話，真係唔請教吓啲北海道資深旅遊達人都唔會知！唔使騰唔使慌，今次為大家打聽到10間超歎嘅高級旅館，分別位於小樽、札幌、千歳市等，酒店房間內更有私人風呂或一泊二食，奢華享受，一生人必定要住一次！
北海道温泉旅館 1. 坐忘林
聽到「坐忘林」呢個名已經聯想到間旅館嘅環境一定好幽靜好舒服，果然冇令人失望！坐忘林位於二世古範位之內，四周被綠林包圍，攤喺床上面對全落地大玻璃窗，望住窗外綠色一片嘅林景，乜野煩惱都飛走哂！
呢間旅館有和室同洋室可以揀，全館只有15間客房，每一間房都係獨棟設計，房入面仲有獨立嘅露天同室內風呂，可以自己霸哂成個溫泉，私隱度滿分！除此之外，呢度仲有一個好值得一讚嘅環保小點子，就係暖暖嘅地板熱力竟然係來自溫泉泉水，唔浪費多餘嘅資源，非常環保！
呢度嘅料理由北海道出身嘅大廚主理，以北海道當造食材入饌製作出原創嘅鄉土料理，當中一定要試嘅就係圖中嘅「キタカイセキ」，盛載嘅器皿傳統得嚟又帶有些少摩登嘅味道，加上大廚嘅手藝，將食材最美味嘅一面激發出嚟！
坐忘林
- 地址：虻田郡倶知安町花園76-4
- 電話：0136-23-0003
- 詳情按此
海道温泉旅館 2. 翠山亭倶楽部定山渓
去旅行成日都留喺酒店hea好似好奢侈，不過當你嚟到「翠山亭倶楽部」如果唔花吓時間全身感受旅館嘅悠閒氣息就真係極浪費！呢度全館有14間房間，有和室、洋室、和洋室等等唔同房型，全部房型都有私人溫泉，歎到冇朋友！
食物方面，呢度可以試到和洋合一嘅懷石料理，每一道都係廚師嘅心血結晶，精緻到有少少唔係好捨得放入口！另外，旅館亦有提供酒精同非酒精飲品嘅暢飲放題，可以選擇喺Lounge飲或者返房同朋友慢慢飲，無論係同好朋友飲定同另一半飲，氣氛都非常唔錯！
翠山亭倶楽部定山渓
- 地址：札幌市南区定山渓温泉西2丁目10番地
- 電話：011-595-2001
- 詳情按此
北海道温泉旅館3. 心のリゾート 海の別邸ふる川
上面介紹嘅坐忘林坐擁林景，呢個「海の別邸」就迎臨海景，同個海近到好似直情起喺個海上面咁！呢間旅館個名起得好靚，「心之Resort，海之別邸」，聽個名就已經想像到入去過返晚夜會有幾relax！呢度全館有11種唔同房型總共30間客房，除咗可以同寵物一齊入住嘅房型之外，其他房型全部都有望海嘅落地大玻璃窗！
溫泉位置可以望到噴火灣絕景，望住個太平洋嚟浸溫泉，嚟過呢度先知道生活原來都可以平凡得嚟咁寫意。最重要嘅係，浸完有「美肌之湯」美譽嘅泉水之後皮膚滑一滑，唔怪得呢間旅館咁受女士們歡迎！
在餐廳「海の詩」，可以食到以北海道白老地區當造食材炮製嘅料理，好似白老牛、新鮮魚類、蘆筍等等，望住個全海景嚟歎美食，何其寫意！
心のリゾート 海の別邸ふる川
- 地址：北海道白老郡白老町虎杖浜289-3
- 電話：0144-87-6111
- 詳情按此
北海道温泉旅館4. 小樽旅亭 藏群
想試吓住傳統藏群嘅滋味的話呢度就最適合不過！「小樽旅亭」嘅房型比較特別，除咗有單層房間之外仲有複式單位可以選擇，透過傳統日式屏風嘅點綴，室內氣氛有幾分居家嘅味道。
話明係高級旅館，房間內當然亦設有私家溫泉，不過如果想感受吓當地嘅園林氣息，咁就一定要去埋可以聽到朝里川流水聲嘅露天溫泉，臨近嘅庭園一年四季都有唔同嘅迷人景致，靚到無話可說！
對於客人嘅私人空間， 小樽旅亭真係做得好好，連餐廳都係採用個室設計，喺完全冇外人嘅環境下品嚐以小樽當造食材製作嘅懷石料理，感覺好味咗10倍！（笑）旅館仲有一個好正嘅重點，就係Cafe「Clarte」入面嘅酒精同非酒精飲品、花生全部免費，拉個朋友一齊喺度飲吓野傾吓計真係非常唔錯！
小樽旅亭 藏群
- 地址：北海道小樽市朝里川温泉2-685
- 電話：0134-51-5151
- 詳情按此
北海道温泉旅館5. 支笏湖第一寶亭留 翠山亭
就喺支笏湖隔離嘅「翠山亭」環境非常幽靜，全館有29間客房，如果想住豪啲，一定要揀附有庭園露天風呂嘅特別客室，置身庭園中浸溫泉，咁奢華嘅享受，真係會畢生難忘！
館內嘅溫泉都記得要去潮聖一下，特別係有用咗樹齡有成1000年嘅古代檜整成嘅浴槽嘅內湯同寝湯，唔單止超舒服，仲充滿濃濃嘅歷史氣息！
旅館內有4間特色餐廳，可以食到懷石料理嘅「お食事処 苔庵」、可以睇住大廚製作燒烤美食嘅「グリル 苔庵」、提供午餐同蕎麥料理嘅「レストラン 草庵」、唔預約食唔到兼一日只提供5份法式料理嘅「創作フレンチ 支笏湖翠山亭倶楽部」，間間都食到最新鮮嘅北海道食材！
支笏湖第一寶亭留 翠山亭
- 地址：千歳市支笏湖温泉
- 電話：123-25-2323
- 詳情按此
北海道温泉旅館6. 定山渓温泉ぬくもりの宿 ふる川
由有100年歷史嘅古民家改裝而成嘅「ぬくもりの宿」係有濃濃居家味道嘅高級旅館，除咗特設可以同寵物一切入住嘅房型，仲有充滿時代感嘅和室房型，而館內被古木包圍嘅露天溫泉亦唔可以錯過，吊喺天花隨風搖曳嘅電燈泡、檜木浴槽、茶香爐，看似微不足道嘅配件全部都係旅館嘅歷史痕跡，好值得由心去感受！
最愛呢度嘅早餐可以食到田舍風和食，一路食住料理一路欣賞住餐廳帶有少少大正味道嘅室內設計，完全係理想早餐嘅模範！雖然呢間旅館好農家feel，但同樣都可以食到高級嘅手作料理，最奢華嘅一定係限定一日只有10set嘅北海道美食，仲可以喺土藏個室入面慢慢品嚐，唔話佢卧虎藏龍都唔得啦！
定山渓温泉ぬくもりの宿 ふる川
- 地址：札幌市南区定山渓温泉西4-353
- 電話：011-598-2345
- 詳情按此
北海道温泉旅館7. 定山渓第一寶亭留 翠山亭
已經開業有60年嘅「翠山亭」全館分為和室、和洋室等等唔同房型，加加埋埋有成17種房型總共60間客房，當中有半數房間嘅浴池一扭開水龍頭就可以浸到定山溪嘅泉水，想臨瞓前浸又得，起身即浸又得，超爽！
公用嘅大浴場採取男女交替制，唔理係男住客定女住客，都保證可以浸到極具特色嘅定山溪溫泉！
喺呢間旅館除咗可以選擇喺房入面用餐，亦可以到館內設有個室嘅「松庵」用餐，只要交代餐飲預算，就可以以有限嘅金錢食到用北海道食材製作嘅極級佳餚同北海道地酒！如果想親眼一睹大廚製作美食嘅過程，推薦大家一定要去「桑乃木」，所有山珍海味都係用備長碳嚟燒，有套餐亦可以散叫，營業到夜晚11點，臨瞓前去食返個宵夜先都仲得！
定山渓第一寶亭留 翠山亭
- 地址：北海道札幌市南区定山渓温泉西3丁目105
- 電話：011-598-2141
- 詳情按此
北海道温泉旅館8. 知床グランドホテル 北こぶし
喺被稱為世界自然遺產嘅知床，呢間大型嘅resort hotel「北こぶし」都可以話係當地住宿嘅表表者！房內嘅大玻璃窗，唔單止將知床室外絕景延至室內，仲好成功地為房間營造極舒適嘅開放感，住喺入面，簡直係帝王式享受！
位於8樓嘅大浴場都係旅館嘅一大賣點，室內嘅「大海原」、室外嘅「汐音」同「星の湯」向海一面全以大型玻璃窗取待傳統石屎牆，所以無論係夏天嘅海景定係冬更嘅流冰靚景，呢度都可以一覽無遺！
要食知床嘅真．滋味，咁就一定要早少少去試吓餐廳嘅早餐buffet，單單係早餐就已經有成50種唔同菜式，當中嘅蔬菜更加係由當地農家直送，新鮮程度可想而知！
知床グランドホテル 北こぶし
- 地址：斜里郡斜里町ウトロ東172番地
- 電話：015-224-2021
- 詳情按此
北海道温泉旅館9. しこつ湖鶴雅リゾートスパ 水の謌
「水の謌」係一間位於支笏湖被大自然包圍嘅高級旅館，唔同種類嘅房型都可以為旅客帶來唔同嘅住宿體驗，當中有附有展望浴池嘅客室、附設露天風呂嘅客室、和洋室同一般客房，室內設計勁有resort feel，舒服到check-in咗就想攤喺度hea！
大浴場嘅「しこつ美湯」又被譽為美人湯，柔和嘅泉水浸完之後即刻覺得自己皮膚又好咗人又靚咗！
如果你都係極注重養生同健康之人，呢度嘅餐廳「アマム」就啱哂！有得食超新鮮沙律同蔬菜之餘，料理更加係即叫即煮即食，賣相精緻可愛嘅甜品又任食唔嬲，美食當前真係會忍唔住食多兩件！
しこつ湖鶴雅リゾートスパ 水の謌
- 地址：北海道千歳市支笏湖温泉
- 電話：0123-25-2211
- 詳情按此
北海道温泉旅館10. あかん鶴雅別荘 鄙の座
想同時間睇到阿寒湖同綠林景色，仲唔係呢間位於湖畔嘅「あかん鶴雅別荘 鄙の座」！呢間高級旅館走古民家路線，只有suite room一種房型，室內空間唔止超大，仲附設私家露天風呂，想再寫意啲可以預約埋房內美容服務，歎盡喺香港極少機會可以歎到嘅貴婦生活！
「鄙の座」位於北海道東面，有住地理上嘅優勢，所以可以隨時食到新鮮海產！呢度嘅餐飲可以喺房間享用或者去特設嘅個室料理茶屋「ひな」享用，而早餐更加係由料理長親自主理，新鮮燒魚、漬物等等都已經被大家列為必食之選！
あかん鶴雅別荘 鄙の座
- 地址：北海道釧路市阿寒町阿寒湖温泉2丁目8番1号
- 電話：0154-67-5500
- 詳情按此
以上文章內容轉自：Relux
About Post Author
