一二蕃薯會：21世紀嘅日文歌改編廣東話詞

專欄：[香港在日本]

你有冇聽過《夕焼けの歌（夕陽之歌）》、《それが大事（這個很重要）》、仲有《俺たちの旅（我們的旅程）》？就咁睇啲名你未必會識，但一聽到個旋律，大家都肯定會即刻「啊～！」「原來係呢首歌！」以上三首歌雖然冇紅到嚟香港，但佢嘅廣東話改編就真係呢兩代人都一定有聽過！（嗯，至少年輕小編身邊嘅同學仔都識得⋯⋯）佢地就係《千千闕歌》、《紅日》同《前程錦繡》嘅原曲啦。

喺七、八十年代，好多廣東歌都係將日文歌嘅曲調添上廣東話詞，做就咗一首又一首燴炙人口嘅經典歌曲。不過隨住時代發展，香港人唔再依賴外地而係創作自己嘅旋律，另一方面大家都開始抗拒改編歌，而鍾情於最原始嘅版本，改編曲從此就漸漸淡出香港⋯⋯

如果你係咁諗就真係大錯特錯啦！

廣東話改編曲唔止喺香港存在，仲可以紅到去日本。幾年前みきとP所創作嘅《いーあるふぁんくらぶ（一二粉絲俱樂部）》係VOCALOID傳說中嘅曲目之一，至今已經有超過500萬點擊率。歌詞講述一個少女為咗同偶像講一樣嘅語言而去學中文，歌詞罕有咁混入咗中文（不過係普通話），成為佢最特別嘅地方之一。

感謝提供資料內容：Hane、Sear（YouTube、Niconico sm24279155）

呢首歌吸引唔少人翻唱之餘仲有人改寫咗歌詞做自己嘅母語?。小編搵過有德文版，都幾好聽㗎！不過有日本網民就話用德文改受中文影響嘅日文歌詞⋯⋯媽呀好亂呀！睇嚟用中文改編合理啲啦。

本地同人歌詞填詞人內木一郎就將佢改寫成廣東話歌《㊀㊁番薯會》，後嚟同樣係來自本地嘅翻唱歌手Hane同Sear將佢地翻唱嘅版本放咗上YouTube同Niconico，當中喺YouTube仲有超過40萬點擊率。

（德文版「いーあるふぁんくらぶ」，指路：sm24657137／上方彈幕翻譯：「都係中文最好」「明明係德文但首歌係中國feel嘅w」）

佢地嘅翻唱令好多日本人發現「廣東話」同佢地所認識嘅「中国語／北京語（即係普通話）」原來有好大分別，仲話呢種語言好可愛、好正，搞到佢地都想學識呢種語言。事實上，有人話佢去到中學生嗰陣先知佢地係兩種語言嚟！有相信係內地嘅網民將北京同香港嘅距離比喻成札幌同九州咁，所以對佢地而言廣東話都好新鮮咁話。歌詞入面出現咗「媽、馬」，原版係想表達呢兩個唔同意思嘅字讀音都係「マー（ma）」，但當網民聽到廣東話版音調係唔同嘅時候都覺得好神奇好勁。

（上方彈幕翻譯：「同普通話發音完全唔一樣」）

不過日文同廣東話都有啲淵緣㗎！唔知大家去日本有冇成日聽到當地人係度「係、係！」咁呢？其實日文當中正面回應人地嗰陣會講「はい（hai）！」，就好似我地香港人會講「係！」咁樣。咁啱佢地嘅發音一樣，所以其中有說「はい」係日本人喺香港聽到之後傳入去嘅。（雖然學術層面上否定咗呢種講法，但唔少日本人認為呢個先係語源）

廣東話以外歌詞使用嘅繁體字都成為網民討論嘅話題之一。有人就話覺得全部都係繁體嘅時候成個feel都唔同咗，另外都有人補充話好鍾意嗰種嚴謹嘅感覺～

《㊀㊁番薯會》嘅廣東話詞融入咗唔少生活化嘅廣東話，「㜺」、「散工」等等都係相當地道嘅講法。加上Hane同Sear間奏嘅對話「講呢啲？」，更加有種親切感。其實填詞人內木一郎相當專業㗎，除咗曾學過填詞外都為幾百首Vocaloid同動漫曲目譜上廣東歌詞。佢對捉音（姐係啱音）同正字讀音都好在意，會因應唱者所有嘅音調去調整歌詞，又會寫清楚難字嘅讀法，保留原曲意思同時都保留到廣東歌嘅韻味。