「名偵探柯南」動畫版20週年率先睇柯南主題CAFE MENU

今年係「名偵探柯南」動畫版20週年，所以今年柯南都寧舍多搞作，4月中又會有第20部柯南劇場版喺日本上映，又喺AnimeJapan 2016擺BOOTH同FANS玩下互動推理。又點會少得再譽歸來嘅主題CAFE，就喺早兩日CAFE就公佈咗嚟緊嘅柯南主題CAFE MENU，一齊睇下有乜新意先。

點解係再譽歸來呢﹖因為其實舊年柯南都搞過主題CAFE，仲吸引咗15萬人次嘅顧客，不愧係柯南，FANS數真係唔講得少。而今年亦都唔係炒冷飯，MENU都係全新設計過，仲有青山剛昌老師幫手參與其中㗎。

首先講下主菜部份：

米花水族館・帶子蜆肉奶油意粉

以「工藤新一水族館事件」篇為主題，係小蘭同新一充滿回憶嘅地方。而亦都因為水族館，所以材料上用咗海鮮類為主。

元太嘅特製饅魚飯

MENU寫係用咗宮崎縣產嘅饅魚蒲燒，仲有晒產地証明文件。物以罕為貴，所以呢道菜係數量限定。

小蘭為灰原手作雞蛋粥

根據「廁所裏隱藏的秘密」篇，重現小蘭為病咗嘅灰原親手煮嘅雞蛋粥。

阿笠博博士的炒麵麵包

日本風味嘅炒麵麵包加上薯條，打造FAST FOOD SET。

至於甜品方面，

首先有新一好鍾意嘅手作檸檬批，上面仲插住新一同小蘭嘅心心咭仔❤️。呢款檸檬批上年都有，唔知今年有咩唔同呢﹖

熱帶士多啤梨芭菲VS士多啤梨華麗雪芳蛋糕

呢個絕對卡路里超標嘅甜品，你又認唔認得﹖佢都係喺柯南動畫入面出現過㗎！

仲有今次MENU重點嘅法式泡芙

一睇就知係用咗APTX4869 嘅外型設計，連個泡芙都整到成個藥丸狀咁，但個泡芙當然唔會好似藥丸咁細粒啦。