相信大家都有睇過舊年年尾興起嘅登美丘高校舞蹈部嘅復古熱舞，入面仿80年代嘅服裝同氛圍真係無得頂！佢地一開始係大阪有名嘅舞蹈團體，平時活躍喺唔同嘅活動同大賽，去到參加比賽時表演復古舞一炮而紅。舊年仲同歌曲《dancing hero》原唱嘅荻野目洋子合作，上咗唔同嘅節目，到最後仲上埋紅白，同鄉裕美合作演繹《2億4千萬之瞳》，佢地嘅努力終於得到注目，係值得開心嘅結果！喺依一連串嘅大人氣之下，登美丘高校舞蹈部隊長伊原六花更加得到娛樂公司嘅接觸，下年3月將會出道！
伊原六花會簽入藝能事務所Foster，更加會變成依家當紅嘅廣瀨鈴、廣瀨愛麗絲嘅後輩。但係依位隊長嘅出道係咪偶然嘅幸運呢？今日小編就同大家一齊嚟睇睇伊原六花嘅舞蹈生涯啦！
(Twitter截圖: https://pbs.twimg.com/media/DSYOPfgVQAMLovP.jpg)
(官方事務所截圖: http://www.web-foster.com/pc/artists/Ihara/Rikka)
舞蹈經歷
伊原由小二已經開始跳舞，舞歷10年。佢鐘意閱讀同演戲，所以一開始就喺劇團做音樂劇，之後就學跳芭蕾舞同跳舞。佢細細個就有做兒童音樂劇、之後仲參與咗有名嘅音樂劇｢ズボン船長｣，為自己嘅將來慢慢鋪路。
與登美丘高校嘅相遇
伊原打算入咗高中就一定會入舞蹈部，佢以前喺YouTube見到登美丘高校嘅舞蹈璀璨奪目、好有型，就決定咗一定要入登美丘高校啦。佢初中並無加入任何部，所以最初感覺有啲辛苦。由於登美丘高校舞蹈部嘅上一代前輩們都好出色，伊原加入嘅果一代最初亦都比人話唔掂。佢甚至懷疑自己比舞蹈教練討厭，結果慢慢溝通交流，終於打好關係得到指導。
成為隊長
伊原當初被選為部長，但唔太順利，中途換咗做隊長(即係帶領跳舞嘅人) 。佢覺得做領袖最緊要係令成員意識、目標一致，特別努力嘅人會不滿意唔努力嘅人，但係唔努力嘅人可能只係努力緊，但未傳達到自己嘅努力比人。
而伊原自身都有相似嘅經歷，所以明白佢地嘅感受。「我恃住自己以前有舞蹈經驗，有一排特別自滿。但係喺2016年竟然落選咗某個試鏡會，令我非常唔甘心，我付出咗一切嘅努力，到之後嘅試鏡終於入圍，令我覺得自己有改變。所以我會鼓勵覺得自己做唔到嘅成員『你可以更上一層樓架！』，我認為『努力嘗試就能做到』依句話係真架！」
(Twitter截圖:https://pbs.twimg.com/media/DIyBcE2UwAA92gh.jpg )
復古舞「Bubbly Dance」嘅靈感
伊原同部員們只係透過電視去認識日本經濟泡沫時期，而佢媽媽都唔係泡沫世代嘅人，所以唔太知道詳細係點。而有一日，舞蹈教練睇到舊時嘅跳舞影片，發覺原來可以跳「復古舞」。舞蹈部成員都覺得依隻舞非常有趣，特別係跳慣舞嘅高2、高3學生，感到羞恥嘅人反而好少。
DANCE STADIUM大賽嘅準優勝
雖然佢地日日以「優勝！優勝！」為目標練習，但大賽中攞唔到三連勝，所以佢地覺得對屋企人同前輩非常唔好意思…但之後果次大賽嘅片段掀起話題，令佢地對今次比賽嘅迴響好驚訝。佢地更加見到唔同世代嘅comment，感到安慰。伊原發現「我地無做錯到！」，更加向後輩傳遞咗「擁有自己風格非常重要」嘅消息。
(Twitter截圖: https://pbs.twimg.com/media/DHeVeIdU0AAhimq.jpg)
將來打算
伊原本身有做音樂劇，亦鐘意演戲，將來打算做返依類工作。希望可以以人氣女宮崎葵做目標。
(Twitter截圖: https://pbs.twimg.com/media/DHeVeIcUAAAjIAd.jpg)
其實，成功唔係偶然，亦需要好多努力。伊原六花嘅成功回報咗佢一直以嚟嘅努力，真係好替佢開心啊！希望伊原踏入演能界之後，可以令自己繼續發光發熱！
About Post Author
