鹿兒島自由行｜鹿兒島風景靚、美食多，近年香港仲有埋廉航直飛鹿兒島㖭，難怪愈來愈受旅客歡迎啦～今次Mika就介紹鹿兒島出水市嘅2日1夜行程畀大家，想體驗傳統農家生活、欣賞日本傳統文化嘅你就一定唔可以錯過啦～（所有報名方法都寫晒喺最底，記得睇到最後啊！！！！）
鹿兒島自由行｜2日1夜出水市解壓田園行程
Day 1: 投宿地道農家 體驗非一般田園樂
Day 2: 著和服學茶道坐牛車 參觀日本第一大鶴鳥過冬地
————————————–
鹿兒島自由行｜出水市 DAY 1 :投宿地道農家 體驗非一般田園樂
出水市內觀光→摘蔬果體驗→農村風味晚餐→於農家留宿
香港人真係冇咩機會親親大自然＞＜如果想釋放吓都市人嘅壓力，體驗日本嘅農村生活，不妨試吓住係出水市嘅農家民宿！出水農家民宿體驗唔單止係有得住喺農家咁簡單，而係好似去homestay咁樣，一整天都可以跟住日本農家周圍玩、去田地到收割農作物、食農村料理等等，好充實㗎！（部分農家仲識得講英文㖭！）
————————————–
出水農家民宿體驗內容：
1. 農家車站接送 出水市內任你玩！
只要事先同農家約好時間（下面會再教大家點做），農家就會到時到候喺出水站接大家㗎啦～同農家見咗面之後，就正式開始旅程啦～一般農家都會有幾個心水地方帶大家去玩，不過如果你有咩特別要求的話，亦可以事先同農家講定「我想去邊到邊到玩」，農家會盡量安排^^我嗰陣冇咩特別要求，接待我嘅農家先生就帶咗我上公園睇風景、去海灘等等～～果然地道人嘅推介都非常之咁正啊～
————————————–
2. 收割農作物 享受田園樂
出水農家民宿體驗嘅其中一大重點，就係去農家工作嘅地方幫手啦！有啲農家屋企係養牛、有啲係種水果、有啲係種菜，大家會體驗咩農村樂，就視乎你喺咩農家到留宿啦～（同樣可以事先講明想體驗種菜定養牛等等，農家會盡量幫手安排～～）Mika留宿嘅農家主要係種蔬果，一知道有得拔蘿蔔同掘蕃薯時真係非常興奮，因為啲蕃薯一掘完就有得即刻整嚟食！！超～級～甜～啊～～大家可能會擔心落田幫手好辛苦，不過其實農家唔會真係要你做到隻牛咁，只係少少地體驗吓，一啲都唔辛苦，仲好好玩㖭！（其實我仲想再掘多啲www）
————————————–
3. 農村晚餐 獨一無二嘅家庭料理
落田幫完手之後，就差唔多係時候食晚飯啦！我當日食嘅係燒鹿兒島和牛、烤出水市本地雞翼、另外仲有得自己親手包魚生手卷嚟食，真係諗返起都流口水～農家先生話如果有多啲時間嘅話，其實仲可以一齊整pizza（由麵粉開始整起！），整完個批底就一齊去農地到摘配料，再放入去佢個親自整嘅炭爐到烤㖭！！！真係聽落都好吸引啊！
————————————–
鹿兒島自由行｜出水市 DAY 2: 著和服學茶道坐牛車 參觀日本第一大鶴鳥過冬地
和服體驗（可帶走）茶道體驗→坐牛車→出水名物親子烤雞午餐→鶴觀察中心
1. 和服體驗＠武家屋敷 和服可以帶埋返屋企！！
喺出水市嘅「公開武家屋敷」到（即係以前武士嘅屋企），大家可以用超平嘅價錢參加和服體驗，重點係套和服著完之後，件和服同條腰帶仲可以畀你帶埋返屋企，真係非常非常抵啊！！！！！！！（夏天嘅時候，和服體驗會改為浴衣體驗，大家直程可以成套浴衣著住返香港，咩都唔洗還！！！！！）
武家屋敷依到嘅和服選擇都幾多，當中仲有啲值成10萬円嘅新和服㖭～～～除咗和服同腰帶之外，仲有各式各樣嘅配件可以選擇㗎～揀好晒之後，專業嘅人員三兩吓手勢就會幫你著好晒套和服～難得嚟到武家屋敷，記住影返兩張相先好走！
＊如果4人或以下參加和服體驗嘅話，會有出水車站接送服務，好方便㗎！
————————————–
2.著住和服 學習傳統茶道禮儀
如果你同4位朋友一齊嚟參加和服體驗的話（共5人），就可以免費參加埋茶道體驗啦～如果唔夠5個人的話，都可以畀5,000円（所有人加埋）參加茶道體驗嘅～喺傳統嘅武家屋敷入面，茶道老師會教你點樣拎碗、點樣抹手等等茶道禮儀，又會教你如果腳痺嘅話，日本人脆坐嘅時候會點樣做等等～可以喺咁靚嘅環境下品嚐傳統嘅和菓子同抹茶，真係一個好寶貴嘅體驗嚟㗎～（提提你：只有參加咗和服體驗嘅朋友先可以參加茶道體驗㗎！）
————————————–
3. 坐牛車遊城 化身400年前日本公主
無論你有冇參加和服體驗都好，都一樣可以坐上「出水觀光牛車」觀光㗎（1,000円／人）～坐牛車一程需時半個鐘左右，車內裝飾得非常繽紛，好似古代貴族嘅牛車咁高級！一坐上車，導賞員就叫我想像自己係400年前嘅日本公主，正身處於古代嘅街道「微服出巡」緊咁（笑） 從車內望出去，沿路風光就好似古城咁，大街小巷都好有風味～導賞員會沿途講解依棟建築有咩歷史、邊個地方係值得參觀嘅景點等等，真係幾好玩㗎！！
————————————–
4.出水市 雞之國度 必食雞全餐
唔講唔知，原來全日本第二高雞產量嘅地方就係鹿兒島出水市，話依到係「雞之國」都不為過啊～換返便服之後我就嚟到依間有提供全雞宴嘅「味處魚松」食「出水親子烤雞飯」，試吓出水兩大名牌雞肉「南國元氣雞」同「赤雞薩摩」有幾厲害～首先個雞肉雞蛋濃湯係好濃好鮮甜，甜到有啲似雞肉糖水咁，好特別好好味～個雞肉沙律就非常特別，啲雞肉非常彈牙，雞皮又薄又滑，配埋啲調味啫喱真係令人眼前一亮！
依到嘅雞蛋蓋飯都好特別㗎！依隻雞蛋又叫做「出水幸運雞蛋」，好多時打出嚟都會發現係雙蛋黃，味道特別香濃～加埋枝雞汁醬油撈落個飯到真係冇得彈（笑）
最最最重點嘅就係鐵板燒雞扒啦！（有得自己燒㗎！）雞扒分為雞脾肉同雞胸肉兩種，雞脾肉燒完非常滑溜彈牙；雞胸肉燒到中間心少少生生地就最完美，咬落軟腍腍，雞嘅鮮味仲好出㖭！
————————————–
5. 鶴觀察中心 鶴鳥數量日本第一
食飽飽繼續行程，推薦大家去鶴觀察中心欣賞鶴鳥！每年11月至12月左右，一萬隻以上嘅鶴鳥就會從俄羅斯等地飛嚟日本過冬，一直留到3月左右。原來全世界只有出水市可以畀大家一次過欣賞到咁大量瀕臨絕種嘅白枕鶴同白頭鶴等等鶴鳥，而依到嘅鶴觀察中心就係最佳嘅賞鶴地點啦～
11月至3月係賞鶴嘅最佳季節，喺鶴觀察中心2樓嘅展望台，大家可以利用望遠鏡欣賞鶴鳥～唔想企定定睇咁辛苦，可以選擇去1樓cafe到嘆住咖啡睇鶴，依啲體驗喺其他地方真係搵唔到㗎～除咗欣賞鶴鳥之外，鶴觀察中心入面又有唔少展板同展品，想了解更多有關鶴鳥嘅生活同習性嘅話就千祈唔好走寶啦～另外鶴觀察中心嘅一樓有個手信專區，入面有好多有關鶴鳥嘅手信同出水市嘅特產，記住帶多啲彈藥去血拼啊！
提提大家，最理想嘅觀鶴時間係每日早上嘅6點半至7點半左右。依段時間入面，大量鶴會成群成群咁飛埋嚟，到7點幾左右，當工作人員餵飼料嗰陣，大家更加會見到漫天鶴鳥飛舞嘅場景！又萬一咁好彩天晴的話，大家仲有機會見到日出時份漫天鶴鳥嘅畫面㖭！如果你係鶴鳥發燒友或者影相發燒友嘅話，就記得早啲起身去鶴觀察中心外面嘅田地睇鶴啦～～～～
————————————–
價錢及報名詳情
1.出水農家民宿（每個農家1日最多接待1組遊客）
價錢（包括1晚留宿及早晚餐）：
2名大人 8,600円／1人
3名以上大人 7,600円／1人
小孩（12歳以下） 5,300円
製作午餐體驗：1,080円
報名方法：
報名方法好簡單，只要喺以下網頁到填好資料就可以報名㗎啦！報名時只要寫清楚有咩希望同特別要求，例如想搵個識得講英文嘅農家、想試下摘水果、想去鶴觀察中心、想參加和服、牛車體驗、想食親子烤雞飯等等，農家都會盡力為大家安排同予約。如果你有咩問題或者要求的話，就記住喺備註嗰欄到寫明啦！
http://www.izumi-navi.jp/tw/inquiry_farmstays/form
官方網頁：
http://www.izumi-navi.jp/tw/feature/minpaku
————————————–
2.著和服體驗（10月至4月）
價錢：
女：7,000円/人（可帶走和服及腰帶）
男：4,700円/人（只限租用）
著浴衣體驗（5月至9月）
價錢：
女：7,000円/人（可帶走整套浴衣）
男/女：3,000円/人（只限租用）
＊5人以上同行可免費參加茶道體驗
＊5人以下亦可以合共5,000円參加茶道體驗
（請於予約和服時註明）
報名方法：
1月個前電郵至kanko_c@city.izumi.kagoshima.jp
＊從2018年2月開始可以在官方網頁上直接報名
官方網頁：
http://www.izumi-navi.jp/tw/feature/kimono
地址：公開武家屋敷「稅所邸」鹿兒島縣出水市麓町5-11
————————————–
3.牛車乘車體驗（最多15人）
價錢：
中學生或以上：1,000円/人
小學生或以下：500円/人
行駛日：星期六日及公眾假期
（如果有予約的話平日亦會行駛）
報名方法：
電郵：kanko_c@city.izumi.kagoshima.jp
電話：0996-62-1511
官方網頁：http://www.izumi-navi.jp/tw/feature/buke
地址：公開武家屋敷「稅所邸」前 鹿兒島縣出水市麓町5-11
————————————–
4.「親子烤雞飯」午餐
提供餐廳：味處魚松
營業時間：11：30～14：00／17：30～23：00
官方網頁：
http://www.izumi-navi.jp/tw/feature/food
地址：鹿兒島縣出水市昭和町50-27
電話：0996-62-0655
————————————–
5.出水市鶴觀察中心（11月～3月下旬）
價錢：
中學生或以上：210円/人
小學生或以下：100円/人
營業時間：9:00〜17：00
交通：每年12月至2月可從出水站乘周遊巴士到出水市鶴觀察中心
http://www.kanko-izumi.com/bus.html
官方網頁：
http://www.izumi-navi.jp/tw/feature/tsuru
地址：鹿兒島縣出水市莊2478-4
電話：0996-85-5151
————————————–
出水市交通小貼士：
搭乘九州新幹線可直達出水站
從福岡站到出水站約1小時11分鐘
從熊本站到出水站約32分鐘
從鹿兒島中央站到出水站約25分鐘
＊「JR九州鐵路周遊券」同樣適用於新幹線出水站
About Post Author
