每次要諗一家大細去旅行嘅時候，最煩就係要照顧同行嘅長者同小朋友，究竟點樣先可以令佢哋玩得開心自己又可以一齊享受？我諗好多家長都有呢個煩惱。
上網查過好多資料，知道 Club Med 係一間全包同埋主打一家體驗嘅度假村，所以就參加左 Club Med 四日三夜北海道滑雪package。依家就等我分享四日三夜嘅行程：
第一日：
搭八點鐘嘅直航飛機由香港出發直接去北海道新千歲機場。機程大約四小時。落機之後，大約係日本時間一點左右。今次我哋係住係 Club Med Sahoro ，位於北海道中心，由新千歲機場大約有兩小時車程。所以我決定哋先喺機場食一個午餐。食完午餐之後，就去搵到 Club Med 一個 counter，去登記之後就會有專車接送去到酒店。
由於北海道大概四點幾已經開始天黑，所以喺車程我哋可以見到有日落嘅雪景。經個兩小時嘅車程，去到酒店時已經入黑。
對於一個香港人來講，落車嗰一刻真係好凍，不過見到成呎厚既積雪，一切都係值得。重點係一落車已經聽到AKB嘅首本名曲恋するフォーチュンクッキー，即刻成個人開心晒。
好重點黎啦，一落車會有酒店嘅服務人員帶你去counter check-in，你啲屋企人呀小朋友呀會有「GO」招呼，我做爸爸嘅只需要去到counter搞手續就可以。
咩係 GO? GO（Gentils Organisateurs），係一個幫你安排活動嘅人員。除安排活動之外，佢哋仲會照顧你行情每一個細節，同你傾計，講真我開頭都唔係好習慣，但老實講佢哋真係好親切同埋當你朋友一樣。基本上呢啲GO對於一家大細來講係好重要，點解？因為當你有屋企人唔清楚點樣去玩嘅時候，佢可以直接問GO，而唔需要煩到我，唔需要煩到我，唔需要煩到我，呢個係重點，好重要所以要講三次。
搞好手續之後，我哋就上房安頓。今次同行有四個人，我同我老婆，我4歳的仔仔，同我媽咪。係預訂酒店嘅時候，我都有考慮到究竟係一間房定係兩間房，咁啱有睇到酒店裏邊有一種房間，係可以一家大細去住。今次我就揀咗一間房，可以住到四個人一家大細。呢類型嘅房間唔係間間酒店都有，所以今次呢個一個好嘅體驗。特別係我媽咪唔係好識英文同日文，咁我可以照顧得佢哋更加好。
酒店房間圖片:
之後我哋就去到餐廳食自助晚餐，估唔到今次就有野味？你冇睇錯，係野味！燒鹿肉，雖然唔係個個接受得到，但係點都要試吓。味道有啲似馬肉，但係比馬肉更加濃郁嘅味道。另外北海道蟹腳當然唔少得，再加埋基本嘅壽司牛扒等等，都幾好食。
鹿肉:
北海道蟹腳:
重點又來啦，食食吓飯無端端有個人坐埋來，同我地打招呼，問我地介唔介意一齊坐，我心諗咁高級嘅酒店都要搭枱？原來佢係來至其他國家嘅 GO，我個仔見到佢好開心，因為係一個好靚嘅法國女仔嚟嘅。當然我更加開心啦。原來酒店住GO其中一個責任，就係陪其他客人傾計，等佢哋融入今次假期。傾談當中，他介紹了一個香港嘅 GO 給我們認識，同我講今次旅程如果有乜嘢問題，我媽咪或者小朋友都可以直接搵佢，咁我哋兩公婆就可以專心享受今次嘅假期，我覺得呢個服務簡直係無價。本來諗住今次嘅假期我都係做阿四，而家由地獄上返天堂，真係非常之開心。
喺食晚飯嘅時候，GO 就陪我去登記第二天嘅滑雪課程。因為我哋成家人都係第一次滑雪，就參加左滑雪嘅初學班，費用係完全免費，除非你要求一對一嘅課程。
咁滑雪梗係有分 ski 同 snowboard ，我同老婆就揀咗 snowboard，媽媽同小朋友就揀咗 ski。提一提大家，四歲以上嘅小朋友，可以揀 Ski，八歳以上先可以揀 snowboard。可能係因為snowboard 嘅要求比較高。
小朋友滑雪用具:
登記完滑雪課程之後，就要去租借滑雪嘅用具同衫褲。滑雪嘅用具，即係滑雪板同專用嘅鞋，有分租一日，半定係只係租夜晚，大家可以因應自己嘅需要而決定租幾耐。因為第二日我哋報名報咗一日嘅滑雪課程，所以今次就租咗一日嘅用具。提提大家，租滑雪衫同褲係喺賣衫嘅鋪頭租，同租滑雪版，滑雪鞋嘅地方唔同。衫褲就只有租一日嘅選擇，並沒有租半日或者只係幾個小時。
經過一日嘅舟車勞頓，食完飯之後大人都攰，但小朋友仲鬼咁精神。我媽咪就去咗酒店嘅大浴場沖涼。喺浴場沖完涼之後行出去，原來有一個露天嘅大木桶(Canadian Bath)，可以一邊享受雪景一邊浸浴。我兩公婆同埋小朋友就去咗睇 Show – GO show。呢個show每日都有唔同嘅主題，內容都係由 GO去構思，今晚就有只有表演唱歌跳舞，酒店嘅總經理，佢哋稱呼為村長，都有份表演，而且跳得都幾好睇。
Canadian Bath:
第二日：
朝早八點鐘起身之後，我哋一家大細落咗去食早餐，早餐都係自助餐有嘅嘢食，但原來佢都有白粥同埋雞粥，啱晒我阿媽口味。
食完之後就到戲肉了，我就同老婆去玩 snowboard，媽媽同我個仔就去咗玩ski。教我地snowboard係一個愛爾蘭人，我嗰班初級班總共有四個人，比例唔算好誇張，基本上對於我呢啲冇乜體能嘅人來講，越多人係越好，因為唔使練習咁多次。但係依家四個人，每次教練教我哋一啲動作都要練習10幾次，對於我來講係一個好大嘅負荷。教學班分咗上晝到下晝，每次都係兩小時，上晝係9點半左右到11點半，中間食lunch，下晝就係1點半到3點半。
上晝堂主要係喺平地同埋小斜坡試吓點樣跌低，企起身同練習基本平衡。基本上對於冇做運動嘅人來講頭一個鐘頭都可以應付到，第二個小時就開始感受到疲倦了。
分享小小心得，玩 snowboard 最緊要係放鬆企，因為其實兩隻腳係固定喺 snowboard 嗰塊板上面，只要輕鬆企喺度，其實可以慳返好多氣力。力係你用係最重要嘅時候，就係跌低咗之後企起身。
玩完上晝個session，休息一陣去食中午飯，之後就再嚟下晝嘅session。下晝就完全唔同啦，今次係帶我地去隔離一條滑雪道，唔係山波仔，係目測長度都有成700米，大約係30度角左右嘅雪道。基本上平衡得唔好，企起身就會「sir」咗落去。不過當你試多幾次之後，你就會發覺「sir」落去個速度感係好好玩。
玩完下晝嗰一堂，成個人都散散地，一家大細返上房沖涼休息下，到咗六點半晚飯時間就去食飯。
食到8點左右，就同媽咪老婆去咗睇 GO show ，今次嘅主題同尋日有少少唔同，係一個搞笑嘅show，值得一睇。同一時間，我哋安排左小朋友去pyjama club玩，呢個地方係類似一個小朋友玩遊戲嘅房間。裏邊有唔同嘅玩具，重點係會有專人幫你睇住小朋友，咁我哋就可以專心去睇show同埋之後去酒吧飲野。
GO Show:
酒吧基本上所有嘢飲都係免費，除非你有特別嘅要求，或者叫咗喺餐牌上邊有價錢嘅酒，不過基本上佢本身嘅紅酒白酒都係唔使錢，已經足夠。就咁樣我哋一家人就享受左一個快樂嘅夜晚，重點係我真係可以放低小朋友唔使自己煩惱。
第三日：
因為經過第二日嘅滑雪課程，已經攰到七彩，我哋今日決定唔滑雪，一早出去行下，食下出名豬肉飯。當然我哋揀呢間酒店最主要嘅原因，係小朋友可以有另外自己嘅活動，今日我就安排左個小朋友去mini club，另一個小朋友可以玩嘅好大play room，裏面當然有各式各樣嘅遊戲啦，同埋會有GO同佢地一齊玩。咁我媽咪同我兩公婆就放心好多。
其中一個 play room:
下晝返酒店嘅時候，GO問我地有冇興趣參觀附近新嘅 Club Med Tomamu，大概係半個鐘頭車程。我就同太太媽咪一齊去參觀呢間新嘅酒店，佢講呢間新嘅酒店係12月8日開幕，咁我哋當然順道去參觀下。
新嘅酒店各方面嘅設備都好完善，特別係所有滑雪嘅用具都係全新嘅，我諗下一次再嚟北海道應該會揀呢間新嘅酒店。
Club Med Tomamu 大堂:
Club Med Tomamu 全新滑雪用具:
Club Med Tomamu 望出去一片大雪景:
Club Med Tomamu 小朋友有不同 playground 可以放電:
參觀完酒店之後，就返去原本間酒店接仔仔食晚飯。今次我揀咗酒店裏邊一間餐廳，打邊爐（しゃぶしゃぶ），同自助餐一樣都係免費。
食完晚飯，GO 話俾我哋聽準備咗一個特別嘅節目，話我一定鍾意，跟住就帶走左我嘅小朋友。原來今晚個 GO show，安排左我個小朋友同其他小朋友一齊表演，表演左一首歌，仲有跳舞。呢個時候係我哋成個旅程最開心嘅，因為就好似睇住佢幼稚園畢業一樣。成班小朋友開開心心跳舞。原來佢都真係識跳舞，仲識到一個日本嘅小朋友添。個show完咗之後我哋就出咗去酒店出邊砌雪人，凍到抽筋，不過係一個好嘅體驗。之後就翻房瞓覺。
第四日：
八點鐘起身食個早餐，就去check out，之後就搭酒店嘅車返返去新千歲機場離開北海道。成個旅程好圓滿咁結束。
其實我嘅感覺就係一家大細，可以各自有不同的遊戲，同埋relax。同我以前一家大細去旅行，其他人好舒服而我好辛苦嘅感覺完全唔同。
聽酒店講滑雪的季節其實可以去到三月尾，我仔仔同我老婆已經話想來多一次，唔想等多一年之後先再嚟。我諗下一次應該會去新嗰間酒店，今次分享就係咁多，謝謝！
About Post Author
