申請學生簽証真係一段漫長又艱苦既路，
不過捱過左之後就可以係日本做一條好漢，各位鄉親要頂住啊！
想留學首先就要搵學校（鬼唔知咩）。
好似我咁，我報讀嘅學校係4月開學，一般學校都係早一年嘅9月至11月報名，早報嘅蟲有學校讀～
咁我舊年10月就報左學校，12月個陣學校就「初步接納」咗我個申請，叫我交「入學金」。
交左錢之後，學校先會將你個名交比日本領事館，然後等等等等等，等到2月25號，yeahhhhhhh終於公布左結果，我個學生visa申請獲得批準啦！
交學費要快手！
公布左學生visa申請結果之後，學校會叫你交學費。學校收到入數紙，就會將幾份文件速遞去香港，依個過程最少需要2、3日，而去領事館搞visa又要等足5個工作天，萬一你咁唔好彩，晨早買咗機票，又整唔切visa，係絕對冇情講！就算你喊晒口求佢，領事館D人都只會好冷靜咁話：改機票啦。所以麻煩大家快快手手交學費，快快手手去領事館搞簽証！
去領事館做足準備～
各位準備搞visa嘅朋友，你要帶住以下依堆野去日本領事館辦理入境簽証，缺一不可：
1.在留資格認定證明書(正副本)
2.護照(正副本)
3.身份證(正副本)
4.相（一張，帶多冇壞）
5.赴日簽証申請表（領事館入面有得拎）
在留資格認定證明書(入左日本境，佢地就會收左依張紙！）
鬼咁多野填呀！
在日保証人填邊位？下次話你知！
含淚暫別領事館（哭）
講左咁耐，終於都到戲肉啦！話說個朝我10點去到領事館，門口幾個實Q就問我搞邊科，我咪話搞簽証囉。點知佢話：你咁遲黎，人地個個晨早8點係留下排隊攞籌啊！15分鐘就派晒啦，你聽日再黎過啦。
WTFFFFFFFFF，唔係掛，下你地慢吞吞要5個工作天，我今日搞唔掂就要改機票、book過晒D酒店、趕唔切去睇樓、最後可能要流落東京街頭……當我心入面諗到依到個陣，眼淚都開始想咇出黎，呆呆地一碌木棟左係到……
個實Q雖然惡死能登，但見到面前嘅妙齡少女想喊咁款，又走話黎話：你幾時飛呀，做咩唔搞簽証就買機票！人人都係有簽証先買機票嫁啦！
咁我咪話因為我要睇樓……想早D去囉……
奇妙嘅事情發生啦！！！！！！！！！！
佢話：你去日本做咩呀？
我話：留學囉
佢就即刻半鬧半笑咁話：車！！！！！！你又唔早D講，留學visa都唔洗拎籌……你下晝再黎啦！我實認得你呀！自己講野又唔清唔楚……
冇錯，千錯萬錯都係我嘅錯……我搞嘅係留學簽證，唔係簽證……你地去領事館個陣，記得拎定張「在留資格認定證明書」出黎，貼係額頭到，等D實Q叔叔知道你咩料呀！
於是我就抹乾眼淚，高高興興地等下晝再去過啦……（待續）
About Post Author
