松本潤「俺松本潤」日本四字詞熱潮

近日Arashi喺《交給嵐吧》（嵐にしやがれ）節目畀混血模特兒瀧澤Karen(滝沢カレン)用四字詞評價而成為網上熱話。先前同大家用「嬲」字睇過中日漢字，今次就睇下日式四字成語（四字熟語）啦。

中文四字成語
講日文之前，等我地重溫一下中文係點先。
一講成語，就會諗起好多成語故事，好似《成語動畫廊》入面嘅狐假虎威、塞翁失馬、掩耳盜鈴……呢啲成語有啲嚟自古代嘅經典、著作，有啲嚟自歷史故事。例如狐假虎威、亡羊補牢就係出自《戰國策·楚策》。

除咗呢啲文縐縐嘅成語之外，四字成語又可以泛指四個字嘅慣用語，例如歇後語、諺語等等。呢啲四字表現通常係民間相傳落嚟嘅，所以同日常生活好貼切。

松本潤「俺松本潤」日本四字詞熱潮 — 粵語四字格成語語料及音檔庫: http://www.livac.org/yueqie/

除咗四字成語之外，偶爾都會見到三字、五字、六字、甚至七字以上嘅成語；不過四字就真係佔咗唔少部分。四個字嘅結構，同古代中文多單音詞有關。

日文四字熟語
四字熟語（よじじゅくご）所指嘅就係由４個漢字組成嘅詞語。狹義嘅解釋就類同中文嘅四字成語一樣，指出自歷史故事、文學作品、諺語等嘅四字詞。比較有代表性嘅辭典「新明解四字熟語辞典」（三省堂 1998年）就將四字詞分成六類：
1.現代、社會用字
2.日本的慣用語
3.中國典籍
4.佛教用語
5.由「之」（一般以の表示）字組成
6.漢文訓讀(用日文文法解讀漢語文言文)

日文嘅四字熟語一方面有係中文借過去嘅，例如臥薪嘗胆、一目瞭然；另一方面有日本自創嘅，例如一期一会、無我夢中。

相異之處
中日四字詞入面唔同嘅地方係我地學日文；或者日本人學中文感到困難嘅地方。令人最混亂嘅就係同一個四字詞；或者相似嘅四字詞喺中日有唔同意思。一篇題為《漢日四字熟語研究》嘅文章 (魯暢，2002) 就提到以下例子：

中文意思

日文意思

落花流水

［貶義］原指花殘墜落、春景衰敗；

現引申至慘敗、大勢已去。

［中性］比喻逝去嘅春色、別離；

以流水比作男性、落花比作女性，指兩情相悅。

朝三暮四

［貶義］原指實際上沒改變，但用改換名目令人上當；

現引申至變化多端、三心兩意。

［貶義］保留中文原意，指實際上沒改變，但用改換名目令人上當。

即「換湯不換藥」。

研究日本人學習中文嘅文章”On Teaching of the Chinese Common Fourcharacter Structure from the Perspective of Comparing with the Japanese Yojijyukugo” 提到除咗意思有改變之外，向中國借用嘅時候，次序、詞彙都唔一定會同中文一模一樣。例如薄利多銷：「薄利多売」、賢妻良母：「良妻賢母」、鐵石心腸：「鉄心石腸」。

亦有將四字簡化成二字（畫蛇添足：「蛇足」、杞人憂天：「杞憂」、守株待兔：「守株」）；或者將四字以日文譯出（如魚得水：「魚が水を得たかのようだ」、苦口良藥：「良薬は口に苦し」）嘅例子。

四字熟語(廣義)

一般講到四字熟語，大部分日本人都應該同我地一樣，覺得係由四個字組成嘅一個完整意思，感覺古代文雅嘅字詞。不過如果話四字熟語指嘅就係由４個漢字組成嘅詞語，咁廣義上所有由４個字組成嘅詞都可以係四字熟語。聽講有日本學生試過喺一次考試填充題「＿肉＿食」填咗「燒肉定食」而唔係標準答案嘅「弱肉強食」，成為一時網上笑料。

Arashi成員四字外號
日本、烏克蘭嘅混血模特兒瀧澤Karen喺上星期六(11號)嘅《交給嵐吧》節目登場。近日都有用四字詞去形容唔同藝人嘅佢就幫Arashi成員改咗以下外號：

二宮和也「趣味在宅」（二宮的興趣是留在家）
相葉雅紀「馬鹿脱皮」（相葉最近沒有了從前的傻瓜可愛形象）
大野智「海釣地蔵」（大野喜歡釣魚，被粉絲覺得像地藏菩薩）
櫻井翔「服装迷走」（櫻井私下服裝打扮總有點奇怪、愛穿迷彩）
松本潤「俺松本潤」（Karen說覺得松本就是有總「我是松本潤」的氣場）
雖然呢啲都係Karen臨時作嘅四字詞，但日本網民普遍都好有共鳴、好好笑，覺得感覺明白佢咁樣講嘅原因。